„Sudźenje Judaša“ šokuje

Freitag, 26. April 2019 geschrieben von:

Pólska debatuje wo wožiwjenju antisemitiskeho dojutrowneho nałožka

Waršawa. Antisemitiski podawk w juhowuchodnym pólskim małoměsće Pruchnik wulki pjatk je razne mjezynarodne reakcije a nowu debatu po antisemitizmje w pólskej towaršnosći zbudźił. Wobydlerjo běchu wot cyrkwje dawno zakazany nałožk „Sudźenje Judaša“ wožiwili. Na wobrazach je widźeć, kak ludźo ze słowami „Judaš 2019“ a „Přeradnik“ pomolowanu słomjanu postawu najprjedy při latarni měšćanskeho wobswětlenja wobwěsnu a potom po starodawnym ritualu dale hanja a wonječesća. Postawa wotpowědowaše z hokatym nosom, ortodoksnej židowskej čapku a kudźerjatymi włosami klišejam zwobraznjenja Židow, kotrež běchu antisemića tež za čas nacionalsocializma wužiwali.

Čěski prezident w Chinje

Freitag, 26. April 2019 geschrieben von:
Praha (ČŽ/K/SN). Prezident Miloš Zeman je wot 24. do 29. apryla na dźěłowym wopyće w Chinje. Hłowu stata přewodźa nimo pjeć ministrow přisłušnych ressortow sylna delegacija zastupjerjow wažnych předewzaćow. Za čas swojeho přebytka zetka so Zeman wjackróć ze chinskim prezidentom Xi Jinpingom, zo by z nim wo pohłubšenju kooperowanja mj. dr. w ekonomice, energetice, ratar­stwje, kulturje a turistice jednał. Rozmołwy změje wón tohorunja z premierom Li Keqiangom kaž tež z nawodnymi ludźimi koncerna Huawei a Bank of China. Předwidźane je, zo podpisatej Čěska hospodarska komora a Bank of China memorandum, w kotrymž so chinski pjenježny institut zawjaza, do čěskich předewzaćow inwestować dwě do tři miliardy. Jedyn z hłownych dypkow wopyta je wobdźělenje Zemana dźensa a jutře na mjezynarodnym wjeršku nastupajo „nowu židźanu šćežku“. Tule chinsku iniciatiwu hódnoći Čěska jako „přiležnosć k pohłubšenju šěrokeho bilateralneho zhromadneho dźěła ze Chinu“. Zemanej wulce na tym zaleži, zo by „nowa židźana šćežka“ tež Čěsku zapřijała.

Dale stawkować abo nic

Donnerstag, 25. April 2019 geschrieben von:
Waršawa (dpa/SN). Wjace hač dwaj tydźenjej po zahajenju cyłokrajneho stawka pólskich wučerjow je zwjazk pólskich wučerjow ZNP dźensa wo dalewjedźenju stawka wuradźował. „Chcemy bjez emocijow rozsudźić, što je we wokomiknej situaciji to najlěpše za našich wučerjow“, rjekny šef dźěłarnistwa Sławomir Broniarz němskej powěsćerni dpa we Waršawje. Dźěłarnistwo sej žada, mzdy wučerjow hišće w tutym lěće wo 30 procentow w dwěmaj schodźenkomaj zwyšić. Dokelž njeje pólske narodnokonserwatiwne knježerstwo strony Prawo a sprawnosć dotal zwólniwe, žadanja wučerjow spjelnić, su so rozsudźili, z 8. apryla zahajenym stawkom po jutrach pokročować.

ANO suwerenje

Donnerstag, 25. April 2019 geschrieben von:
Praha (ČŽ/K/SN). Mjez politiskimi stronami a hibanjemi, zastupjenymi w čěskim parlamenće, ma dale najwjetšu akceptancu Alianca njespokojnych woby­dlerjow. Zjednoćenstwu ANO premiera Andreja Babiša by w aprylu při wólbach do sejma 32 procentow wolerjow swój hłós dało. Na druhim městnje sćěhuje z wulkim wotstawkom ODS, dokelž bychu wobydlerscy demokraća 14 procentow nažnjeli. ČSSD a Piraća byštej kóžda 12,5 procentow docpěła a KSČM z 11 procentami pjate městno wobsadźiła. Slěd w tutym rjedźe wuchadźa z wotpowědneho woprašowanja Centruma za zwěsćowanje zjawneho měnjenja (CVVM) w jutrowniku mjez 719 respondentami staršich hač 18 lět. Přichilnosć k jednotliwym stronam je porno měrcej njezměnjena wostała. Jeničke wuwzaće su komunisća, kiž móžeja so zrazom wo 2,5 procentow polěpšić. Do delnjeje komory parlamenta by zaso tež SPD zaćahnyła, přetož plus 1,5 dypkow by jej šěsć procentow wunjesł. Před durjemi by tónkróć KDU-ČSL wostać dyrbjała, spadny­wši w běhu jeničkeho měsaca z 5,5 procentow na jeno hišće 4. Wonka wostanu tohorunja STAN (3,5 procentow), TOP 09 (3 procenty) kaž tež Zeleni (1 procent).

Dowolnikow do wukraja ćahnyło

Mittwoch, 24. April 2019 geschrieben von:

Praha (ČŽ/K/SN). Loni je so prěni raz wjac hač pjeć milionow Čechow na dowol do wu­kraja podało. Najwoblubo­waniši dowolowy kraj bě znowa Chorwatska. K Adriji bě 815 000 čěskich ludźi ćahnyło, štož wšak je 35 000 mjenje hač 2017. Za to je so zajim na Słowakskej zwyšił. Hdyž bě předloni 645 000 Čechow w susodnym kraju dowolowe wokře­wjenje hla­dało, běchu to loni 724 000. Do Italskeje dojědźe sej 607 000 čěskich do­wol­nikow, 30 000 mjenje hač 2017. To zdźěla Čěski statistiski zarjad. Jako štwórte najwoblubowaniše dowolnišćo slěduje Grjekska, na kotrejež kupach loni 472 000 čěskich hosći (2017: 371 000) poby. Awstriska přiwabi 265 000 čěskich turistow – porno 446 000 lěta 2017 je wšak to hladajcy mjenje. Do Egyptowskeje wuleća sej 265 000 čěskich ludźi, štož wučinja w přirunowanju přirost wo 20 000.

7,9 milionow Čechow popřa sej dowol doma w kraju. Loni je prěni raz wjace­ hač dwaj milionaj čěskich dowol­nikow z lětadłom pućowało. Do Chorwatskeje a hłownje do susodnych kra­jow Češa najradšo ze swójskim awtom jězdźa.

Překwapjacy wokomik

Donnerstag, 18. April 2019 geschrieben von:

Bratislava (SŽ/K/SN). Njewočakowane wuwiće w najwjetšim kriminalnym padźe Słowakskeje: Nastupajo zamordo­wanje přepytowaceho nowinarja Jána Kuciaka a jeho přećelki Martíny Kušniroveje su dotal něhdyšeho policista To­máša Szaba za skućićela měli. Nětko pak so kriminalistam-přepytowarjam něhdyši wojak Miroslav Marček wuzna, zo bě wón wobeju zatřělił. To piše Dennik N, powołacy so na sćelak RTVS. Dennik N mjenuje Marčekove přiznaće „překwapjacy wokomik“. Dotal wobhladowachu Marčeka jako šofera awta, z kotrymž je mordarja wozył. Oficialnje pak tale wersija donětka njebu wobkrućena.

Do zamordowanja Kuciaka a Kušniroveje je pjeć wosobow zaplećenych: Marček, Szabó, Alena Zsuzsová, Zoltán Andruskó a předewzaćel Marian Kočner. Za poměrnje wěste so ma, zo bě Kočner – wón je druheho delikta dla w přepytowanskej jatbje – nadawk k zamordowanju Kuciaka dał. Wo nim bě nowinar rešeršował a w swojich přinoškach jeho zwiski z italskej mafiju wotkrył. Kuciakej hrožeše Kočner na to wospjet telefonisce z „wotpłaćenjom“, dotal pak wón wšitko zaprěwa.

Awto stajny „póžěrak“ krónow

Mittwoch, 17. April 2019 geschrieben von:

WUDAWKI, kiž čłowjekej njenadźicy nastanu, su bjezdwěla najnjepřijomniše. Za njewočakowanu reparaturu swojeho wozydła dyrbjachu Češa loni přerěznje 14 931 krónow (něhdźe 582 eurow) nałožić. Při tym je nic mjenje hač 40 procenow mějićelow awta hawarija abo někajka druha wjetša škoda potrjechiła. Zwěsćili su to z wotpowědnym přepytowanjom přez sobudźěłaćerjow towaršnosće Nielsen Admosphere. Jedne wozydło znajmjeńša wobsedźi 86 procentow woby­dlerjow kraja. Njewočakowanu repara­turu dyrbješe w minjenym lěće 41 procentow čěskich­ awtomobilistow pře­- wjesć dać, dźewjeć procentow z nich samo wjace hač jednu. Wudawki za nje­zbytne porjedźenje wotwisowachu wot ćežkosće wobškodźenja jězdźidła a nic naposledk wot jeho staroby. Wjetša połojca potrje­chenych měješe za to hač do 10 000 krónow (něhdźe 390 eurow) płaćić, 13 procentow samo wjace hač 20 000 krónow (něhdźe 780 eurow). Přibližnje 90 procentow respondentow praji, zo su njenadźate wudawki móhli z naluto­wanych pjenjez zwjesć. Tamna dźesa­ćina dyrbješe sej pjenjezy na bance abo priwatnje požčić.

Ma wuhlady na dobyće

Dienstag, 16. April 2019 geschrieben von:
Kijew (ČŽ/K/SN). Po tym zo bě dźiwadźelnik-njepolitikar Wolodimir Zelenskij prěnje koło ukrainskich wólbow prezidenta z 30 procentami dobył, nažnjawši skoro dwójce telko hłosow kaž prezident Petro Porošenko, wočakuja Ukrainjenjo nětko z wulkej napjatosću wuslědk rozsudneho koła 21. apryla. A njeje utopija, zo Zelenskij tež te za sebje rozsudźi. Po zwěsćenju ukrainskeje woprašowarnje Razumkowy centrum maja 49,3 procenty wolerjow wotmysł, jemu swój hłós dać. Porno tomu ma Porošenko přichilnosć jenož 20,6 procentow. We wólbnym boju bě Zelenskij přilubił, w padźe swojeho wuzwolenja jednać z ruskim prezidentom Wladimirom Putinom wo Donbasu. Porošenko wutrubi, zo sej „Putin słabeho prezidenta“ přeje. 19. apryla ma so hišće wot zakonja postajena debata mjez kandidatomaj přewjesć, pak w studiju telewizije pak w olympiskim stadionje. Zelenskij ludźi namołwi, po Facebooku jemu pósłać prašenja, kiž bychu na prezidenta měli a kotrež chcył wón Porošenkej w jich mjenje stajeć.

Dale mało bjezdźěłnych

Montag, 15. April 2019 geschrieben von:
Praha (ČŽ/K/SN). Kwota bjezdźěłnosće je w Čěskej w měrcu na tři procenty spadła, mjeztym zo bě w februaru 3,2 procentaj wučinjała. Dźěło pytało je 227 000 wosobow, štož je najmjeńša měrcowska ličba wot lěta 1997. Loni w nalětniku bě 3,5 procentow bjezdźěłnych registrowanych. To wozjewja Dźěłowy zarjad Čěskeje republiki. Woteběracej ličbje bjezdźěłnych spočatk nalěća polěkowaše hłownje za­zběh sezonowych dźěłow. Tak je nimale 49 000 ludźi do twarstwa, ratarstwa gastronomije a turistiki wotešło. „Měrc je tež typiski měsac za to, zo mnohe rjedźerske firmy ludźi přidatnje přistajeja za trěbne čisćenje zjawnych płonin w komunach“, rjekny direktorka Dźěłoweho zarjada Kateřina Sadliková. Najbóle trjebaja předewzaćeljo mjez druhim twarskich dźěłaćerjow, pomocnikow w produkciji, fachowcow za montažu, rjedźenske a pomocne mocy w hotelach a dalšich objektach kaž tež skowarjow a druhich technikarjow. Najmjeńša je bjezdźěłnosć w stolicy, wučinjaca tam jeničce 1,9 procentow. Najwjetšu maja ju w Morawsko-šleskim wobwodźe a w Ústískim regionje hdźež 4,6 proc. ludźi dźěłowe městno pyta.

Měšnicy šulerjow pruwuja

Freitag, 12. April 2019 geschrieben von:

Stawk pólskich wučerjow nuzuje zamołwitych k njewšědnym naprawam

Waršawa. Stawk pólskich wučerjow, zahajeny minjenu póndźelu, ma mjeztym widźomne wuskutki. Cyły tydźeń njejsu dźěći w šuli byli. Tójšto staršich, přede­wšěm ći, kotřiž w zarjadnistwach dźěłaja, bjerješe je tuž wón na dźěło.

Hižo wjele lět wojuja wučerjo wo wyše mzdy a wo lěpše dźěłowe wuměnjenja. Dotal pak njeje knježerstwo ničo za to činiło. W měrcu bě Pólski zwjazk pedagogow připowědźił, zo njewidźi hinašeho wupuća, hač wučerjow do stawka namołwjeć, zo bychu zwyšenje mzdy wo 30 procentow přesadźić móhli. Knježerstwo poskića jim najwjace 15 procentow, štož pak pedagogojo wotpokazuja. Nětko chcedźa tak dołho stawkować, doniž njebudu jich žadanja spjelnjene.

Pólscy wučerjo-započatkarjo zasłužeja přeličene něhdźe 450 eurow. To je hladajo na płaćizny a na podruže přemało, zo móhli samostatnje bydlić abo samo swójbu załožić a zežiwić. Tola tež z přidatnymi kwalifikacijemi a wjelelětnym dźěłom so mzdy jeno snadnje zwyšeja. Tak ma wučer z dwacećilětnej powołanskej praksu runje 850 eurow.

Anzeige

  • Sernjany su swoju róčnicu prěnjeho naspomnjenja wsy před 600 lětami z wosebitym wjesnym swjedźenjom wuspěšnje woswjećili. Tule nańdźeće někotre fotowe impresije wo tym:
Zerna feierte unlängst die Ersterwähnung des Ortes vor 600 Jahren mit einem beson