Halle/Podstupim (dpa/SN). Sakski ministerski prezident Michael Kretschmer (CDU) so zawrjeneje němskeje-pólskeje mjezy dla jara starosći. „Je to wulka běda, kotraž so tam stawa. Sym sej wěsty, zo pólske knježerstwo přehnawa. EU je docpěła, zo njejsu mjezy kónc hospodarskeho a žiwjenskeho ruma. Na to su so ludźo w regionje zwučili a jězdźa tam a sem, zo bychu tu dźěłali a bydlili. Rigorozne zawrjenje mjezow koronakrizy dla pak wulku nuzu zawinuje“, rjekny Kretsch­mer powěsćerni dpa.

Kretschmerowy braniborski kolega w zastojnstwje Dietmar Woidke (SPD) je Pólsku tohorunja prosył, „zběhnyć razne wobmjezowanja za powołanskich dojězdźowarjow, kotřiž w Němskej dźěłaja. To dyrbjało tež w zajimje Pólskeje być, přetož jeje staćenjo zawrjeneje mjezy dla najbóle ćerpja.“ Pólska bě srjedź měrca swoju mjezu zawrěła. Dojězdźowarjo dyrbja po nawróće do dwutydźenskeje karanteny. W Zhorjelcu su minjeny pjatk na woběmaj bokomaj mjezy přećiwo jeje zawrěću protestowali.

Šef kanclerskeho zarjada ćehnje mjezybilancu nastupajo pandemiju

Berlin (dpa/SN). Kanclerski zarjad je so wuraznje za to wuprajił, na koronakrizu po regionach rozdźělnje reagować. Při přepruwowanju naprawow w krajach „dyrbjeli wobkedźbować, zo so pandemija w Němskej runostajnje njerozšěrja, ale zo móže połoženje regionalnje jara rozdźělne być“, piše šef kanclerskeho zarjada Helge Braun (CDU) w mjezybilancy naprawow přećiwo koronawirusej zapósłancam wulkeje koalicije CDU/CSU a SPD. Dokument powěsćerni dpa předleži. „To móže rěkać, zo dyrbja wobmjezowanja wšědneho žiwjenja we wěstych kónčinach dale wobstać abo so po nachwilnym wolóženju samo hišće přiwótřić“, piše Braun, kiž je sam lěkar. Něšto dnjow do přichodneje telefoniskeje konferency zwjazkoweje kanclerki Angele Merkel (CDU) z ministerskimi prezidentami zwjazkowych krajow přichodny štwórtk Braun potwjerdźi, zo epidemimija dale traje. „Zo bychmy w zajimje wšeho wobydlerstwa přećeženju strowotniskeho systema dołhodobnje zadźěwali, je hišće přezahe kontaktne wobmjezowanja zaso zběhnyć.“

Stara a jednora šijawa je so w hornjobayerskim Morsbachu wo rjany podawk postarała. Wobsedźer nastroj wjace njetrjebaše a wotstaji jón na kromu puća ­jako dar. Zo bě mašinu něhdy jako schow pjenjez wužiwał, je 56lětny dawno zabył. 21lětny wza šijawu sobu domoj a namaka w njej tysac eurow. ­Dokelž wobsedźerja njeznaješe, prošeše policiju wo pomoc, a ta 56lětneho wuslědźi, kiž bě telko sprawnosće dla hnuty.

Pjany kolesowar je so w Zhorjelcu dowěrliwje na zastojnikow Zwjazkoweje policije wobroćił. Zastojnicy běchu w nocy na njedźelu wobkedźbowali, zo 20lětny chětro chabłajo po dróze jědźe. Prjedy hač móžachu jeho zadźeržeć, muž pola nich zasta a so přećelnje wopraša: „Móžeće mje domoj dowjezć?“ Woni pak wzachu jeho sobu na policajsku stražu, hdźež je test alkohola 1,8 promilow wunjesł.