VW přetorhnje produkciju
Wolfsburg (dpa/SN). Awtotwarc Volks-wagen chce produkciju w mnohich twornjach rozšěrjaceho so coronawirusa dla přetorhnyć. W najwjace zawodach ma pjatk, 20. měrca, poslednja změna běžeć, zdźěli zawodna rada koncerna dźensa we Wolfsburgu. Minjene dny běchu tež w němskich zawodach wjacore pady wirusa zwěsćili. Dokelž njemóža při běžacych pasach wotstawk mjez kolegami dodźeržeć, su so z nawodnistwom dojednali zawod na dwaj tydźenjej zawrěć.
Wšitke 53 wotnožkow w Němskej je wot dźensnišeho tež wikowar meblow Ikea zawrěł, kaž wottam rěka.
Merkel: Dalše wobmjezowanja
Berlin (dpa/SN). W boju přećiwo coronawirusej je zwjazkowa kanclerka Angela Merkel (CDU) dalše wobmjezowanja zjawneho žiwjenja w Němskej připowědźiła. Tak dyrbjeli so wobydlerjo dowolowych jězbow w kraju a wukraju wzdać. Zjawne žiwjenje je w dalokej měrje zlemjene. Naprawy su dźěl wulkeho kataloga wukazow, zo bychu socialne kontakty mjez ludźimi dale wobmjezowali. Tak ma wulki dźěl wobchodow zawrěć. Bože słužby wšitkich wěrywuznaćow kaž tež towarstwowe aktiwity su zakazane. Hrajkanišća wostanu zawrjene. Wobchody žiwidłow a tajke, kotrež słuža zastaranju ludźi, maja pak dale wotewrjene wostać. Merkel apelowaše na ludźi, naprawy a směrnicy dodźeržeć, ćim lěpje móže so poradźić rozšěrjenju wirusa zadźěwać. „Tajke naprawy njejsmy w Němskej hišće dožiwili“, rjekny wona po posedźenju wjacorych gremijow, kotrež běchu so z pandemiju zaběrali.
Bayerski ministerski prezident Markus Söder (CSU) žada sej w boju přećiwo wirusej „spěšniše postupowanje“.
Zasypany pólski hórnik zemrěł
To a tamne (17.03.20)
Do swojeje chinskeje domizny nawróćiło je so koparske mustwo Wuhan Zall z treningoweho lěhwa w Španiskej. Sportowcy dyrbjachu połdra měsaca w španiskim eksilu wostać, po tym zo bě coronawirus w jich chinskej domiznje wudyrił. „Nětko mamy problem tu“, rjekny španiski trenar mustwa krótko do wotlěta z Madrida. W Chinje je so połoženje mjeztym změrowało, Španiska pak je nimo Italskeje tuchwilu wot wirusa najbóle potrjecheny kraj Europy.
Dwě lěće jako domownik dźěłał je znaty telewizijny moderator Günther Jauch do swojeho časa w telewiziji, kaž je we wčerawšim wusyłanju „Štó budźe milionar?“ přeradźił. „To njebě najzbožowniši čas za wobydlerjow“, wón k tomu rjekny. Wosebje mjerzachu Jaucha njepřestajne skóržby wobydlerjow najwšelakorišeho razu a črije před durjemi bydlenjow.
Wočakuje jasnu wotmołwu
Vatikan (B/SN). Bamž Franciskus warnuje, zo stanje so zasadźenje přećiwo změnje klimy z ideologiskim rozestajenjom. Bohužel njeje nuznosć ekologiskeho přewróta ze stron politiki přeco hišće zrjadowana. „Dotalne wotmołwy su hišće jara słabe a mje starosća“, rjekny bamž. Klimowa konferenca w Madridźe bě alarmowaca. Trjebamy kolektiwnu wotmołwu, kotraž derjeměće wšěch nad zajimy jednotliwcow staja.
Přichod njewěsty
W Zwjazkowej radźe słyšane
Berlin (SN/JaW). Mjeńšinowa rada Němskeje njeje so pjatk w Berlinje z prezidentom Zwjazkoweje rady Dietmarom Woidku (SPD) zetkała. Aktualneho połoženja rozpřestrěća coronawirusa dla zastupowaštaj jeho statna sekretarka a społnomócnjena Braniborskeje w Zwjazku dr. Jutta Jahns-Böhm a ministerialny dirigent dr. Michael Wisser.
Kaž předsyda Domowiny Dawid Statnik, kiž je zdobom předsyda mjeńšinoweje rady, na naprašowanje zdźěli, bychu tež dźěłowu rozmołwu bjezmała wotprajili. Čas za to pak bě překrótki. Tak běchu wšitcy zwjeseleni, zo „su nas w Zwjazkowej radźe přijeli. To nam pokazuje, zo su mjeńšinowa rada kaž tež temy narodnych mjeńšin w Zwjazkowej radźe słyšane“, Statnik zwurazni.
Maas: Do wukraja njejězdźić
Berlin (dpa/SN). Zwjazkowe knježerstwo radźi so wšitkich njetrjebawšich jězbow do wukraja wzdać. „Riziko, zo njemóžeće so přiběracych wobmjezowanjow dla wjace do Němskeje nawróćić, je w mnohich kónčinach tuchwilu wulke“, twitterowaše dźensa zwjazkowy wonkowny minister Heiko Maas (SPD). Ministerstwo na swojej internetnej stronje zdźěla, zo liči z dalšimi drastiskimi wobmjezowanjemi zjawneho žiwjenja w mnohich krajach, štož so tež na pućowanje wuskutkuje.
W Bayerskej „katastrofowy pad“
Mnichow (dpa/SN). W Bayerskej płaći wot jutřišeho coronawirusa dla katastrofowy staw. To je ministerski prezident Markus Söder dźensa wukazał. Zdobom wón připowědźi, zo chcyło bayerske krajne knježerstwo hač do dźesać miliardow eurow z wosebiteho fondsa EU nałožić, zo móhli krizu přewinyć. „Njewostajimy nikoho samoho“, rjekny Söder dźensa w Mnichowje. Katastrofowy pad płaći najprjedy raz 14 dnjow. Z nim su w prěnim rjedźe organizatoriske rjadowanja přećiwo coronawirusej zwjazane.
Z hosćenca na polo
Tež dźeń po zawrjenju pólsko-němskeje mjezy coronawirusa dla maja ...
Bjez Ruskeje njebudźe Europa domizna
Podstupim (dpa/SN). Bywši předsyda SPD Matthias Platzeck namołwja Němsku a Europsku uniju, poměr k Ruskej polěpšić. „Jeničce z Ruskej jako partnerom móže Europa swoju politisku wahu na swěće zasadźić.“ To piše bywši ministerski prezident Braniborskeje, kiž je tež předsyda Němsko-ruskeho foruma, w swojej knize „Trjebamy nowu politiku za wuchod. Jeno zhromadnje z Ruskej móžemy wulke globalne nadawki přichoda zmištrować – hač škit klimy, energijowu wěstotu, migraciju abo terorizm.“ Kniha je wot minjeneho pjatka we wobchodach na předań.
„Pačenje mjez wuchodom a zapadom njeje přewinjene“, Platzeck dale pisa. „Rozdźěle su wostali a su so zdźěla hišće jasnišo wujewili, nic jenož w poměrje k Ruskej, ale tež we wobłuku Europskeje unije a w Němskej samej.“ Europa měła Rusku integrować a njeměła ju izolować. „Tónle kontinent njebudźe nam bjez Ruskeje abo samo přećiwo njej žana wěsta a měrniwa domizna.“
Platzeck wěnuje so w swojej knize tež natwarej wuchoda po zjednoćenju Němskeje. „Natwar wuchoda“ su mnozy wuchodoněmscy wobydlerjo jako to začuwali, štož wón de facto tež bě: „wottwar wuchoda“.
Masiwne problemy wirusa dla
Kubłanišća a pěstowarnje dlěši čas zawrjene – tójšto njejasnosćow
Berlin (dpa/SN). W boju přećiwo dalšemu rozšěrjenju coronawirusa wostanu wot dźensnišeho po wšej Němskej tysacy šulow a pěstowarnjow zawrjene. Dotal jónkrótny wukaz płaći w najwjace zwjazkowych krajach hač do kónca jutrownych prózdnin, potajkim hač dosrjedź abo kónca apryla. W Němskej je 2,8 milionow wuknjacych w zakładnych šulach, w dźěćacych dnjowych přebywanišćach staraja so wo 3,7 milionow dźěći.
Tydźenja trajace zawrjenje staja staršich a dźěłodawarjow před masiwne problemy. Minister za dźěło Hubertus Heil (SPD) apelowaše w tym zwisku na šefow zawodow a institucijow, zhromadnje ze sobudźěłaćerjemi njeběrokratiske a znjesliwe rozrisanja za hladanje dźěći namakać, tak zo njetrjebali starši ze skrótšenjom mzdow ličić.
Kraje nimo toho spytaja nuzowe zastaranje za staršich w tak mjenowanych kritiskich powołanjach – policistow, medicinarjow, wohnjowych wobornikow, hladarjow abo sobudźěłaćerjow wuchowanskeje słužby – organizować, zo móhli woni dale na dźěło chodźić.
