Steinmeier w Magdeburgu
Magdeburg (dpa/SN). Nimale štyri tydźenje po nadpadźe na Magdeburgske adwentne wiki je zwjazkowy prezident Frank-Walter Steinmeier dźensa město njezboža wopytał. Před hłownym wopomnišćom, cyrkwju swj. Johannisa połoži wón wěnc a zapisa so na to w bliskej radnicy do kondolencneje knihi. Steinmeier porěča po tym z pomocnikami a sanitetarjemi. Skućićel bě z awtom po hodownych wikach smalił. Při tym wón šěsć wopytowarjow morješe a 300 zrani.
Debatuja wunoškow dla
Berlin (dpa/SN). Předsydka Zelenych Franziska Brantner je přilubiła, zo njejsu mali lutowarjo potrjecheni, hdyž kapitalne wunoški za financowanje socialneho zawěsćenja wužiwaja. Chorobne sotry a wobsedźerjo chěžkow njejsu měnjeni, rjekny Brantner w sćelaku ZFD. Přiwšěm wona njepřeradźi, kotre sumy bychu nałožowali. Namjet kanclerskeho kandidata Zelenych Roberta Habecka, z kapitalnymi wunoškami socialne zawěsćeja financować, zbudźa raznu kritiku.
Kuba wita rozsud USA
W dalokej měrje zničene je Gazaske pasmo po bombardowanju přez ...
Biden warnuje před oligarchiju
Jadrowa milina před rozmachom
Paris (dpa/SN). Produkcija jadroweje miliny w přichodźe po přepytowanju mjezynarodneje energijoweje agentury IEA hladajo na po wšěm swěće přiběrace naprašowanje razantnje rozrosće. Zajim na jadrowej energiji je tak wulki kaž po wolijowej krizy w 1970tych lět. Mjeztym chce wjace hač 40 krajow jadrowu energiju wužiwać.
Byrnjež někotre kraje swoje jadrowe milinarnje zawrěli, produkcija miliny w jadrowych milinarjach spochi přiběra. Jadrowa milina wučinja mjeztym dźesać procentow wšeje na swěće produkowaneje miliny, IEA zwěsća. Wona je po wodowej energiji druhe najwjetše žórło na škódnych emisijach chudeje miliny.
Habeck a Scholz před wuběrkom
Berlin (dpa/SN). Přepytowanski wuběrk zwjazkoweho sejma nastupajo wotpinjenje jadrowych milinarnjow je sej na kóncu swojeho dźěła dźensa rozsudneju swědkow přeprosył: Zwjazkoweho ministra za hospodarstwo Roberta Habecka (Zeleni) a zwjazkoweho kanclera Olafa Scholza (SPD). Wobaj chcyštaj so w běhu dnja prašenjam wo pozadku skónčenja atomoweje energije w aprylu lěta 2023 w Němskej wěnować.
Wosebje naprašowanje Habecka měješe wažne njejasnosće w zwisku z wjele diskutowanym rozsudom na njedobro jadrowych milinarjow wujasnić. Wuslědki nam hač do kónca redakciskeho časa njepředležachu.
W zwisku z energijowej krizu po nadpadźe Ruskeje na Ukrainu běchu hižo wobzamknjene wotpinjenje jadrowych milinarjow wo někotre měsacy přestorčili a hakle 15. apryla 2023 doskónčnje zwoprawdźili. Kritikarjo knježerstwu wumjetuja, zo bě wotpinjenje ryzy ideologiska naprawa Zelenych, najebać energijowu krizu, pod kotrejž Němskaj chětro ćerpi.
Wjace pomocy samokubłacym
Rozprawa wo połoženju swójbow w Němskej z wažnymi doporučenjemi
Berlin (dpa/SN). Swójbna politika měła samokubłacych lěpje podpěrować a móžnosće pěstonjenje dźěći prawnisce zakótwić. Tole poruča komisija wěcywustojnych w mjeztym dźesatej swójbnej rozprawje, kotruž je ministerka za swójby Lisa Paus (Zeleni) wčera zwjazkowemu knježerstwu předstajiła.
Ličba samostejacych z dźěćimi pod 18 lětami je w Němskej dale přiběrała a wučinješe 2023 něhdźe 1,7 milionow. To je 20 procentow wšěch swójbow. Lěta 2021 zličichu hišće 1,5 milionow samokubłacych w Němskej.
Serwis za towarstwa
Towarstwa w kónčinach na wsach maja wulki podźěl na tym, zo čuja so towaršnosć a wobydlerjo mjez sobu zwjazani. Angažement a zhromadnosć so wot samo njewuwiwaja. Za to su wobydlerjo trěbne. Dźeń a mjenje towarstwow woznamjenja tuž tež mjenje žiwjenskeje kwality. Minjenej lěće knježeše na Radworskim dwórnišću čiłe žiwjenje. Wob tydźeń bě tam wšelakich poskitkow, kotrež dobru zhromadnosć pěstowachu. Nimo toho móžachu tam zajimcy w najwšelakorišich kubłanskich poskitkach tójšto zajimaweho kaž tež noweho nazhonić a so tak dale kubłachu. Škoda, zo budźe tomu lětsa mjenje. Towarstwa njeměli po prošenje chodźić. Woni trjebaja systematiske poradźowanske abo podpěranske institucije, kotrež jim pomoc skića. Na tute wašnje by so čłonam nadawk prócowanja wo pjenježnu podpěru někajkich spěchowanskich programow wotewzał. Tajki serwis móhli na krajnej runinje tola zarjadować.
Bianka Šeferowa
Ratarjo starosća so mrětwy dla
Drježdźany (dpa/SN). Po wudyrjenju pochromy w stadle buwołow w Braniborskej so zwjazk sakskich ratarjow starosći. „Naši čłonojo su wězo znjeměrnjeni a so nadźijeja, zo so chorosć do Sakskeje njerozpřestrěwa“, rjekny nawodnica referata za zwěrjeću produkciju krajneho zwjazka Juliane Streubel powěsćerni dpa.
Po tuchwilnym stawje je sej wona wěsta, zo staraja so zamołwići w Braniborskej wo to, „zo wostanje mrětwa izolowany jednotliwy pad“. Zwjazk wudźeržuje wuske styki z fachowcami a swojich čłonow derje informuje, wona rjekny. W stadle wodowych buwołow (Wasserbüffel) w braniborskim Hönowje njedaloko Berlina bě mrětwa wudyriła. Je to prěni pad w Němskej po něhdźe 35 lětach.
Streubel namjetuje, hygieniske naprawy konsekwentnje dodźeržeć. „Do dźěła w hródźach měli so drasty desinficěrować“, fachowča potwjerdźi a doda: „W swědomitych zawodach so to tak a tak čini.“ Za čłowjeka njeje wirus strašny. Mjez howjadami, wowcami, kozami a swinjemi pak je wón jara natykliwy. Je-li jenož jeničke zwěrjo w hródźi schorjeło, dyrbja tam wšě panochtaki morić.
To a tamne (16.01.25)
Nohu w lěhadle fyzioterapije zatłusła je sej žona w sewjerorynsko-westfalskim Mönchengladbachu. Tež sobudźěłaćerjo praksy njemóžachu jej pomhać. Tuž wołachu z nuzowym čisłom wo pomoc. Wohnjowa wobora přijědźe z 18 pomocnikami a wulkim kófrom z gratom. Za wuswobodźenje žony trjebachu wobornicy jenož někotre mjeńšiny.
Zahubne wohenje wokoło metropole USA Los Angelesa su tež twórby awstriskeho komponista Arnolda Schönberga (1874–1951) zničili. Twarjenje hudźbneho nakładnistwa Belmont, kotrež wěnuje so zachowanju a spěchowanju hudźbneho namrěwstwa Schönberga, je sobu najwjetši wopor wohenja w měšćanskej štwórći Palisades, nakładnistwo zdźěli. Płomjenja běchu wulki dźěl štwórće zničili. Rukopisy, originalne partitury a wosobinske dokumenty su na přeco zhubjene.
Hospodarstwo dale woteběra
Wiesbaden (dpa/SN). Hospodarstwo Němskeje bě lěta 2024 znowa z recesiju konfrontowane. Nutřkokrajny bruttoprodukt (BIP) – suma wšěch nadźěłanych hódnotow – je přirunujo z lětom do toho wo 0,2 procentaj woteběrał. Z tym wukon hospodarstwa hižo druhe lěto za sobu spaduje. Tež lěta 2023 bě so BIP wo 0,3 procenty znižił, zwjazkowy statistiski zarjad we Wiesbadenje zdźěla. Přičiny su přiběraca konkurenca, droha energija a špatne wuhlady do přichoda.
Zwoprawdźa elektronisku aktu
Berlin (dpa/SN). Po wospjetnym dlijenju elektronisku aktu pacientow wot dźensnišeho zwoprawdźa. Chorobne kasy za wšitkich zakońsce zawěsćenych tajku aktu zapołoža, chibazo potrjecheni tole wotpokazuja. Akta ma informacije wo lěkarskich posudkach, laborowych datach a medikamentach digitalnje składować a pacientow čas žiwjenja přewodźeć. Zawjesć chcedźa aktu najprjedy raz w třoch modelowych kónčinach.
Habeck za europsku platformu
