Litawska a politika na Lipšćanskich knižnych wikach
Lipsk (SN/CoR). Wjace hač 2 200 wustajerjow z Němskeje a wukraja předstaji wot 23. do 26. měrca na Lipšćanskich knižnych wikach najnowšu literaturu, mjez nimi tež Ludowe nakładnistwo Domowina (SN rozprawjachu). Nalětnje zetkanje knižneje a medijoweje branše wabi lětsa znowa lubowarjow literatury ze swjedźenjom „Lipsk čita“. 3 300 sobuskutkowacych přeproša na něhdźe 3 400 zarjadowanjow. Dohromady natwarja za to 571 jewišćow – 411 w měsće a 160 na wikowym terenje.
Wo aparaturach, kwasach a tragiskich dóńtach
Budyšin (SN/CoR). Něhdźe 40 hosći witaše direktorka Budyskeho Serbskeho muzeja Christina Boguszowa wčera w swojim domje na knižnej premjerje wobrazoweju zwjazkow k wuspěšnej wustajeńcy historiskich fotografijow „Wotmolowane – Mit Licht gemalt“. Dotal je sej 2 300 ludźi přehladku wo započatkach fotografije we Łužicy wobhladało. Hač do kónca přichodneho tydźenja je wustajeńca hišće přistupna.
Jednaćelka Ludoweho nakładnistwa Domowina Marka Maćijowa přepoda wčera – jónu Hornjej, jónu Delnjej Łužicy wěnowacej so – knize „Wotmolowane – Mit Licht gemalt“ wudawaćelej Jürgenej Maćijej kaž tež awtorkam Andreji Pawlikowej, dr. Mariji Měrćinowej, Dorje Liersch, Martinje Nowakojc a Ines Neumannojc. Nimo toho dźakowaše so wuhotowarce Isy Bryccynej a lektorce Katrin Čornakec. Před dźesać lětami bě LND rjad zwjazkow historiskich čornoběłych wobrazow pod nawodom Budyskeho fotografikarja Jürgena Maćija zahajiło. „Zo staj runje zwjazkaj z najstaršimi wobrazami barbnej, ma wěstu ironiju“, Marka Maćijowa zwurazni.
Jan Hempel
Jónkrótne wubědźowanje
Nawoda nakładnistwa Theater der Zeit Harald Müller wo „Lausitzen“
Loni běchu Němsko-Serbske ludowe dźiwadło Budyšin, Statne dźiwadło Choćebuz a Nowe jewišćo Zły Komorow prěni raz wubědźowanje „Lausitzen“ wupisali. Pytachu ideje za dźiwadłowe hry, kotrež so z Delnjej a Hornjej Łužicu rozestajeja. 21 awtorow so wobdźěli. 15. januara su dobyćerjow – Ralpha Oehmu z hru „Lausitzer Quartiere oder der Russe im Keller“ a Křesćana Krawca kaž tež Lipšćansku režiserku Carlu Niewöhner ze spěchowanskim mytom za hrě „Eine Aktentasche voll Geld“ a „Das leere Haus“ – wuznamjenili. Nawoda nakładnistwa Theater der Zeit Harald Müller bě nimo intendantow wobdźělenych dźiwadłow a Jurja Kocha čłon jury. Cordula Ratajczakowa je so z nim rozmołwjała.
Kak sće so stał z čłonom jury wubědźowanja „Lausitzen“?
Dwě cyle rozdźělnej kulturje so zetkałoj
„Chceće-li nahrawanje koncerta Noweje Łužiskeje filharmonije woměrje doma wobhladać, wopytajće nas na našim YouTube-kanalu“, wabi Nowa Łužiska filharmonija na internetnej stronje. Wojerowčenjo pak su jeje 4. filharmoniski koncert radšo originalnje dožiwić chcyli. Prawy to rozsud!
Tři jejka su dobre wuměnjenje
Spěchowanski kruh za serbsku ludowu kulturu přewjedźe tež lětsa zaso wubědźowanje wo najrjeńše jutrowne jejko. Je to mjeztym 64. akcija tohole razu, kotraž so na dorosćenych runje tak kaž na dźěći a młodostnych wusměrja a wšitkich zajimcow namołwja, tradicionalny nałožk dale pěstować a wuwiwać.
Budyšin (SN/CoR). Hdyž budźe čas pisanych kostimow po póstniskim wjeršku přichodny tydźeń nimo, započnje so potom zdobom čas pisanych jutrownych jejkow. Štóž chce so wobdźělić na wubědźowanju wo najrjeńše serbske jutrowne jejko, ma so jako dorosćeny nětko pomału do spěcha měć. Wšako je posledni termin wotedaća kolekcijow – kaž přeco – pjatk po popjelnej srjedźe, potajkim 3. měrc. Dźěći a młodostni hač do 24 lět maja hišće tróšku chwile, woni móža woměrje dojutrowny čas wužić a swoju wušiknosć při debjenju jejkow wupruwować. Srjedu po jutrach maja wone wotedate być, w Budyšinje a Choćebuzu kaž tež w regionalnych běrowach Domowiny a Załožby za serbski lud.
Spožča prěni raz medalju Mättiga
Budyšin (SN/CoR). Dr. Gregoriusa Mättigowa załožba zhladuje mjeztym na dźesaćlětne wobstaće. Wjeršk swjedźenskeho lěta budźe swjatočna Boža słužba w Budyskej tachantskej cyrwki swj. Pětra 24. septembra, kaž załožba zdźěla. Tam chcedźa prěni raz Mättigowu medalju spožčić. Dóstać ma ju Budyšanka Jutta Zoff (*1927), kotraž skutkowaše wot lěta 1967 do 1988 jako soloharfenistka Drježdźanskeje statneje kapały. „Wuměłča je znowazałoženje Mättigoweje załožby wot spočatka podpěrała. Jutta Zoff je so stajnje z Budyšinom, z kulturu a stawiznami města identifikowała“, rozłožuje předsyda załožboweje rady dr. Uwe Koch. Wot Drježdźanjana Petera Götza Güttlera wuhotowana medalja pokazuje nimo napohlada na Budyšin 1620 a namołwy z Mättigoweho testamenta, jeho załožby wobchować a rozšěrić, portrety Philippa Melanchthona, Kaspara Peukera a Gregoriusa Mättiga.
Tež Mättigowy stipendij chcedźa 24. septembra znowa přepodać. Wědomostny dorost móže so hač do 31. meje požadać
Archiwowy dźeń w Ochranowje
Ochranow (SN). Lětuši Ochranowski dźeń archiwa 4. měrca wěnuje so reformaciji składnostnje jeje 500. róčnicy, zdźěli Ochranowska bratrowska wosada. Poćahi mjez njej a lutherskej reformaciju wobswětleja fachowcy z třomi přednoškami. Tak porěči dr. Christian Mai z Jonsdorfa wo wuznamje Lutheroweho septemberskeho testamenta z lěta 1522, kotryž je we wobsydstwje Ochranowskeho archiwa. Dr. Rüdiger Kröger z Hannovera přednošuje wo hrabji Zinzendorfje a reformaciji. Dr. Dietrich Meyer z Ochranowa referuje wo wužiwanju Lutherowych kěrlušow w Ochranowskej wosadźe. Nimo toho rozprawja archiwowa nawodnica Claudia Mai wo lońšej dźěławosći a předstaji lětuši archiwowy projekt. Zajimcy su witani.
Ochranowski archiw je archiw centralnych institucijow Ochranowskeje jednoty cyłeho swěta kaž tež Europskeje prowincy. Štyri lěta po smjerći załožerja Ochranowskeje bratrowskeje wosady Nikolausa Ludwiga von Zinzendorfa běchu 1764 w Ochranowje archiw zarjadowali.
Serbske medije pod čěskej lupu
Předstajenje a wuznam serbskich medijow za Serbow we Łužicy běštej jedyn z hłownych dypkow diskusijneho wječorka Towarstwa přećelow Serbow w Praskim Serbskim seminarje.
