Berlin (dpa/SN). Tójšto posłužbow lěkarskich praksow, kotrež dyrbja pacienća sami zapłaćić, nima po měnjenju fachowcow žadyn wužitk. Wot cyłkownje 55 posudźowanych indiwidualnych strowot­niskich posłužbow njejsu ani jeničku pozitiwnje zastopnjowali, runje dwě stej tendencielnje pozitiwnej. Přewažny dźěl su z „njejasne“, „tendencielnje njejasne“ abo samo z „negatiwnje“ posudźowali. Tež informacije pacientam su njedosahace, fachowcy zwěsća.

Najčasćišo předawana posłužba je ultrazwukowe přepytowanje jejkownikow a maćernicy k zažnemu spóznaću raka. Posudźowali su tole pak negatiwnje abo tendencielnje negatiwnje. Přepytowanja wunjesu častodosć wopačne wuslědki, štož wjedźe k dalšim njetrjebawšim přepytowanjam a lěkowanjam, zdźěli rada fachowcow, kotraž chorobne kasy poradźuje. Husto načinjeja młodym žonam njetrjebawši strach. Posłužby předawaja přiběrajcy tež młodym holcam. Tež płokanje kreje a kislikowa terapija su njetrjebawše posłužby, kotrež pacientam za wjele pjenjez předawaja. Wotpowědne lěkarske posudki často ani njepředleža.

Aktualne woprašowanje w Braniborskej lěto do wólbow krajneho sejma

Podstupim (dpa/SN). Po najnowšim woprašowanju stej CDU a AfD w Braniborskej jenak sylnej. Wobě stronje byštej 23 procentow hłosow dóstałoj, bychu-li zajutřišim, njedźelu, wólby krajneho sejma byli. SPD by ze 22 procentami snadnje za nimaj ležała. Tole wuchadźa z „Braniborskeho trenda“ instituta Infratest dimap w nadawku sćelaka Antenne Brandenburg a magacina rbb „Brandenburg aktuell“. Wot 19. hač do 24. apryla běchu so 1 200 wólbokmanych reprezentatiwnje prašeli.

CDU móžeše porno prjedawšim woprašowanjam hłosy přidobyć. Při wólbach krajneho sejma 2019 běchu křesćanscy demokraća z 15,6 procentami wo wjele špatniši wuslědk docpěli. SPD porno tomu bě w nahladnosći ludźi najlěpje wobstała a ze 26,2 procentomaj najlěpši wuslědk docpěła. Wona knježerstwowu koaliciju w Braniborskej nawjeduje. Klětu wola tam nowy krajny sejm.

Nowe časy, nowe kwasy – wosebje w meji, najkrasnišim měsacu lěta. Tež we wječorniku serbskeho ludu změjemy tójšto noweho: Druha strona SN budźe „kraj a swět“ rěkać, štwórta strona „Łužica“. Dotalnu rubriku „Cyrkej a swět“ chcemy pod hesłom „Nabožina dźensa“ mnohotnosći towaršnosće wotewrěć. Kóždy druhi štwórtk měsaca wočakuje Was w přichodźe kolumna „Z čěskim wóčkom“ z widom našich čěskich přećelow na serbske a słowjanske temy a nic naposledk serbsko-čěske styki. A kak móhła so „naša rjana serbšćina“ na naročne ludowe wašnje hišće lěpje pěstować, budźe tema dalšeje prawidłowneje rubriki.

Nimo toho dźěła redakcija mjez druhim na dalewuwiću poskitkow za dźěći a młodostnych. Wjeselimy so na nawrót nazhoniteje redaktorki do našeho kruha spočatk meje. Dalše kročele do přichoda budu lětsa hišće sćěhować. Přejemy Wam rjany měsac lubosće a dosć chwile – tež za Serbske Nowiny! Marcel Brauman