Tilich zmylki w zwisku ze suicidom přiznał
Łužiski kruh w Brüsselu
Rěčne myto tež w Braniborskej?
Kalawa (SN/at). Nowa braniborska kulturna statna sekretarka a knježerstwowa społnomócnjena za naležnosće Serbow Ulrike Gutheil budźe so přichodne měsacy předewšěm wo rozsudy k serbskemu sydlenskemu rumej starać. Wotpowědne próstwy ma ministerstwo za wědomosć, slědźenje a kulturu na zakładźe Serbskeho zakonja dokładnje pruwować. Tole zdźěla ministerstwa po zetkanju Gutheil ze społnomócnjenymi za serbske naležnosće wokrjesow Dubja-Błóta, Hornje Błóta-Łužica, Sprjewja-Nysa a města Choćebuza wčera w Kalawje.
Serbski społnomócnjeny wokrjesa Dubja-Błóta Dieter Freihoff ma rozmołwu za přewšo wotewrjenu. „Dźěše wo to, so mjezsobnje zeznajomić. Nastupajo serbski sydlenski rum běchu jej naše nazhonjenja jara wažne“, rjekny Freihoff, „runje tak smy jej swoje starosće a nuzy z widom na předwidźane přerjadowanje braniborskich wokrjesow zwuraznili.“
To a tamne (14.10.16)
Dary domchowanki z wołtarja pokradnył je njeznaty w katolskej měšćanskej cyrkwi w delnjofrankskim Hammelburgu. Pomocnikam bě při wottwarje dekoracije nadpadnyło, zo tójšto žiwidłow pobrachuje, kaž policija zdźěli. Natočenja widejokamery pokazuja, kak něhdźe 65lětny muž kofej, słódkosće a zela z wołtarja bjerje – a so po tym pokřižuje. Policija nětko za paduchom pyta.
Při hribypytanju zabłudźiłoj stej so žonje w starobje 43 a 62 lět w Durinskej. Kaž policija zdźěli, běštej wonej w Altenburgskim kraju do lěsa šłoj. Jako po wjace hač šěsć hodźinach puć domoj njenamakaštej, zawołaštej policiju. Policajske psy zabłudźenej žonje skónčnje namakachu. Zastojnicy jeju z lěsa přewodźachu.
Zelenu swěcu za Ceta
Berlin (dpa/SN). Zwjazkowy hospodarski minister Sigmar Gabriel (SPD) je zelenu swěcu zwjazkoweho wustawoweho sudnistwa dźensa w Karlsruhe nastupajo wikowanskeho zrěčenje Ceta witał. „Wěrju, zo smy z dobrymi argumentami wustawowe sudnistwo přeswědčili“, wón w Berlinje wozjewi. Dowolnosć a z tym zwisowace žadanja sudnistwa chce zwjazkowe knježerstwo spjelnić. Gabriel je so za zrěčenje Ceta mjez Europskej uniju a Kanadu zasadźił. Přichodnje chcedźa wuměnjenja sudnistwa na Europskej runinje diskutować.
Za raketu bomby
Al-Hudaida (dpa/K/SN). Na to reagujo, zo su so huthiscy rebelojo z jemenskeho teritorija z raketu na amerisku wójnsku łódź na Čerwjenym morju měrili, su lětadła USA w Jemenje objekty na teritoriju bombardowali, kontrolowane wot zběžkarjow. Wona raketa rebelow wšak ničak (Zerstörer) USS Mason njebě trjechiła a tuž nikoho njezraniła a tež hewak žaneježkuli škody njenačiniła.
Wuwoz wjaznył
Dźesaćitysacy Kolumbiančanow su za zwoprawdźenje měroweho ...
Pawšalnu kritiku wotpokazuje
Drježdźany (dpa/SN). Po sebjemordarstwu podhladneho terora Dschabera al-Bakra w Lipsćanskim jastwje je sakski justicny minister Sebastian Gemkow (CDU) wumjetowanja wotpokazał, po kotrychž móhło so tomu zadźěwać. Po tuchwilnym přepytowanskim stawje je so wšitko činiło, zo njeby so tole stało, rjekny politikar dźensa w Drježdźanach. Za wotstup ze zastojnstwa tuchwilu přičiny njeje. Přiwšěm wón přizna, zo njebě so tole stać směło. Al-Bakr je so ze swojej košlu na lěsycach pójsnył. Ćěło Syričana chcedźa dźensa hišće přepytować. Spočatnje bu podhladny wšitke 15 mjeńšin kontrolowany. Fachowcy pak so wčera popołdnju na interwall 30 mjeńšin dojednachu. Čas pak dosahaše so sam morić.
Sakski ministerski prezident Stanisław Tilich (CDU) je saksku justicu mjeztym zakitował. „Pawšalna kritika bjez toho zo su pozadki jasne, raznje wotpokazuju“, wón dźensa zdźěli. Nětko je dokładna analyza trěbna, zo móhli prawe rozsudy tworić. Dale zakitowaše wón sakskeho justicneho ministra a wupraji jemu swoju dowěru.
Skandal a tragedija
Pochłostanje za zadźerženje?
Sobotniši wobydlerski swjedźeń na Žitnych wikach wuwabja diskusiju
Budyšin (SN/BŠe). Po akciji „Wočiń woči – solidarita město rasizma a namocy!“ zašłu sobotu na Budyskich Žitnych wikach je w zjawnosći k diskusijam dóšło. Přičina: Młodźi ćěkancy sprjewineho města njemóžachu so na wobydlerskim swjedźenju wobdźělić. Zaměr organizatora swjedźenje, towarstwa „Budyšin wostanje pisany“ pak bě, pokazać, zo słušeja Žitne wiki kaž tež cyłe město wšitkim wobydlerjam. Tohodla přihotowachu antirasistiski a swětej wotewrjeny program. Přeprošenje minjenu sobotu bě něhdźe 300 ludźi sćěhowało. Přitomni pak njeběchu młodostni, kotrychž běchu neonacije 14. septembra w Budyšinje přesćěhali. Po wuprajenjach čestnohamtskich sobudźěłaćerjow njesmědźachu so ćěkancy z Budyskich přebywanišćow na Drježdźanskej, Flincowej kaž tež z Wjazońcy a Debrikec wobdźělić. Tole bě Budyski młodźinski zarjad zakazał. Na naprašowanje Serbskich Nowin njejsu so sobudźěłaćerjo zarjada k wumjetowanjam wuprajili.
Za pedagogisku wyšu šulu
Podstupim (dpa/SN). Braniborska krajna staršiska rada žada sej załoženje pedagogiskeje wyšeje šule. Tuta měła specielnje na potrjeby wukubłanja wučerjow wuhotowana a wusměrjena być. Zdobom by tajke kubłanišćo wjace městnow skićiło, kaž tuchwilu na hižo wobstejacych wyšich šulach, zdźěli wčera rěčnik braniborskeje krajneje staršiskeje rady Wolfgang Seelbach nowinje Märkische Allgemeine. „Lětnje so tuchwilu 300 wučerjow wukubłuje, trěbne pak su 1 000“, wón zwurazni.
Jeli njeje wukubłanje na uniwersiće w Podstupimje hižo lukratiwne dosć, měło so wo konkurenčnej wyšej šuli rozmyslować, měni staršiski rěčnik dale. Zdobom wupraji so wón za to, zo měł so wobjim wukubłanja a płaćenje mzdy pola wšěch wučerjow přiměrić. Hač měli so pedagogojo ze zastojnikami stać měło so po cyłej Němskej jenak zrjadować.
Wolfgang Seelbach angažuje so wot lěta 2003 w staršiskich zastupnistwach. Wot lěta 2011 je wón rěčnik braniborskeje staršiskeje rady.
