Prěnje štyri cyłki hižo w štwórćfinalu, dźensa sćěhujetej dalšej – Němska hraje jutře w Londonje

Budapest/Sevilla (kh/SN). Čěska narodna wu­bran­ka steji po triumfje 2:0 pře­ćiwo Nižozemskej prěni raz po lěće­ 2012 zaso raz w štwórćfinalu europskich koparskich mišterstwow (EM). Za team Oranje pak su EM zakónčene.

Underdog z Čěskeje je faworizowane hollandske mustwo w Budapesće we wos­mifinalu přewinył. Za chowancow trenarja Jaroslava Šilhavý docpěštaj wrota­ Tomáš Holeš wot Slavije Prahi a Patrik Schick wot Bayera Leverkusen. Za hrajerja zwjazkoweje koparskeje ligi Schicka běchu to štwórte wrota w štwórtej hrě. Čěska nastupi tuž přichodnu sobo­tu w azerbaj­dźanskim Bakuwje přećiwo Danskej wo zaćah do połfinala.

Awtorka dźensa Tereza Wićazowa

Štwórtk, 1. julija, pře­wozmje bywši sławny wrotar-kopar Oliver Kahn nawod předsydstwa FC Bayerna Mnichow. Hač do kónca junija nawjeduje je hišće Karl-Heinz Rummenigge. Staju tuž woprawnjene prašenje: Móže něhdyši profijowy wrotar poziciju managera přewzać? Poprawom je zwisk cyle jasny, dokelž wobsteji wulka podobnosć mjez kmanosćemi, kotrež tež w sportowym wjednistwje trjebaš.

Njedawno čitach zajimawy interview z Renéjom Adlerom, w kotrymž rysuje wón paralele mjez wrotarjom a nawodu sportoweho towarstwa. W słowje „manager“ tči hižo jedyn z wjacorych nadawkow wrotarja: Jako wrotar managuješ resp. orga­nizuješ před sobu mustwo – a to po móžnosći z jasnej, druhdy raznej komu­nikaciju. Tež w sportowym předewzaću je to tak: Tam maš sej prašenje stajić: Kak nastaju mustwo, hdyž konkurent nad­běhuje? Abo runje nawopak? Komu dam zamołwitosć, hdyž mam sam dosć wokoło wuši? W natwarje hry maš bul w ruce. Zawjedźeš hru kaž w sportowym přede­wzaću na přikład nowe projekty.

Z chětro wulkej porciju zboža je so němske narodne mustwo tola hišće do wosmifinala europskich koparskich mišterstwow „kopoliło“. To je mnohich fanow zawěsće tójšto čuwow płaćiło. Tónle posudk sej dowolam, byrnjež wuwołany eksperta njebył. Wjacori fanojo pak su mi moje hódnoćenje potwjerdźili. Dotalne wukony němskeho mustwa na turněrje mje tak prawje njepřeswědčeja. W prěnjej kaž tež třećej hrě mějach samo zaćišć, zo je na trawniku skerje mjetańca, jenož zo su sej bul z nohu přihrawali. Parował sym tež jasniše a strašne nadběhi Němcow na wrota přećiwnikow. Ale swarjeć ničo njewunjese. Wšako mamy tele dny w Němskej přibližnje 80 milionow ekspertow kopańcy. Štož pak nichtó prěć njebudźe, je, zo dyrbi so němska wubranka chětro napinać a so jasnje stopnjować, chce-li na EM woprawdźe hišće wuspěch žnjeć. Wutoru wječor w šesćich čakaja na nju najprjedy raz Jendźelčenjo. To budźe zawěsće napjata hra. Janek Wowčer

London (kh/SN). Skupinska faza europskich mišterstwow w kopańcy je po cyłkownje štyrnaće hrajnych dnjach zakónčena. Jutře nětko du mišterstwa do horceje fazy, w kotrejž njesmědźa sej mustwa žadyn zmylk wjac dowolić, tež němske nic.

Po wulkim dyrkotanju přećiwo Madźarskej wjeseli so němska wubranka nětko na hrajersce sylnych Jendźelčanow we wosmifinalu. Zwjazkowy trenar Joachim Löw rjekny, zo budźe hra přećiwo Jendźelskej cyle hinaša. K zazběhej nastupichu Němcy najprjedy přećiwo hłuboko stejacym Francozam a naposledk zasakłym Madźaram – tak sylnu sej swoju skupinu poprawom předstajili njeběchu. Jeničce Španičenjo mějachu z přerěznje 68,7 procentami wjace hrajnych podźělow hač chowancy Joachima Löwa. Tak je tež kapitan Manuel Neuer optimistiski, zo budźe wosmifinalna partija we Wembleyju wo wjele wotewrjeniša. Hdyž Madźarojo hišće z dźesać hrajerjemi w šěsnatce stejachu a wšitko začinichu, budu Jendźelčenjo dyrbjeć doma doprědka hrać a bul běžeć dać, štož Němcam zawěsće do „kartow hraje“.