Budyšin (SN/at). Rada za serbske naležnosće Sakskeje ma za trěbne, swójske organizatoriske skutkowanje polěpšić. Tohodla namjetuje sakskemu parlamentej změnu w paragrafje 36a jednanskeho porjada Sakskeho krajneho sejma nastupajo wobdźělenje serbskeje rady.

Wšitke zamołwite wuběrki krajneho sejma maja k zakonskim naćiskam nastupajo zajimy našeho ludu serbsku radu słyšeć. Po dotalnym rjadowanju pak měješe sej to rada žadać. „Kubłanski wuběrk je to hižo praktikował. Wšitke wuběrki pak měli po tym postupować.“, rjekny předsydka rady Marja Michałkowa. Tohodla je gremij na swojim wčerawšim posedźenju w Budyšinje namjet sformulował, słowje „na žadanje“ z dypka 3, paragrafa 36a jednanskeho porjada šmórnyć. Michałkowa je namjet dźensa do Drježdźan zapodała. Tak budźe sčasom předležeć, zo bychu jón zapřijeli do naćiska jednanskeho porjada za 7. wólbnu periodu, kotryž ma nowy Sakski krajny sejm na swojim konstituowacym posedźenju 1. oktobra wobzamknyć.

Doniž nowa rada wuzwolena njeje, so dotalna dale w Budyšinje schadźuje.

Saarbrücken (dpa/SN). Tři měsacy po tym zo je so Andrea Nahles jako nawodnica SPD zastojnstwa wzdała, přewjedźechu dźensa w Saarbrückenje prěnju z cyłkownje 23 regionalnych konferencow, na kotrychž maja so móžni naslědnicy bazy strony předstajić. Mjez nimi je tež Budyski wyši měšćanosta Alexander Ahrens, kiž zhromadnje z Flensburgskej koleginu Simonu Lange wo hłosy čłonow wabi. Po konferencach prašeja so sobustawow online abo z listom, w decembru chcedźa wo nawodnistwje rozsudźić.

Pjenjezy za murju dóstał

Washington (dpa/SN). Ministerstwo za zakitowanje w USA je po rozprawach medijow prezidentej Donaldej Trumpej ně­hdźe 3,6 miliardow dolarow za twar murje k Mexiku přewostajiło. Pjenjezy su wzate z cyłkownje 127 hižo wobzamknjenych projektow a maja za 280 kilometrow murje dosahać. Demokraća postupowanje jako njezamołwite wótrje kritizuja, dokelž rani prawo wo rozrjadowanju budgetow a škodźi narodnej wěstoće.

Proša Angelu Merkel wo pomoc

Waršawa (dpa/SN). Dwaj dnjej po wopominanju wudyrjenja Druheje swětoweje wójny we Waršawje je społnomócnjeny pólskeho knježerstwa za reparacije Arkadiusz Mularczyk žadanje swojeho kraja za wotškódnjenjom potwjerdźił. Němska njeje Pólsku hač do dźensnišeho za škody we wójnje wotrunała, rjekny Mu­larczyk wčera sćelakej TVP Info. Njedosaha, wo wodaće prosyć a winu za złóstnistwa přiznać. „Za škody dyrbi so Pólskej płaćić. Na to budźemy konsekwentnje dopominać.“

Na wopominanskich swjatočnosćach 1. septembra składnostnje nadpada němskeje Wehrmachty na Pólsku, štož bě zdobom spočatk Druheje swětoweje wójny, bě zwjazkowy prezident Frank-Walter Steinmeier we Wielunje a Waršawje Pólsku wo wodaće za teror Němskeje we wójnje prosył.

London (dpa/SN). Britiski premierminister Boris Johnson chce próstwu wo nowowólby zapodać, jeli jemu zapósłancy zadźěwaja, za brexit bjez zrěčenja so zasadźić. Johnson chce tak mjenowany no-deal-brexit na zakładźe zakonja zakótwjeny měć. Chaos je nětko perfektny, dokelž započa parlament wčera bjez při­zwolenja knježerstwa wo zakonju jednać, na zakładźe kotrehož móžno njeje hač do 31. oktobra EU wopušćić, njepředleži-li EU žane zrěčenje. Planowany zakoń předwidźi, zo ma Johnson próstwu wo přesunjenje brexita zapodać, njeje-li hač do 19. oktobra wotpowědne zrěčenje ratifikowane. Próstwje měło potom wšitke tamne 27 statow EU přihłosować. Johnson pak nochce dalše dlijenje a nadźija so nowowólbow. Hišće dźensa wječor móhli zapósłancy parlamenta wo próstwje britiskeho premiera wothłosować, štož budźe ćežko. Wčera wječor je konserwatiwny zapósłanc Phillip Lee z pro­testa přećiwo politice Johnsona brexita dla frakciju knježerstwa demonstratiwnje wopušćił a so opoziciji přizamknył.