To a tamne (06.05.20)
Pjećlětneho za wodźidłom awta lepiła je policija na awtodróze w zwjazkowym staće USA Utah. Policistam pachoł rjekny, zo je po puću do Kaliforniskeje, zo by sej Lamborghini kupił. Měješe pak runje tři dolary při sebi. Zastojnikam bě napadnyło, zo awto jara njewěsće jědźeše. Kaž staršej měnještaj, njebě hólc hišće ženje sam jěł.
Mysteriozne to zadobywanje na zakładnej šuli w sewjerorynsko-westfalskim Kerpenje. Tam běchu skućićeljo wšelake sportowe nastroje ze składa wzali a je wužiwali, mjez druhim trampolin. Prawdźepodobnje běchu dołhi mejski kónc tydźenja wužili, zo bychu so přez třěšne wokno zadobyli a zaso raz porjadnje sportowali. Pokradnyli ničo njejsu.
Šiman znowa wuzwoleny
Drježdźany (SN/bn). Zapósłanc Sakskeho krajneho sejma Marko Šiman (CDU) wostanje předsyda parlamentariskeje přirady Załožby za serbski lud. Wčera su jeho we wobłuku posedźenja rady w Berlinje w zastojnstwje wobkrućili.
Ćežišćo zeńdźenja bě nimo toho nowe financne zrěčenje, wo kotrymž załožba na nowy tydźeń wuradźuje. Přezjedni sej běchu, zo měli srědki aktualnemu połoženju přiměrić a přiražki Zwjazka kaž tež Sakskeje a Braniborskeje powjetšić.
Dalšej wažnej temje běštej strukturna změna w brunicowym regionje a koronapandemija. „Kriza so na serbske towarstwa – kulturne kaž tež sportowe – wuskutkuje, a to nic jenož krótkodobnje. Wosebje hladajo na sponsoring z toho wuchadźamy, zo wón dale woteběracych dochodow wotpowědnych firmow wjace tak wobšěrny njebudźe kaž dotal. Namołwjamy tuž załožbu, so z problematiku rozestajeć“, Šiman rozłoži.
Nastupajo strukturnu změnu sej přirada po słowach stareho a noweho předsydy „po dosć wobšěrnej diskusiji wot Zwjazka žada, Serbow tež na zakonskej runinje do konceptow zapřijeć“.
Čěska kontrole podlěši
Praha (dpa/SN). Čěska podlěši swoje kontrole na mjezy k Němskej a Awstriskej znajmjeńša hač do 13. junija. To je knježerstwo ministerskeho prezidenta Andreja Babiša wčera wječor wobzamknyło. Hłowna přičina je bój přećiwo koronawirusej. Za čas hač do 17. meje podlěšeneho wuwzaćneho stawa njesmědźa žani wukrajnicy do kraja. Češa smědźa republiku wopušćić, dyrbja pak po nawróće do dwutydźenskeje karanteny abo negatiwny test korony předpołožić.
Zwjazk wučerjow spokojom
Berlin (dpa/SN). Zwjazk wučerjow Němskeje je spokojom na wčerawše wotewrjenje šulow za statysacy dźěći a młodostnych reagował. „Na najwjace zakładnych šulach je to derje fungowało, štož pokazuje, zo su tež dźesaćlětni kmani předpisy dodźeržeć, hdyž su wo trěbnosći přeswědčeni“, rjekny wiceprezident zwjazka wučerjow Hans-Peter Meidinger nowinarjam. W někotrych zwjazkowych krajach móžachu po zakónčacych rjadownjach wčera tež wšitke tamne zaso do šule.
Mjeza wostanje zawrjena
Hosćency bórze zaso wotewrěć
Podstupim (dpa/SN). Nastupajo zběhnjenje wobmjezowanjow w gastronomiji a hotelach koronawirusa dla měłoj so Berlin a Braniborska wusko wothłosować, kaž sej frakciji CDU wobeju krajow žadatej. Berlinski senat měł so zhromadnje z braniborskim knježerstwom za to zasadźić, zo hosćency a hotele bórze zaso wotewru“, rjekny frakciski šef Berlinskeje CDU Burkhard Dregger.
Braniborski frakciski šef CDU Jan Redmann je za wolóženja wotsrjedź meje. Předsyda Berlinskeje frakcije FDP Sebastian Czaja pak so za to wupraja, hosćency hižo přichodny kónc tydźenja wopytowarjam zaso spřistupnić.
Herbst: Trjebamy perspektiwu
Zapósłanc FDP za jasny jězbny plan nastupajo normalitu žiwjenja
Drježdźany (dpa/SN). Zapósłanc FDP w zwjazkowym sejmje Torsten Herbst z Drježdźan kritizuje najnowše wolóženja krajneho knježerstwa nastupajo koronapandemiju jako njedosahace. „Po přesłapjacym wobzamknjenju kabineta minjeny tydźeń trjebamy skónčnje jasny jězbny plan poněčimneho wotewrjenja hosćencow a hotelow w Sakskej“, Herbst wuswětla. Přiwšěm měli pruwować, hač móža ludźo krute hygieniske předpisy dodźeržeć. „Runje pod hołym njebjom je to poměrnje jednore. Smy w Němskej z wótrymi naprawami a dobrowólnym wobmjezowanjom tomu zadźěwali, zo so koronawirus raznje rozpřestrěwa. Nětko pak trjebaja ludźo jasnu perspektiwu, w kotrych kročelach ma zaso normalita do hospodarskeho žiwjenja zaćahnyć. To płaći wosebje za wobłuki, kotrež su wot krizy najbóle potrjechene, kaž stej to turizm a gastronomija.“ Zapósłanc FDP je přeswědčeny, zo towaršnosć šok pandemije na dlěši čas njepřewinje, hdyž zamołwići šansu njewužija zaso normalne žiwjenje zmóžnić.
To a tamne (05.05.20)
Zelenina město telewizora: Zhromadnje z dźěćimi w bydlenju kórki a tomaty plahować je w Japanskej w času koronapandemije dźeń a woblubowaniše. Wikowarjo symjenja w stolicy Tokiju maja widźomnje wjace kupcow, kotřiž chcyli w milionowej metropoli z dźěćimi doma w sadźenskich kašćikach zeleninu plahować. Wuwzaćny staw płaći hač do kónca meje, tuž maja hišće trochu chwile.
Po měsacy trajacym čakanju na morju su namórnicy 59lětneho płachtakowarja ze Singapura wuchowali a na kraj dowjezli. Wong Tetchoong bě so spočatk februara na tři lěta trajacy dyrdomdej po oceanu nastajił. Po wudyrjenju koronakrizy pak su wšitke přistawy zawrěli. Na Fidźiskich kupach su muža nětko přiwzali: Do karanteny wón njetrjeba, wšako njeje jeho na morju nichtó natyknyć móhł.
Za „njebjeski dowol“
Drježdźany (B/SN). Na kromje lětušich fachowych dnjow „cyrkwje w turizmje“ w Drježdźanach rozjimowachu zastupjerjo Sakskeje ewangelskeje krajneje cyrkwje, cyrkwje Berlin-Braniborska-šleska Hornja Łužica kaž tež Sewjerneje cyrkwje projekt „Njebjeski dowol w Hornjej Łužicy“. Prózdne farske domy móhli za „njebjeski dowol“ přetwarić. „Hladajo na woteběracu ličbu wosadnych ma so z toho wuchadźeć, zo dźensa prózdne domy tež za 40 lět wobsadźene njebudu,“ rjekny Kerstin Kracht, referentka za cyrkej a turizm a zamołwita za wotewrjenje Božich domow w Sakskej.
Podpěra potrěbnym
Erfurt (B/SN). W dnjowym zetkanišću Carity w Erfurće bjezdomnym a potrěbnym ludźom wšědnje w času wot 10 do 11 hodź. pakćiki z jědźu wudźěleja. „Wostanjemy wosrjedź ludźi w nuzy. Zo bychmy wudawki za žiwidła, napoje a wěcy wšědneje potrjeby kaž tež za hygienowe srědki financować móhli, prosymy wo pjenježnu podpěru“, informuje regionalny nawoda srjedźodurinskeje Carity Michael Wenzel.
Dźakuje so cyrkwjam
Chce mjezu zaso wotewrěć
Praha (dpa/SN). Čěske knježerstwo chce mjezu w juliju zaso wotewrěć. Wotpowědne rozmołwy z Awstriskej a Słowakskej su hižo daloko postupowali, z Pólskej pak su dale komplikowane, rjekny wonkowny minister Tomáš Petříček nowinarjam. „Bych mjezu k Němskej, Awstriskej, Pólskej a Słowakskej rady w juliju wotewrěł.“ Dyrbjało-li so połoženje w boju přećiwo koronapandemiji derje wuwić, móhł kraj mjezu tež hišće prjedy wotewrěć, Petříček připowědźi.
Scholz naprawy zakituje
Berlin (dpa/SN). W diskusiji wo raznym wobmjezowanju zjawneho a hospodarskeho žiwjenja koronapandemije dla skedźbnja wicekancler Olaf Scholz (SPD) na to, zo su druhe europske kraje wjele razniše postajenje wukazali. Němska njeje swoju industriju zawrěła, ludźo smědźachu minjene tydźenje stajnje dom wopušćić, rjekny wón wčera w telewiziji ARD. Najebać to zwjazkowe knježerstwo zhromadnje z přisłušnymi krajnymi knježerstwami „njepřestajnje rozmysluje“, kotre wolóženja móže zamołwić.
FDP: Zmylki analyzować
Schröder: Preč ze sankcijemi
Berlin (dpa/SN). Hladajo na koronakrizu něhdyši zwjazkowy kancler Gerhard Schröder namołwja, poměr k Ruskej zaso polěpšić. „Runje nětko, hdyž koronakrizy dla ćežke hospodarske časy na nas přińdu, dyrbimy wušo hromadźe dźěłać. Tohodla dyrbja bjezzmyslne sankcije preč“, rjekny politikar SPD wčera we wusyłanju Tagesspiegel.
Narěčany na přiswojenje połkupy Krim přez Rusku Schröder rjekny: „Štóž wěri, zo móžeš Rusku ze sankcijemi k něčemu nuzować, tón so myli. Žadyn ruski prezident Krim Ukrainje njewróći.“
Hladajo na róčnicu wuswobodźenja Gerhard Schröder rjekny, zo „njesměmy w padźe Ruskeje na stawizny zabyć. Bě to surowa zaničowanska wójna ze zaměrom, Rusku ze swětoweje politiki wušmórnyć. Tomu dyrbjała němska politika Ruskej napřećo bóle wotpowědować.“ Zo bě Ruska najebać surowu zašłosć zwólniwa, z Němskej dowěrliwje dźěłać, njemóžeš wysoko dosć hódnoćić, něhdyši kancler wuzběhny. „Tomu so sankcije njehodźa.“
Dalše wolóženja w koronakrizy
Sakski wobswětowy minister chce krok po kroku wróćo do normality
Drježdźany (dpa/SN). W Sakskej płaća za frizerow, muzeje, předawarnje meblow wot dźensnišeho nowe prawidła nastupajo koronawirus. „Podamy so z nowymi škitnymi naprawami koronawirusa dla krok po kroku dale do normality, do normality z koronu“, rjekny sakski wobswětowy minister a zastupowacy ministerski prezident Wolfram Günther (Zeleni). Wolóženja, na kotrež bě so sakske krajne knježerstwo minjeny štwórtk dorozumiło, płaća hač do 20. meje. „Po tym dyrbimy systematiske rjadowanja za tych namakać, kotřiž tuchwilu žane dochody nimaja, kreatiwnje dźěłacy, wuměłcy, ale tež hotelownicy a hosćencarjo“, Günther podšmórny.
Industrijna a wikowanska komora w Kamjenicy nima wobzamknjene rjadowanja za dosahace. Wona je přesłapjena, zo njejsu zajimy hotelownikow a hosćencarjow wobkedźbowane. Přenocowanja w hotelach a pensijach bychu při dodźerženju hygieniskich prawidłow bjeze wšeho móžne byli, komora zdźěla.
