Za 120 000 ludźi šćěpiwo skazali
Drježdźany (dpa/SN). Sakska wočakuje nětko w februaru šćěpiwo pře koronawirus za 120 000 ludźi. „Pola firmy Biontech smy 157 000 dozow, pola Astrazeneca 74 000 a pola Moderna 13 200 dozow skazali“, je sakske socialne ministerstwo wčera na naprašowanje medijow zdźěliło. Cyłkownje liči swobodny stat z 244 200 dozami seruma a tak z wjace hač poprawom připowědźene. Po staršim stawje planowanja bě dodawanje 136 000 dozow předwidźane.
Po informacijach ministerstwa je wot zahajenja šćěpjenja 27. decembra 88 576 ludźi w Sakskej prěnju sykawu dóstało a 16 322 mjeztym tež druhu. Socialne ministerstwo swobodneho stata potwjerdźi, zo njeje rozdawanje terminow tuchwilu dospołnje přetorhnjene. Njejsu-li mobilne šćěpjenske mustwa abo šćěpjenske centrumy serum w běhu dnja přetrjebali, přińdu hnydom nowe terminy do knihowanskeho systema. Dyrbjało-li hišće wjace šćěpiwa k dispoziciji być, móhli hnydom tež wjace terminow šćěpjenja rozdawać. Hłowne ćežišćo pak je přeco hišće zastaranje wobydlerjow starownjow a hladarnjow ze serumom.
To a tamne (02.02.21)
Dwě městnje za lět do kosmosa we wobłuku prěnjeje ryzy priwatnje płaćeneje swětnišćoweje misije „Inspiration 4“ wulosuje ameriski milionar Jared Isaacman. Raketa ma hišće lětsa wotzběhnyć. Wuměnjenje wobdźělenja je, zo nazběraja zajimcy hač do kónca februara znajmjeńša 200 milionow US-dolarow. Te chce Isaacman klinice St. Jude Children’s Research Hospital, specializowanej na wuslědźenje a hojenje raka pola dźěći, darić.
Z nožom w ruce je sej pacient w Konstanzu nad Bodamskim jězorom srědk přećiwo bolosćam zubow žadał. 40lětny bě wčera rano z wulkimi bolosćemi do praksy přišoł, jako tam lěkar hišće njebě. Wón prošeše 20lětneho přistajeneho praksy wo srědk. Jako tón na to pokaza, zo smě jón jenož lěkar wupisać a zo dyrbjał muž radšo k nuzowej słužbje hić, wućahny pacient nóž. Sobudźěłaćer móžeše so jemu wuwinyć, muž pak ćekny. Policija móžeše jeho krótko po tym zajeć.
Bamž chwali žurnalistow
Vatikan (B/SN). Nimo chwalby wupraja so bamž tež k strachej pohubjeńšaceje so kwality přinoškow ze stron žurnalistow. „Hdyž žurnalisća sej hižo swoje póduše njewotběhaja a so wjace z ludźimi njezetkawaja a jenož jedyn wot druheho kopěruja“, je to strašne wuwiće. Na cyrkwinskim swětowym dnju za komunikaciske srědki 24. januara chwaleše Franciskus njebojaznych a zmužitych žurnalistow, kotřiž so za demokratiju, za słabych a přesćěhanych zasadźeja.
Zakazać jadrowe brónje
Bonn (B/SN). Jako „wulku kročel doprědka do swěta bjez atomowych bróni“ je zamołwity za měr Ewangelskeje cyrkwje w Němskej Renke Brahms, zrěčenje UNO wo zakazu jadrowych bróni mjenował. „Mjez křesćanami z cyłeho swěta knježi přezjednosć, zo maja so wšitke atomowe brónje zničić. Woni su kruće přeswědčeni, zo njehodźa so atomowe brónje hižo wusprawnić.“ Dojednanje su lěta 2017 cyłkownje 53 krajow swěta pola UNO w New Yorku podpisali. Pjeć oficialnych atomowych mocow USA, Ruska, China, Francoska a Wulka Britaniska pak je dale wotpokazuja. Tež Němska njeje zrěčenju hišće přihłosowała.
Ćěkancy su podobizny Boha
Nowe protesty za Nawalneho
Moskwa (dpa/SN). Po nowych masowych protestach za zajateho kritikarja Krjemla Alekseja Nawalneho z tysacami zajatych namołwja toho mustwo k dalšim demonstracijam. Jutře měli ludźo opozicionelneho před sudnistwom w Moskwje podpěrać. Tam póńdźe wo to, pruwowanski čas přećiwo Nawalnemu na woprawdźitu jatbu změnić. 44lětnemu hroža wjacore lěta jastwa. Demonstranća su sej wčera w něhdźe sto městach Ruskeje žadali jeho pušćić.
„Taflowe slěbro“ předać?
Berlin (dpa/SN). Městopředsyda frakcije SPD Sören Bartol je so přećiwo tomu wuprajił, wobdźělenje stata koronakrizy dla předać. Wotpowědny namjet bě zwjazkowy minister za hospodarstwo Peter Altmaier (CDU) předpołožił. Wón bě nowinarjam rjekł, zo su wobdźělenja stata na přikład pola Němskeho pósta abo Telekom šwarnu hódnotu docpěli. „Taflowe slěbro“ předać by statej miliardy eurow wunjesło. Pjenjezy by kraj za inwesticije do přichoda derje trjebać móhł.
Spřećiwjeja so postajenjam
Wosrjedź bulwara Kröpelinskeje dróhi w Rostocku su dźensa ...
EU zasudźa wojerski puč
Brüssel (dpa/SN). Europska unija wojerski puč w aziskim Myanmaru raznje zasudźa a sej žada zajatych ludźi hnydom pušćić. Wuslědk wólbow měli respektować, rjeknyštaj społnomócnjeny EU za wonkowne naležnosće Josep Borrell a prezident Rady EU Charles Michel dźensa rano w Brüsselu. Borrell přilubi ludźom w kraju swoju podpěru. „Myanmarski lud chce demokratiju. Europska unija je jemu poboku. Tež generalny sekretar UNO António Guterres přewzaće mocy přez wójsko wótrje šwika.
Wójsko w Myanmaru bě minjenu nóc ciwilne nawodnistwo kraja wotsadźiło a lěto trajacy wuwzaćny staw wukazało. Napjatosće mjez ciwilnym knježerstwom a mócnym wójskom běchu so minjeny čas přiwótřili. Nawodnistwo wójska bě zdźěliło, zo wuslědk nowembergskich wólbow parlamenta wólbneho wobšudnistwa dla njepřipóznawa. Demokratiske mocy wokoło wodźaceje politikarki Aung San Suu Kyi běchu wólby dobyli. Nowy parlament chcyše so poprawom dźensa prěni króć schadźować.
Spahn: Přewjele njewočakować
Zwjazkowa kanclerka zetka so z ministerskimi prezidentami šćěpiwa dla
Berlin (dpa/SN). Do dźensa planowaneho wjerškoweho zetkanja šćěpjenja dla je zwjazkowy minister za strowotnistwo Jens Spahn (CDU) před přehnatymi wočakowanjemi warnował. „Njemóžemy z jednym wjerškom samym hižo wjace šćěpiwa produkować“, rjekny wón wčera nowinarjam. Wažne je spóznać, hdźe su woprawdźite ćeže.
Tež zwjazk němskich farmapředewzaćow njeliči ze spěšnym rozrisanjom. „Fabrika za serum njeje žadyn knižny regal z wobchoda, kotryž móžeš spěšnje natwarić, rjekny prezident Zwjazka slědźacych producentow lěkow Han Steutel. „By-li to tak jednore było, bychmy to dawno činili.“
To a tamne (01.02.21)
Ani helikopter wuchowanskeje słužby njebě małemu Martinej Timotheusej ze Sewjerorynsko-Westfalskeje spěšny dosć: Hólc so narodźi, jako so helikopter z něhdźe 200 km/h Osnabrückskej chorowni bližeše. Helikopter běchu pósłali, dokelž bě 24lětna mać něšto dnjow prjedy hač planowane hrona dóstała. Mandźelski dyrbješe z awtom ke chorowni jěć, dokelž njebě w mašinje městna. Jako tam dojědźe, bě wón hižo nan. Ćěšenk a mać staj strowaj. Posledni porod w helikopteru mějachu 1992 w Mnichowje.
Prózdny tank je šofera nakładneho awta direktnje do jastwa wjedł. Lkw bě na awtodróze A 9 njedaloko bayerskeho Hofa stejo wostał. Policisća jón zawěsćichu a papjery šofera kontrolowachu. Při tym zwěsćichu, zo 52lětneho z wukazom zajeća pytaja a dowjezechu jeho do jastwa. Nakładne awto dyrbjachu wotwlec, dokelž njehodźeše so wjace startować.
Mnozy maja wulke wobmyslenja
Rada za serbske naležnosće Sakskeje je wčera swoje prěnje wuradźowanje lěta 2021 digitalnje wotměła.
Budyšin (SN/JaW). W srjedźišću wuradźowanja serbskeje rady Sakskeje stejachu přewažnje aktualne kubłanske temy, kaž w nowinskej informaciji rěka. Jedna so wo naležnosće, „kotrež jewja so w płaćiwym koaliciskim zrěčenju Sakskeje“, pisa čłon gremija Julian Nyča.
Fuzija zwoprawdźena
Paris (dpa/SN). Francoski twarc železniskeje techniki Alstom a železniska wotnožka kanadiskeho koncerna Bombardier stej dźensa dołho přihotowanu fuziju zwoprawdźiłoj. Tak nastanje druhi najwjetši koncern branše po wšěm swěće, za chinskim gigantom CRRC. Koncern ma dohromady 74 000 přistajenych. Z fuziju je tež přichod zawodow w Budyšinje z 1 000 a w Zhorjelcu z 800 sobudźěłaćerjemi zaručeny.
Jednotne čisło wobzamknjene
Berlin (dpa/SN). Tuchwilne dawkowe identifikaciske čisło ludźi ma přichodnje daloko sahace wobydlerske čisło być a zarjadnistwam přistup k datam ludźi w druhich institucijach zmóžnić. To je Němski zwjazkowy sejm wčera wobzamknył. Dyrbjała-li Zwjazkowa rada přihłosować, ma dawkowe čisło přichodnje w 50 dalšich městnach składowane być, na přikład w registrach přizjewjenja, jězbneje dowolnosće abo bróni. Potrjecheni pak dyrbja přihłosować. Opozicija je přećiwo zakonjej hłosowała a chce pruwować, hač rjadowanje wustawu rani.
Ličba infekcijow woteběra
