Paduši debjenkow zasudźeni
Drježdźany/Berlin (dpa/SN). Tři a poł lěta po spektakularnym rubježnistwje w Drježdźanskim Zelenym wjelbje su pjeć młodych muži z Berlinskeho clana swójby Remmo k jastwu zasudźili. Drježdźanske krajne sudnistwo měješe winu muži w zwisku ze zapalerstwom, strašnym zranjenjom ćěła, padustwom z brónjemi a wobškodźenjom za dopokazanu. Chłostanje złožuje so na „dojednanje“ mjez statnym rěčnistwom a wobskorženymi. 25lětneho su w tym zwisku wuwinowali. Sudnistwo zasudźi muži k jastwu mjez štyrjomi a šěsć lětami. Medije z tu- a wukraju proces přewodźachu.
Padustwo drohoćinkow w sakskim sławnym muzeju debjenkow 25. nowembra 2019 bě jedyn za najspektakularnišich po wšej Němskej. Skućićeljo rubichu 21 drohotnych debjenkow diamantow a brilantow w hódnoće 116,8 milionow eurow a zawostajichu hobersku wěcnu škodu. Wobskorženych móžeše policija pozdźišo w Berlinje zajeć. Woni běchu zwólniwi, dźěl rubizny wróćić a so ze snadnišim zasudźenjom wotnamakać.
Mjenje ćěkancow w komunach
Braniborske krajne knježerstwo wuradźuje wo azylowej politice
Podstupim (dpa/SN). W Braniborskej je wot januara hač do apryla mjenje ćěkancow do komunow přišło, hač běchu to po wobličenjach wočakowali. „Ličby wukazaneho zaměstnjenja njejsmy prěnje štyri měsacy docpěli. Diferenca je jasnje widźomna“, rjekny ministerka za integraciju a socialne naležnosće Ursula Nonnemacher (Zeleni) powěsćerni dpa. „Bohudźak njeje ćišć tak wulki.“
Po dotalnych wobličenjach su lětsa z 25 753 ćěkancami ličili, kotrež měli komuny w Braniborskej přiwzać a zaměstnić. Wuwiće pak mjeztym pokazuje, zo dyrbja tutu ličbu w meji korigować. Njeje pak wuzamknjene, „zo ličby zaso přiběraja“. W lěće 2022 běchu něhdźe 39 000 ćěkancow přiwzali, mjez nimi tójšto ludźi z Ukrainy.
Najebać to je połoženje za komuny, kotrež dyrbja nowe přebywarnje planować, ćežke, rjekny ministerka hladajo na protesty wobydlerjow. „Widźimy zdźěla tež prawicarskoekstremistiske skupiny w syći, kotrež spytaja, protest přiwótřić. „Tule dyrbimy wšitcy hromadźe stać a wotpowědne stejišćo zabrać.“
Sakska swjatnica
Chwali wolerjow
Policajska namóc bjez konsekwencow
To a tamne (16.05.23)
Před sudnistwom swoju přećelku wo mandźelstwo prosył je drogowy boss Harry P. w Nižozemskej. Kaž medije rozprawjeja, je přećelka hnydom do toho zwoliła. Najebać to wostanje wobskorženy najprjedy raz w jatbje, wusud wočakuja 13. julija. 33lětny bě šef cwólby, kotraž kumštne drogi we wulkich mnóstwach produkowaše a předawaše. Wotnožki produkcije měješe cwólba tež w Belgiskej a Němskej. Mužej hrozy wjelelětne jastwo.
Na wšě 2,7 tonow kokaina w hódnoće 800 milionow eurow je italska policija mjez bananowymi kistami namakała. Wulke mnóstwo drogow móžachu w přistawje města Gioia Tauro w južnoitalskim regionje Kalabriskej sćazać. Pječa jedna so wo jara čisty kokain. Schowane běchu drogi w chłódźenskich kontejnerach w posyłce 78 tonow bananow z Ecuadora po puću do Armeniskeje.
Za dalšu koeksistencu
Jerusalem (B/SN). W stolicy Israela su wažne zetkanišća a swjatnicy třoch swětowych nabožinow: židow, křesćanow a muslimow. Palestinsko-arabski psychologa Ahmed Mansour widźi składnostnje 75. jubileja wobstaća stata Israela wulku šansu w dalšej koeksistency mjez nabožinami. Wón so nadźija, zo wostanje Israel jako přikład za Bliski wuchod dale demokratiski.
Židźa w Němskej
Bonn (B/SN). Židźa sydla w Němskej dlěje hač 1 700 lět. Wot lěta 1990 ličba němsce rěčacych židow přez připućowarjow z wuchodneje Europy a Israela dale přiběra. W lěće 2021 registrowaše jich Centralna rada židow w Němskej 91 839. Lěta 2020 měješe sakski krajny zwjazk židowskich wosadow 2 440 přisłušnikow. Najwjetše židowske wosady su w Berlinje, Mnichowje a Frankfurće nad Mohanom.
Rabinerojo přećahnu
Mnichow (B/SN). Hłowne sydło změje Konferenca europskich rabinerow z 1 000 čłonami přichodnje w Mnichowje. Bayerska spěchuje nowy „Centrum za židowske žiwjenje“, dokelž je so tam w minjenych měsacach jara wjele židowskich ćěkancow před wójnu z Ukrainy a Ruskeje zasydliło.
Ličba muslimow přiběra
Strona mjeńšin najsylniša
Flensburg (dpa/SN). Juhošleswigski wolerski zwjazk SSW – strona danskeje a friziskeje mjeńšiny – je při komunalnych wólbach w centrumje swojich přiwisnikow Flensburgu w Schleswigsko-Holsteinskej jasnje dobył. SSW móžeše so wo 7,2 procentaj porno wólbam 2018 polěpšić a je ze 24,8 procentami nětko najsylniša strona. Zeleni zdobychu sej z 23,6 procentami druhe městno, před CDU, kotraž dósta 19,1 procent. Strona bě 2018 ze 19,3 procentami hišće najsylniša móc.
Wočakowanja EU trochu lěpše
Brüssel (dpa/SN). Hospodarstwo EU wuwiwa so lětsa po posudku komisije EU lěpje hač naposledk wočakowane. Zarjad liči z rozrostom hospodarstwa wo 1,0 procent, dźensa w Brüsselu wozjewichu. W februaru běchu hišće rozrost 0,8 procentow wěsćili. Europske hospodarstwo wopokazuje so tež při wšěch globalnych wužadanjach dale jako robustne, při předstajenju prognozy rěkaše. Inflacija wostanje ze 5,8 procentami dale wulka.
Železnica zaso po planje
