Haj wšak, tajkich ludźi je: Muž a žona z wysokej pensiju a bjez dźěći, kotrajž po komodnym žiwjenju za pisanskimaj blidomaj zarjada abo ministerstwa jednu křižnu jězbu po druhej absolwujetaj – a lětdźesatki dołho po cyłym swěće hejsujetaj, wšako bywaja tajcy zastojnicy wo wjele starši hač na přikład muler. Štó njeby jimaj winowatostne socialne lěto popřał? Přerězny wuměnkar pak spjelnja hižo wjelelětne socialne winowatosće ze swojimi wnučkami a prawnučkami, a hustodosć skutkuje tež w towarstwach, kotrychž předsydstwo bjez čestnohamtskich rentnarjow hižo dźěłało njeby. A hdyž bě Angela Merkel 2015 prajiła „My to zdokonjamy“, je so integracija wjele ćěkancow jenož radźiła, dokelž su ludźo na wuměnku jim wšědny dźeń ze skutkom a radu poboku byli. Mjeztym dale a wjac starych wšědnje kiprych a dementnych sobučłowjekow hlada. Tohodla njeje žadanje za socialnym lětom rentnarjow jenož lózyskosć – zwoprawdźenje by našej towaršnosći škodźało. Marcel Brauman

Błysk je w Nowej Wsy w gmejnje Sprjewiny Doł wulku škodu naparał. Kaž Zhorjelska policajska direkcija zdźěli, bě błysk sobotu popołdnju do štoma zrazył, a tón bě na to na chěžu a garažu padnył. Zranił so při tym nichtó njeje. Policija wěcnu škodu na něhdźe 100 000 eurow trochuje. Policisća běchu najprjedy z toho wuchadźeli, zo bě błysk do chěže zrazył a woheń zawinił.

Nowy swětowy mišter hraća na powětrowej gitarje pochadźa z Finskeje. Aapo „The Angus“ Rautio bě sej titul pjatk wječor w swojim ródnym kraju w měsće ­Oulo zdobył. Z triumfom 25lětneho hudźbnika a filmowca je Finska tute wólberne wubědźowanje prěni raz po lěće 2000 dobyła, zdźěla zarjadowarjo. Swětowe mišterstwa wuhotuja hižo wot lěta 1996. Wone su dźěl festiwala, kotryž zarjaduja kołowokoło města Oulo.

Drježdźany (dpa/SN). Kartku za zapłaćenje, kotruž maja ćěkańcy po cyłej Němskej wužiwać, w Sakskej hišće wšudźe zawjedli njejsu. W Drježdźanach, Lipsku a Kamjenicy tole hišće planuja. Tři wokrjesy maja dotal hišće swójske rjadowanje, w přichodźe pak dyrbja tohorunja kartku Zwjazka wužiwać. Hač do kónca junija su w Sakskej dohromady 6 000 tajkich kartkow za zapłaćenje wudali, zdźěli nutřkowne ministerstwo. Bórze chcedźa kartku tež tam wužiwać, hdźež ju dotal nimaja.

Kontroluja miliony wizumow

Washington (dpa/SN). Knježerstwo USA přepruwuje miliony hižo schwalenych wizumow. Za to wšě móžne informacije wužiwaja, kiž jim k dispoziciji steja, tež te ze socialnych syćow. Wo tym rozprawja nowina „Washington Post“ a złožuje so při tym na zdźělenku wonkowneho ministerstwa. Něhdźe 55 milionow ludźi je wot naprawy potrjechenych. Jim móhł so wizum tež njelubych wuprajenjow dla sćazać, piše nowina dale.

Policist po třěleńcy zemrěł

Palestinski lěkar Ahmed Basal přepytuje dźěćo w chorowni Al-Rantisi w měsće Gaza, dokelž je wuhłódnjene a dosć k jědźi ­njedóstawa. Wójsko Israela chce město Gaza nětko oficialnje dospołnje wobsadźić. Na to je so wčera wěstotny kabinet na namjet ministerskeho prezidenta Benjamina Njetanjahuwa dojednał. Foto: pa/Reuters/Dawoud Abu Alkas