Wjace US-wojakow přikazanych
Washington/Tel Aviv/Gaza (dpa/SN). Wójsko USA powjetši hladajo na wočakowany nadběh Irana swoju prezencu na Bliskim wuchodźe. Zakitowanski minister Lloyd Austin je wukazał, zo ma so z atomowym motorom wuhotowany nurjak „USS-Georgia“ do regiona podać. Nimo toho měli lětadłonošak „USS Abraham Lincoln“ a čołmy nurjak přewodźeć a tak jeho transit do regiona pospěšić. Tole zdźěli centrala wójska Pentagon.
Mjenowany lětadłonošak ze swojimi modernymi jetami typa F-35 přidruži so hižo w regionje přebywacej skupinje lětadłonošaka „USS Theodore Roosevelt“. W rozmołwje ze swojim israelskim kolegu w zastojnstwje bě minister Austin hladajo na „eskalěrowace regionalne napjatosće“ hišće raz winowatosć USA wuzběhował, „kóždy móžny krok nastupić, Israel zakitować“, rěka w zdźělence Pentagona dale. Galant warnowaše w mjezyčasu hižo režim w Iranje kaž tež libanezisku Hisbollah-milicu před wulkim nadběhom na Israel. Po zamordowanju wažneju funkcionarow Hisbollyh a Hammas běštej Iran a Hisbollah nadpady na Israel připowědźiłoj.
Woheń dale zachadźa
Mnohe wjeski dyrbjachu blisko grjekskeje stolicy hižo ewakuěrować
Athen (dpa/SN). Grjekskej wohnjowej woborje njeje so poradźiło wulki woheń, kotryž howri wot wčerawšeho popołdnja blisko Athena, zhašeć. Wobydlerjow dwanaće wjeskow wokoło městow Marathon a Penteli napominachu z pomocu SMS swoje domske wopušćić, zdźěli rěčnik wohnjoweje wobory w grjekskim rozhłosu.
„Ručež słónco schadźa, chcemy 29 hašenskich lětadłow a helikopterow zasadźić“, wón přida. Penteli je něhdźe 15 kilometrow, Marathon něhdźe 30 wot grjekskeje stolicy zdaleny. Grjekske medije wo tym rozprawjeja, zo dyrbjachu wuchowanske mocy mnohich ludźi z ćežemi dychanja do chorownjow donjesć. Tež dwě chorowni dyrbjachu ewakuěrować, zdźěli knježerstwo.
Dokelž woheń mócnje kuri, běše Athen hodźiny dołho husće zakurjeny. Něhdźe 100 kilometrow daloko saha kur nětko hižo a je połkupu Peloponnes docpěł, wo tym wobydlerjo rozprawjeja.
„Budyšin je queerny“!
To a tamne (12.08.24)
Awstriski předewzaćel Richard Lugner je njeboh. Rodźeny Wienjan zemrě dźensa, póndźelu w starobje 91 lět. Tole wobkrućichu jeho swójbni. Znaty bě Lugner wosebje za swoje derje inscenowane wustupy na operowym balu we Wienje, na kotrež jeho často hwěžki z Hollywooda přewodźachu. Hakle w juniju bě so Lugner šesty raz woženił, z 42lětnej Simone Reiländer.
W měsće Cairns na sewjeru Awstralskeje je helikopter na třěchu hotela zrazył. Pilot při njezbožu swoje žiwjenje přisadźi, zdźěli policija zwjazkoweho stata Queensland. Dźěle hotela „Double Tree by Hilton“ so po zražce zapalichu. Hotel leži při Esplanade, woblubowanej pobrjóžnej promenadźe. Na terrainje je lětanje zakazane. Firma, kotrejž helikopter słušeše, zdźěli, zo njebě lět helikoptera dowoleny.
Tak chce biskopstwo prawicarstwu w cyrkwi zadźěwać
Drježdźany (SN/mb). Biskopstwo Drježdźany-Mišno je na naprašowanje našeho wječornika skonkretizowało, kak chcedźa z ekstremistiskimi pozicijemi a stronami wobchadźeć. Nawróćiwši so z wulěta z ministrantami do Roma je Michael Baudisch, rěčnik Drježdźansko-Mišnjanskeho biskopstwa, na naše prašenja wobšěrnje wotmołwił.
W swojej změnje wólbneho porjada su „přećiwo cyrkwi njepřećelne skutkowanje, kotrež konkretnych wobstejnosćow dla wěryhódnosć cyrkwje kazy“, jako přičinu za wotpóznaće čłonstwa w cyrkwinskej radźe mjenowali. Konkretne organizacije pak we wólbnym porjedźe naspomnjene njejsu. Dokelž „měri so předźěłany wólbny porjad zasadnje přećiwo kóždej formje ekstremizma“, wuzběhny Baudisch. W internetnje přistupnych materialijach k wólbam su pak wotpowědne dokumenty konferency biskopow Němskeje zalinkowane. Tak móža so kandidaća we wozjewjenjomaj „Ekstremistiske nastajenja a sobudźěło w gremijach wosady so njehodźitej“ a „Ludowy nacionalizm a křesćanstwo njejstej zjednoćomnej“ dokładnje informować.
Strach před podróšenjemi
Berlin (dpa/SN). Po tym zo mějachu w Bangladešu w zašłych tydźenjach krawne protesty, starosća so modowa branša w Němskej nětko wo z toho wurosćace problemy. Bangladeš je mjenujcy druhi najwjetši partner importa drastow do Němskeje. 2023 dowožowachu twory z hódnotu někak 7,1 miliardow eurow do kraja. Strach nětko hrozy, zo bywaja drasty w kupnicach dróše.
Duelej přihłosowałoj
Washington/Palm Beach (dpa/SN). Kandidataj za zastojnstwo prezidenta USA Donald Trump a Kamala Harris chcetaj so w septembrje prěni raz w telewiziji duelěrować. Telewizijny sćelak ABC, kotryž budźe duel wusyłać, zdźěli, zo staj wobaj do debaty 10. septembra přizwoliłoj. Termin běštaj sej do toho hižo Trump a Joe Biden wotrěčałoj, nětko pak je Harris naslědnica a Trump njebě so dołho wuprajił, hač so přiwšěm na debaće wobdźěli.
Nadpad Ukrainy na lětanišćo
