Budyšin (SN/CoR). Jubilejne lěto składnostnje 500 lět reformacije zahaji ewangelsko-lutherska krajna cyrkej Sakskeje z ekumeniskimi swjedźenskimi kemšemi w Budyskej cyrkwi swj. Pětra, a to 6. januara we 18 hodź. Arcybiskop ewangelsko-lutherskeje cyrkwje Ruskeje Dietrich Brauer budźe tam prědować. Tež sakski krajny biskop dr. Carsten Rentzing a nowy­ Drježdźansko-Mišnjanski biskop Heinrich Timmerevers so wobdźělitaj. Po bohosłužbje chcedźa wot krajneje cyrkwje a Swobodneho stata Sakskeje hromadźe wudaty žurnal „Smy tak swobodni – jubilej reformacije 2017“ předstajić. Přizamknje so přijeće ze sakskim ministerskim prezidentom Stanisławom Tilichom (CDU) w Dźiwadle na hrodźe. Dohromady 19 wosebitych zarjadowanjow planuja składnostnje jubileja reformacije w cyrkwinskim wobwodźe Budyšin-Kamjenc.

Serbske wjerški budu premjera wot LND wudateje knihi „Pjeć lětstotkow – Serbja a reformacija“, wotpowědna wustajeńca w Serbskim muzeju a konferenca Serbskeho instituta.

Serbski muzej Budyšin móže so nad nimale 3 000 wjace hosći hač loni wjeselić. Cyłkownje něhdźe 13 460 ludźi je dom na Hrodźe (staw z 18. decembra 2016) lětsa wopytało.

Budyšin (SN/CoR). Dobra bilanca wopytowarskeje statistiki Budyskeho Serbskeho muzeja wotbłyšćuje so tež w ličbje zarjadowanjow. Tak wotměchu tam dohromady 175 zarjadowanjow z kubłanskim pozadkom, porno něhdźe 80 loni je to stopnjowanje wo wjace hač sto procentow. Tak su lětsa 110 króć zajimcow po wustajeńcach wodźili a jim dwanaće přednoškow poskićili. K tomu přińdźe hišće 31 pedagogiskich programow a 22 zarjadowanjow we wobłuku kooperaciskich projektow.

Spokojom zhladuje serbske dźiwadło Budyskeho NSLDź na bilancu lěta 2016. Dohromady je sej 5 766 ludźi 70 předstajenjow dwanaće inscenacijow wobhladało. Wuslědk sezony je tuž porno lońšim 73 předstajenjam ze 6 042 wopytowarjemi nimale stabilny wostał.

Budyšin (SN/CoR). Prěnje městno najwoblubowanišich lětušich inscenacijow dźělitej sej lětsa kruchaj za dźěći a za dorosćenych. Tak wobhlada sej 986 ludźi w šěsć předstajenjach hłownu inscenaciju „Jakni mužojo“ na hłownym jewišću NSLDź a eksaktnje runje telko dźěći třirěčny kruch „Ferkel, hunčo a prosetko“ w 15 předstajenjach na wjacorych městnach. Delnjoserbsce předstajichu hru „Zgubjone a namakane – Ein Herz und andere Dinge“ 826 młodym wopytowarjam na dwanaće předstajenjach. K wjerškam słušeše tež serbska prapremjera krucha Hanki Jenčec „Crux abo Zbóžnik pod łožom“. Režiser Měrko Brankačk bě za hólcow spisanu hru hromadźe z holcami Serbskeho młodźinskeho dźiwadła zdźěłał a inscenował. Na pjeć předstajenjach móžachu 761 hosći witać.