Wikowarjo maja sami kontrolować
Drježdźany (dpa/SN). Sakski krajny šef dźěłarnistwa policije Hagen Husgen njeliči z tym, zo změja zastojnicy kontrolow škita za hubu a nós dla wjace dźěła. W prěnim rjedźe maja to wikowarjo sami zamołwić. „Njemyslu sej, zo je to naš nadawk, před kóždej kupnicu a wobchodom za twarske maćizny stać a wukaz pruwować“, wón potwjerdźa. Wobchodnicy pak smědźa při přeńdźenjach policiju kóždy čas zawołać. Wobmjezowanjow zjawneho žiwjenja dla dochadźa k mjenje wobchadnym njezbožam, demonstracije a zarjadowanja, hdźež maja zastojnicy často prezentni być, tohorunja njejsu. Tak su druhdźe zasadźomni.
Aktualna ličba na koronawirus schorjenych je so w Sakskej na mjeztym 4 277 (staw njedźelu) powjetšiła, štož je 37 padow wjace hač dźeń do toho. Kóždy dźeń popołdnju sakske socialne ministerstwo ličby aktualizuje. Mjeztym je 107 ludźi na chorosć Covid-19 zemrěło, štož je jedna wosoba wjace hač sobotu. Najwjac zemrětych maja we wokrjesu Rudne horiny. Cyłkownje su jich tam 31 wosobow.
Ludźo starosća so dowola dla
Wšelake wolóženja wotnětka płaćiwe – mjeza Čěskeje dale zawrjena
Berlin/Drježdźany (dpa/SN). Po měsacu raznych wobmjezowanjow koronawirusa dla płaća w Němskej wot dźensnišeho we wšědnym žiwjenju wšelake wolóženja. Tak smědźa wobchody z předawanskej płoninu hač do 800 kwadratnych metrow zaso wotewrěć. Zwjazkowe kraje nadrobnosće wšelako rjaduja. W někotrych šulerjo wotchadnych lětnikow nětko zaso w šuli wuknu. Po tym puću chcedźa předewšěm pruwowanja zaručić. W Berlinje a Braniborskej zahajichu dźensa maturitne pruwowanja.
Mjeztym wuhladaš w Němskej dźeń a wjace ludźi ze škitom před hubu a nosom. W Sakskej jón kóždy w busach, tramwajkach a při nakupowanju trjeba. Zwjazkowe knježerstwo porno tomu dale jenož „nuznje radźi“, tajki škit wužiwać. Zwjazkowa kanclerka Angela Merkel (CDU) chce přichodne dny ze zamołwitymi wo naležnosći wuradźować.
To a tamne (20.04.20)
Drogi na Facebooku poskićeli su třo młodostni w Kambodźi a maja nětko problemy z justicu. 20lětna bě swój „ice“ za „dobru płaćiznu“ dźewjeć eurow na pakćik poručała. Nimo toho wona na internetnej stronje zmužiće pokazowaše, kak drogi bjerje. Policija njeměješe za to scyła žane zrozumjenje a ju kaž tež tamneju dweju zaja. Zastojnikam młodostni rjeknychu, zo běchu sami „high“ byli, jako swoje poskitki do interneta stajichu.
Šćerk jako najwažniša tudyša twarska maćizna njeje w Němskej hižo dosahajcy k dispoziciji. Po tym zo běštej loni předewšěm Poruhrska a Hamburg potrjechenej, so problem zastaranja mjeztym tež na druhe kónčiny rozpřestrěwa, kaž w twarskej industriji zwěsćeja. Hrubeho pěska je drje w Němskej dosć, z přirodoškitnych přičin pak nowe pěskowe jamy lědma hišće přizwoleja.
Nowe naprawy
Drježdźany (SN). Sakske statne ministerstwo za socialne a towaršnostnu zwjazanosć je wčera wozjewjene powólnjenja korigowało. W aktualnej zdźělence rěka, zo smědźa bjez wuwzaća wšitke wobchody z předawanskej přestrjenju hač do 800 kwadratnych metrow na nowy tydźeń zaso kupcow posłužować. Wot tohole wobmjezowanja njepotrjechene su wikowarjo jězdźidłow a kniharnje. Tež nastupajo kulturnišća je k změnje dóšło. Hinak hač připowědźene wostanu muzeje, wopomnišća, zwěrjency, botaniske zahrody a „podobne zarjadnišća“ dale zawrjene. Tak mjenowane wulkozarjadowanja, kaž na přikład předstajenja w dźiwadłach abo kinach, koncerty, festiwale pod hołym njebjom a sportowe wubědźowanja z publikumom, su po nětčišim stawje najzašo zaso wot spočatka septembra móžne.
Wo Božich słužbach rěčeli
Berlin (dpa/SN). Koronakrizy dla wobstejacy zakaz Božich słužbow bě dźensa dopołdnja tema zetkanja w Berlinje. Statny sekretar nutřkowneho ministerstwa Markus Kerber je so ze zastupnikami wšelakich nabožnych zjednoćenstwow Němskeje zetkał. We wobłuku wuměny nazhonjenjow wuradźowachu, kak móhli so pohrjeby za čas koronakrizy wotměć a hač njemóhli so Bože słužby pod wěstymi wuměnjenjemi zaso wotměć. Přichodny tydźeń chcedźa so k tomu ze zwjazkowym nutřkownym ministrom Horstom Seehoferom (CDU) zetkać.
Chorownje wróćo k normaliće
Berlin (dpa/SN). Chorownje Němskeje móhli so wot spočatka meje krok po kroku zaso do „normalneho dźěła“ nawróćić. Tole je zwjazkowy minister za strowotnistwo Jens Spahn (CDU) připowědźił. Při tym pak měli hač do 30 procentow łožow na intensiwnych stacijach za na koronu schorjenych pacientow rezerwować, rjekny Spahn dźensa w rańšim magacinje sćelaka ARD. Chorownje běchu na spočatku koronakrizy připowědźili, zo chcyli planowane operacije najprjedy raz přestorčić.
Trump: Wirus z dalokeho kraja
