Titul so zadani
To a tamne (15.08.25)
Mortwy hołb je w Berlinje-Hellersdorfje wulke zasadźenje policije zawinił. Swědcy su policiju wołali, dokelž běchu wutřěle słyšeli, na čož je mortwy hołb do jich dwora padnył. Bórze so tam wjele zastojnikow nawali a z dowolnosću sudnika so do bydlenja pozdatneho třělca zadobychu. Tam drje municiju za powětrowku namakachu, ale ani brónje abo čłowjeka. Pozdźišo pak wobydler tutoho bydlenja na policajsku staciju přińdźe, zo by sej swój kluč wotewzał. Twjerdźeše, zo je hołbja z katapultom wottřělił. Policija naležnosć nětko přepytuje.
Za tři měsacy so w Němskej sezona hodownych wikow zahaji. Město Drježdźany so hižo za jědlu abo šmrěkom rozhladuje, kiž móhli na wiki stajić. Štom měł něhdźe 23 metrow wysoki a runje zrosćeny być.
Što sej z toho sobu wozmjemy?
Sep mysli po lětušim CSD w Budyšinje
Naš Budyšin je pisany! Jasny to signal, kotryž su zašłu njedźelu tysacy demonstrantkow a demonstrantow wusyłali. Z tym su so trendej w cyłej Němskej přizamkli. W Sakskej na přikład běchu w lěće 2020 runje štyri zarjadowanja pod hesłom CSD. Dźensa, pjeć lět pozdźišo, je jich hižo 20 na lěto. Towaršnosć je wočiwidnje wotewrjeniša, pisaniša, tolerantniša. A třeći CSD w Budyšinje je pokazał, zo zamóže zarjadowanje za prawa queernych samo tysacy ludźi na dróhi městačka wołać. Při tym je demonstracija CSD w Budyšinje pokazała, zo je zarjadowanje wuslědk synergije wjacorych prudow progresiwneje towaršnosće. Tule zjednoćeja so mjenujcy politiske lěwicarske ideale, kaž prawa mjeńšinow, z wojowanjom přećiwo přiběracym prawicarskim strukturam, wosebje na wuchodźe Němskeje. Zarjadowanja, kotrež steja eksemplarisce za wotewrjenu a inkluziwnu towaršnosć, dožiwichu zašłe lěta a dožiwjeja dźensa přiběrajcy tak mj. prawicarski backlash – skutki abo wuprajenja, kotrež so přećiwo zarjadowanjam kaž swjedźenjam pisanosće a podobnym měrja.
Rozprawa rady nětko online
Drježdźany/Budyšin (SN). Štóž chce so z dźěławosću sakskeje serbskeje rady bliže zeznajomić, ma dobru składnosć: Wutoru na wuradźowanju gremija w krajnym sejmje je předsyda rady Dawid Statnik na to skedźbnił, zo je rozprawa rady za dobu 2023/2024 nětko jako ćišćenka parlamenta přistupna. Pod čisłom 3769 wosmeje wólbneje periody móžeće sej ju w dokumentaciji sakskeho sejma wotwołać (zapodajće hesło: edas). Rozprawa we wobjimje dźesać stron so tež w serbšćinje jewi.
W zašłymaj lětomaj je so rada pod nawodom Marka Sucheho 22 króć zešła. Rozprawa informuje wo poručenjach tutoho poradźowaceho gremija a tež wo zhromadnym dźěle z Domowinu, Serbskim sejmom a braniborskej serbskej radu. Gremijej přisłušeše tehdom Chróšćanski wjesnjanosta Marko Kliman. Runja Markej Suchemu wón w aktualnej wólbnej periodźe z čłonom rady njeje. Diana Šołćina a Julian Nyča w njej dale skutkujetaj kaž tež Dawid Statnik. Předsyda Domowiny je zdobom zastojnstwo předsydy serbskeje rady přewzał. Nowaj čłonaj staj Jan Ryćer a Stefan Anders.
Nadal z powětra pomhaja
Berlin (dpa/SN). Zwjazkowa wobora je při lětach nad Gazaskim pasmom dotal 192 tonow tworow jako pomoc ludnosći z padakami na zemju pušćiła. Cyłkownje organizowachu 18 lětow, zdźěli rěčnica zwjazkoweho zakitowanskeho ministerstwa w Berlinje. Zwjazkowa wobora budźe ze swojej zhromadnje z druhimi statami organizowanej pomocu znajmjeńša hišće tydźeń pokročować.
Wukony jenož hišće jako kredit
Berlin (dpa/SN). Dwaj krajnaj radźićelej SPD z Durinskeje sej žadataj, zo maja požadarjo azyla, kotřiž su połnolětni a připóznaći ćěkancy, kaž tež wukrajnicy, kiž njepochadźeja z kraja EU, socialne wukony jenož hišće jako požčonku dóstawać. „Štóž do našeho kraja přińdźe a tu dotal do socialneje kasy płaćił njeje, smě socialne wukony jenož hišće jako kredit bjez danje dóstawać“, praji krajny rada wokrjesa Nordhausen Matthias Jendricke w magacinje „Stern“. Fungować ma kredit podobnje kaž Baföga za studowacych: Štóž spěšnje dźěło přiwozmje, trjeba jenož dźěl přijimanych wukonow wróćo płaćić.
Tafla w chětro nuzy
Čłonojo Grjekskeje dźěłaćerskeje fronty PAME su dźensa ...
Žadaja sejwjace mzdy
Měna bitcoin dale a woblubowaniša
Trump do zeńdźenja Putinej hrozył
Washington/Berlin/Kijew (dpa/SN). Do jutřišeho wjerška w Alasce, hdźež so prezident USA Donald Trump zeńdźe z ruskim prezidentom Wladimirom Putinom knježi wulka nadźija, ale tež strach. Europske staty a zastupjerjo Kijewa drje sobu za blidom njesedźa, za kotrymž budźe so wo wójnje w Ukrainje wuradźować. Wčera pak su Trumpej sposrědkowali, što měło z jich wida poselstwo Putinej być. Prezident USA bě Putinej hižo do toho z „jara wulkimi konsekwencami“ hrozył, jeli so statny šef Ruskeje za skónčenje wójny njezasadźi, kotruž bě sam přikazał. „Puć k měrej njemóža bjez Ukrainy postajić, a jednanja změja jenož wuslědk, hdyž knježi přiměr“, ukrainski prezident Wolodymyr Zelenskyj potwjerdźi. W tym su sej podpěraćeljo Ukrainy w tak mjenowanej koaliciji zwólniwych přezjedni, pisaše wón na platformje X.
Ze zwjazkowym kanclerom Friedrichom Merzom (CDU) je so Zelenskyj wčera z Berlina sem wobdźělił na widejowej konferency tutoho zwjazka z něhdźe 20 krajemi a Trumpom.
Chcedźa ličbu wjelkow regulować
EU je škitny status rubježneho zwěrjeća wobmjezowała – prěnje kraje reaguja
Innsbruck/Bozen/Podstupim (dpa/SN). Wjelk je tema, wo kotrymž so ludnosć wadźi. Někotři maja rubježne zwěrjo za wažny dźěl přirody, druzy měnja, zo wužitne zwěrjata a čłowjeka wohrožuje.
Njedawno je so na runinje EU škitny status wjelka změnił, čehoždla je hońtwa we wěstych padach nětko móžna. Jelizo dźe po awstriskim zwjazkowym kraju Tirolu, ma so wjace wjelkow zatřělić. Zaměr měł być, rubježne zwěrjo regularnje z lětnej kwotu likwidować, zwurazni nětko ministerski prezident Tirola Anton Mattle (ÖVP). Awstriski ratarski minister Norbert Totschnig (ÖVP) ma rozsud EU za prawy puć. „Njeńdźe jenož wo burow w horach, kotrychž wowcy wjelki zakusaja.“ Wjelk je so tež hižo do sydlišćow a na hrajkanišća zadobył. W Awstriskej wukonjeja ratarjo a turistiske hospodarstwo wulki ćišć, zo so něšto přećiwo wjelkam čini. Hórske łuki, na kotrychž kruwy, wowcy a kozy plahuja, su hospodarsce wuznamne a tež powabk za turistow.
