Zelenskyj dźakuje so Němskej
Dilema dobreho trenda
To a tamne (22.01.25)
Wobšudnika, za kotrymž 140 jebanstwow dla pytaja, su policisća w mecklenburgsko-předpomorskim Neustreelitzu zajeli. Jemu wumjetuja, zo njeje pola telekomunikaciskeje firmy skazane produkty zapłaćił. Při tym je ze 30 wšelakimi identitami wustupował. Jako chcyše minjeny pjatk znowa skazane pakety wotewzać, jeho policija zaja.
Swojim wočam wěrić nochcychu policisća při wobchadnej kontroli w hessenskim Darmstadtće, jako chětro spěšneho wodźerja e-scootera zadźeržachu. Muž twjerdźeše, zo je jězdźidło ze spěšnosću 45 km/h jako moped přizjewjene. Dokelž pak sedło pobrachowaše a prawa čisłowa taflička falowaše, wzachu zastojnicy scooter sobu do techniskeho pruwowanišća: Tam so wukopa, zo móže roler hač do 90 km/h spěšnje jěć. Wobsedźerjej hroža prawniske konsekwency.
Tójšto wukazow prěni dźeń
Prezident USA Trump připowědźa radikalnu změnu dotalneje politiki
Washington (dpa/SN). Prezident USA Donald Trump je hnydom prěni dźeń swojeho zastojnstwa radikalne nutřko- a wonkopolitiske změny přesadźił. 78lětny je bjezposrědnje po zapokazanju wustup zjednoćenych statow z Pariskeho klimoweho zrěčenja a ze Swětoweje strowotniskeje organizacije WHO wukazał.
Politiku swojeho předchadnika Joewa Bidena wón z dźesatkami wukazow zaso zběhny. K zahajenju druheje doby prezidentstwa je Trump 1 500 zasudźenych přiwisnikow wobhnadźił. Tući běchu w januaru 2021 Kapitol namócnje wobsadźili, dokelž wólbnu poražku Trumpa přećiwo Joewej Bidenej njeakceptowachu. Při tym nadběhowachu woni tež policistow. Trump bě jich do toho w bojowniskej narěči k tomu našćuwał. Trump jim wobswědči, „zo njejsu w najwjace padach ničo wopačneho činili“.
Habeck we wuskosćach
Berlin (dpa/SN). Kanclerski kandidat Zelenych Robert Habeck žada sej w padźe intrigi přećiwo Berlinskemu zapósłancej zwjazkoweho sejma Stefanej Gelbhaarej wujasnjenje. Podawki w Berlinskim krajnym zwjazku mjenowaše wón „šokowace“. Gelbhaarej wumjetuja, zo je žony splažnje poćežował. Mjeztym je wón dobre městno na lisćinje k wólbam zwjazkoweho sejma zhubił. Na jeho městno wuzwolichu Andreasa Audretscha, wólbneho bojoweho managera Roberta Habecka.
Dźěło lěkarjow wolóžić
Berlin (dpa/SN). Pjenježne wuměnjenja za dźěło domjacych lěkarjow maja so polěpšić. Hišće do wólbow zwjazkoweho sejma měł zwjazkowy sejm wotpowědnu reformu z pjera ministra za strowotnistwo Karla Lauterbacha (SPD) wobzamknyć. Tole zdźěli strowotniske ministerstwo w Berlinje. Po tym chcedźa bywši partnerojo amploweje koalicije SPD, Zeleni a FDP posledni raz zhromadnje zakoń wobzamknyć.
Mortwi w turkowskim hotelu
Wažne narěče w Davosu
Nowe směrnicy předstajene
Statnicy Trumpej gratulowali
Washington/Berlin (dpa/SN). Statni a knježerstwowi šefojo ze wšeho swěta su Donaldej Trumpej po spřisahanju za noweho prezidenta USA gratulowali.
Zwjazkowy kancler Olaf Scholz (SPD) na to pokaza, zo stej Němska a USA „hižo jara dołho wuskej partneraj a přećelsce zwjazanej. Zhromadnje móžemy rozsudne impulsy swobody, měra a wěstoty za derjeměće a hospodarske wuwiće na woběmaj stronomaj Atlantika sadźeć“.
Ukrainski prezident Wolodymyr Zelenskyj wusměrja swoje nadźije na napinanja noweho prezidenta na dobro měra. Měrowa politika přez sylnosć, kotruž bě wón připowědźił, dowola sylnjenje ameriskeje pozicije na dobro trajaceho a sprawneho měra“, Zelenskyj piše.
Ruski prezident Wladimir Putin zdźěla, zo nadźija so nowych direktnych stykow mjez Moskwu a Washingtonom, kotrež bě Trump připowědźił. Tak móhło so Třećej swětowej wójnje zadźěwać.
Turkowski prezident Recep Tayyip Erdoğan nadźija so dalšeho wobstaća „přećelstwa“ z prezidentom Trumpom.
Bjez priwatnych njeńdźe
Kretschmer: Konop jasnje dźělić
Lipsk (dpa/SN). Sakski ministerski prezident Michael Kretschmer je so za to wuprajił, jasnje dźělić mjez mediciniskim cannabisom a priwatnym wužiwanjom drogi. „Tule w Lipsku wuknjemy, zo stej to dwě wšelakej wěcy, kotrejž dyrbimy jasnje dźělić“, rjekny politikar CDU při wopyće Lipšćanskeje skupiny „Grünhorn“, kotraž wužiwanje cannabisa w zjawnosći rjaduje a organizuje.
Byrnjež Kretschmer priwatnemu wužiwanju konopje dale kritisce nastajeny był, chcył so wón za to zasadźeć, zo w mediciniskim wobłuku konop jako hojenski srědk dale nałožuja. Při tym měli so jasne rjadowanja zdźěłać, kotrež zasadźenje mediciniskeho cannabisa dołhodobnje zmóžnja a jeho wuwiću polěkuja.
Po dźělnym legalizowanju konopje loni su běrokratiske zadźěwki widźomnje znižili. Mjenje trezorow, mjenje papjery za dokumentaciju a mjenje policajskich kontrolow, zdźěla wikowar lěkow Canymed. Unija CDU/CSU bě w přihotach wólbow zwjazkoweho sejma připowědźiła, zo chcyła zakoń k wužiwanju cannabisa zaso wotstronić. Tón rjaduje priwatne a lěkarske wužiwanje.
