Swój „roadtrip“ započach srjedź meje, po tym zo běch so z kolegami, dźěłodawarjemi a konjemi rozžohnowała. Podach so wot wuchoda na zapad – a to po južnym přibrjohu. Prěni stop bě Canterbury – rjane, stare město z mnohimi historiskimi twarami kaž měšćanskej murju a wěžu, cyrkwjemi, małymi haskami z typiskimi korčmami a wobchodźikami kaž tež ze swětosławnej katedralu. Wosebje parki wuprudźeja měrnu atmosferu a skića rjany napohlad. Wot Canterburyja dźěše dale do Dovera, hdźež mějach swój prěni nóclěh. Dover je dźensa znate za mórske łódźe do a z Francoskeje. Z historiskeho wida pak je sławne město předewšěm hrodu „Dover castle“ dla, najwjetšeje twjerdźizny kraja, kotraž so na skale nad městom wupřestrěwa. Tónle hród je Jendźelskej wot 12. hač do 20. lětstotka słužił a je dźensa jara derje zdźeržany muzej, powědacy wo swojich stawiznach. Wot Dovera dojědźech sej po tym do jara małkeho městačka Rye. Wosebitosć tam su stare twary, njeličomne wuske hasy z priwatnymi hosćencami a wobchodami.