Praha (ČŽ/HJS/K/SN). Nětko su tež na Šumawje (Böhmerwald) prěni raz wjelki zachadźeli. Nadpadnychu na pastwišću narodneho parka w susodstwje Bayerskeje wjetše stadło wowcow, z kotrychž su 19 zakusali a dalše zranili. Štyri wowcy su zhubjene. Njezranjenej wostałoj stej jenička wowca a boran, rjekny mějićel stadła Tomáš Rychecký. Stadło z boranom sewjerofriziskeje rasy a 30 wosebitymi wowcami dyrbješe jemu być zakład za plahowanje wjele mloka dawaceho skotu. Nastata škoda wučinja něhdźe 4 000 eurow, kotruž dóstanje zarunanu.

Naměstny šef Narodneho parka Šumawa Martin Starý rěči wo „nowym nazhonjenju“. W kónčinje sto lět žanych wjelkow było njeje, ale wone su „wažny wobstatk přirody“. Zo njeby k dalšim stratam mjez wowcami dóšło, chce Čěska nětko elektriske płoty testować a z nimi stadła lěpje škitać, hłownje w nocy. Zarjadnistwo narodneho parka je wočakowało, zo wjelki prjedy abo pozdźišo „zasahnu“, po tym zo běchu w měrcu powostanki wjelčicy z Bayerskeho lěsa našli.

Lwow (ČŽ/K/SN). Ludźo zapadoukrainskeho wulkoměsta Lwow bědźa so z hroznym smjerdom a z hromadami wotpadkow. Dlěje hač lěto njerumuja w metropoli ze 730 000 wobydlerjemi wotpadki, piše Mladá fronta dnes, powołaca so na powěsćernju AFP. „Smjerd njeda so wopisać. Hromady smjećow sahaja z městnami hač na druhi poschod“, praji wobydlerka Marija Syderočowa. „Bydlenje njemóžeš hižo přewětrić. Ludźo drje přećiwo njemóžnym poměram protestuja, ale ničo so nječini. Za „smjerdźacej“ katastrofu tča politiske zapletki, dźenik hódnoći. Kijewske knježerstwo winu Lwowskemu měšćanosće Andrijej Sadowyjej dawa, wumjetujo jemu njezamóžnosć organizowanja. Sadowyj ze swojeho boka twjerdźi, zo Kijew mějićelam wotpadkownišćow kaza, z jeho města njepřijimać žane wotpadki. Chce jeho diskreditować z wjećby za to, zo strona Samopomoc, kotrejež šef Sadowyj je, ze 26 zapósłancami knježerstwo w parlamenće hižo njepodpěruje. „Wot toho časa mamy problem, hdźe wšědnje wotbyć 600 tonow wotpadkow.“

Mać z čerstwej całtu k narodninam překwapić chcyše štyrilětny w badensko-württembergskim Gundelfingenje, je pak při tym zasadźenje policije zawinił. Pjerach bě wčera rano samlutki do wobchoda přišoł a sej całtu žadał. Předawarka pak so starosćeše a zawoła policiju. Zastojnicy hólčka na to pěši domoj přewodźachu. Mać bě za nim hižo pytała. Tón bě so skradźu z bydlenja zminył a so nětko z policiju nawróći – wězo z čerstwej całtu za mać jako narodninski dar.

Z awtom so přećisnył a dale jěł je 93lětny na zwjazkowej dróze pola Gery. Na parkowanišću njedaloko městna njezboža w Altenburgskim kraju wón skónčnje zasta. Byrnjež so po wšěm zdaću njezranił, dowjezechu jeho do chorownje. Kak je k njezbožu dóšło, njemóže sej policija tak prawje wujasnić. Muž bě z jězdnje zjěł, do wobhrodźenja prasnył a so přećisnył.

Tel Aviv (dpa/K/SN). Dalše njeměry blisko Temploweje hory w Jerusalemje su sej dźensa 14 zranjenych Palestinjanow žadali. Tež policistaj poćerpještaj zranjenja. Palestinjan, trjecheny wot woclanych, z gumijom wobdatych kulkow, je ćežko zranjeny, rozprawja Palestinski čerwjeny křiž. Strona Fatah prezidenta Palestinjanow Mahmuda Abbasa je na ludnosć apelowała, přewjesć dźensa „dźeń hněwa“. Hamas a Dźihad stej to­horunja k protestam namołwiłoj.

Žada sej wjace respekta

Berlin (dpa/SN). Zwjazkowy prezident Frank-Walter Steinmeier je sej po namócnosćach w Hamburgu w zwisku z wjerškowym zetkanjom G 20 wjace respekta před policiju žadał. „Někotři su respekt před statnymi institucijemi, kaž na přikład před policiju, wočiwidnje zhubili“, rjekny wón nowinarjam. Zdobom warnowaše před alarmizmom: „Demokratija w Němskej njeje wohrožena, najebać krawale.“ Podawki w Hamburgu su jemu dopokaz, zo je stat jednanjakmany.

Wulkopósłanc USA powołany