Na wšě dźesać lět bjez jězbneje dowolnosće po puću był je 66lětny ze swojim awtom w Bayerskej. Policisća zadźeržachu šofera sobotu njedaloko Neuburga nad Innom w Passauskim wokrjesu, zo bychu jeho kontrolowali. Jako tón jězbnu dowolnosć při sebi njeměješe, započachu zastojnicy dokładnišo slědźić. Při tym so wukopa, zo dyrbješe muž před dźesać lětami papjery wotedać, dokelž bě pjany z awtom jěł. Nětko dyrbi ze sudniskej skóržbu ličić.
60. narodniny telewizijneho pěskowčika swjećachu kónc tydźenja w Babelsbergskim filmowym parku. Mjez gratulantami bě tójšto přećelow małeho mužika z běłej brodu a čerwjenej čapku, kaž pitiplač a liška. Dźěći w kostimje pěskowčika mějachu darmotny zastup do parka. Woblubowaneho pěskowčika pokazuja wot nowembra 1959 w telewiziji.
Brasília/Paris (dpa/SN). Brazilski prezident Jair Bolsonaro francoskeho prezidenta Emmauela Macrona toho wuprajenjow k lěsnym wohenjam w Amaconasu raznje kritizuje. Wón wumjetuje Macronej „kolonialistisku mentalitu“. Francoski prezident chcył na wjerškowym zetkanju G7 w Biarritzu wo wohenjach rěčeć, bjeztoho zo bychu potrjechene kraje regiona pódla byli. Zahubne wohenje mjenowaše Emmanuel Macron „mjezynarodnu krizu“.
Mjezsobne wumjetowanja
New York (dpa/SN). Ruska je USA najnowšeho testa rakety dla wótrje kritizowała. Postupowanje Washingtona wohroža mjezynarodnu wěstotu, rjekny zastupowacy wulkopósłanc Dmitrij Poljanski wčera w Bjezstrašnostnej radźe UNO. „Smy wšitcy jenož krok wot noweho napřemobrónjenja zdaleni, kotrež njemóže nichtó kontrolować a regulować. Njeńdźe wo mjenje hač wo eksistencu čłowjestwa.“ Wulkopósłanc USA Jonathan Cohen pak Ruskej wumjetowaše, zo je z nowymi brónjemi zrěčenje INF raniła.
Žně žita lětsa podpřerězne
Drježdźany (dpa/SN). Organizacije ze Sakskeje a wšeje Němskeje hotuja so na demonstraciju „Njedźělomne“ za wotewrjenu a swobodnu towaršnosć jutře w Drježdźanach. „Wočakujemy wjacore dźesaćtysacy protestowacych“, rjekny Felix Müller, jedyn z rěčnikow zwjazkarstwa, powěsćerni dpa. Wosebitej ćahaj, z kotrymajž přijědu wobdźělnicy z Berlina, běštej hižo srjedu wuknihowanej.
„Njedźělomne“ je zwjazkarstwo iniciatiwow, kotrež so přećiwo rasizmej a za runoprawnu towaršnosć zasadźeja. Po informacijach zarjadowarjow něhdźe 400 organizacijow namołwu k demonstraciji jutře připołdnju podpěruje, mjez nimi 200 iniciatiwow ze Sakskeje. Wobdźěleny je tež třěšny zwjazk sakskeje organizacije migrantow DSM, kotryž swojich čłonow za demonstraciju mobilizuje.