Dalše mjezsobne cła
Washington/Peking (dpa/SN). Wikowanska zwada mjez USA a Chinu je nowy schodźenk eskalacije docpěła. Po tym zo bě Washington minjenu nóc dalše cła za twory z Chiny w hódnoće 16 miliardow wurow wukazał, je China dźensa tworam z USA cła w samsnej wysokosći napołožiła. China dyrbi „trěbny napřećiwny nadběh“ přewjesć, rěčnik wikowanskeho ministerstwa w Pekingu zdźěli. Nimo toho chce China Swětowu wikowansku organizaciju informować.
BUND chcył komisiju wopušćić
Berlin (dpa/SN). Hladajo na planowane pušćenje štomow přez energijoweho zastaraćela RWE w Hambachskim lěsu je wobswětoškitna organizacija BUND hrozyła, zo tak mjenowanu wuhlowu komisiju wopušći. Ta chcyše so dźensa znowa schadźować. BUND je ze swojim předsydu Hubertom Weigerom w gremiju zastupjeny. Mjeztym je RWE pušćenje štomow za rozšěrjenje brunicoweje jamy jako „nuznje trěbne“ zakitował.
Kónc za halogenowe lampy
Na wupředatej koncertnej žurli Zhorjelskeje piwarnje Landskron je ...
Wuchadźišćo porno lětu 2014 njezměnjene
Wojerec/Budyšin (SN/at). Delegaća zjězda sakskeje Lěwicy rozsudźa sobotu we Wojerecach wo procedurje k nominaciji krajneje lisćiny strony za klětuše wólby sakskeho sejma. Při tym maja znowa naležnosć na blidźe, z kotrejž dyrbjachu so hižo w aprylu 2014 zaběrać: zaměstnjenje wot Serbskeje Lěwicy namjetowaneje wosoby na wjele lubjacym lisćinowym městnje. Ta chcyše zaručić, zo přisłuša po wólbach Serb abo Serbowka frakciji Lěwicy. Zjězd njeje namjet serbskich lěwicarjow tehdy sćěhował.
Po swojim na to zawjedźenym pruwowanju krajna změrcowska komisija strony poruči, zo Serbska Lěwica, wustawkowa komisija a dźěłowa skupina wólby zhromadnje spomóžny puć namakaja, zo bychu mjeńšinowe prawa při nastajenju kandidatow za krajne wólby w Sakskej zaručili. K tomu njeje dóšło a połoženje zdawa so nimale samsne kaž 2014.
Ministerka žada sej wujasnjenje
Drježdźany (dpa/SN). Zwjazkowa justicna ministerka Katarina Barley (SPD) je sej po wozjewjenju brizantnych nadrobnosćow w zwisku z postupowanjom policije přećiwo reporteram sćelaka ZDF na kromje prawicarskopopulistiskeje demonstracije w Drježdźanach spěšne a dokładne wujasnjenje žadała. „Podawki su přičina so starosćić a zamołwići w Sakskej měli je wobšěrnje wujasnić“, rjekny politikarka powěsćerni dpa. Do toho bu znate, zo bě wjele kritizowane zasadźenje policije přećiwo žurnalistam sobudźěłaćer sakskeho kriminalneho zarjada zawinił, kiž bě so we wólnym času na demonstraciji přećiwo islamej a wukrajnikam měrjaceho so hibanja Pegida wobdźělił. Muž bě team ZDF werbalnje nadběhował a so filmowanju wobarał. Na to policisća reporterow kontrolowachu a su jim tak najebać protest dlěje hač poł hodźiny dźěło znjemóžnili.
Tež serbske wobsahi zapřijate
Wjesne kónčiny tworja jedne ćežišćo strategije sakskeho knježerstwa
Drježdźany/Budyšin (SN/BŠe). Nimo městow tež wjesne kónčiny k dobremu wuwiću Sakskeje přinošuja. Runje wone su wažny region, wšako bydli tam połojca ludźi zwjazkoweho kraja, kotřiž maja mnohe talenty, ideje a so angažuja. Tež předewzaća z wjele dźěłowymi městnami su na wsach zasydlene. To su firmy, kaž na přikład Trumpf we Wjazońcy. Zo měli potenciale wjesnych kónčin dale spěchować, je tuž bytostne.
Minjeny tydźeń je sakski ministerski prezident Michael Kretschmer (CDU) strategiju za wuwiće wjesnych kónčin pod hesłom „Wšelakorosć dožiwić – Přichod zawěsćić“ w Limbachu-Oberfrohnje předstajił. 143 stron wopřijacy dokument wopisuje najwšelakoriše ćežišća.
Digitalizacija a wutwar spěšneho interneta stej wažnej faktoraj wuspěšneje dźěławosće. Mjez cyłkownje 13 wokrjesami Sakskeje zaběra Budyski tuchwilu 8. městno, hdźež je spěšnosć 50 megabitow na sekundu zaručena. Wulki zaměr swobodneho stata je, zo ma kóžda wjes přistup k spěšnemu internetej dóstać.
To a tamne (23.08.18)
Z konjom do železnicy zalězł je muž w awstriskim Bad Mitterndorfje, zo by někotre stacije sobu jěł. Wotjěć pak lokomotiwnik nochcyše. Muž a „Frieda“ dyrbještaj tuž zaso wulězć. Železnica na to skedźbni, zo je transport koni w ćahu „samozrozumliwje“ zakazany. Kurioznu wabjensku akciju za konjacy dwór bě něchtó filmował a do interneta stajił.
Z mopedom do předawarnje zajěła je žona w durinskim Blankensteinje. Wona přijědźe z rolerom přez hłowny zachod, hrabny sej kwěćel a wobchod přez hłowny zachod zaso wopušći. Na zbožo njebě we wobchodźe wjele ludźi a njebu nichtó wohroženy. Žona móžeše spočatnje ćeknyć. Policisća pak ju pozdźišo w bayerskim Lichtenbergu nańdźechu, po tym zo bě tam z mopedom padnyła. Po wšěm zdaću steješe 25lětna pakostnica pod wliwom alkohola a drogow.
Dalšich jědnaće kandidatow
Ličba namjetowanych kandidatow z Delnjeje Łužicy za wólby Serbskeho sejma přiběra. Po towarstwje Pónaschemu je minjeny kónc tydźenja dalši cyłk, Łužiska alianca, nominowansku zhromadźiznu wotměł a jědnaće swójskich namjetow wobzamknył.
Huštań (SN/at). Z namjetowanych kandidatow nastupja dźesaćo w Delnjej Łužicy, jedyn w Hornjej Łužicy, informuje předsyda Łužiskeje aliancy Hanzo Wylem-Kel. Tři wosoby su ze srjedźneje Łužicy. „Podamy tak njepřewidźomne regionalnopolitiske znamjo w zmysle bazoweje demokratije a regionalneho samopostajowanja.“ Přewšo zwjeselace je z wida Łužiskeje aliancy aktiwne sobuskutkowanje mnohich Łužičanow. Předsyda skedźbni „na dóšłe dalše přeća wo kandidaturu, kotrež snano z dodatnej nominowanskej zhromadźiznu wobkedźbujemy“.
Wizije za „2030+“
Budyšin (SN/bn). Towarstwo Partnerstwo za demokratiju (PFD) je wčera w Budyšinje na hłownej žurli krajnoradneho zarjada konferencu „Budyska dźěłarnja za přichod“ wuhotowało. Zastupjerjo zjednoćenstwow, drustwow, wobydlerskich iniciatiwow, policije a měšćanskeje rady diskutowachu za třomi ćežišćowymi blidami wo stawje a perspektiwach sprjewineho města a wokoliny.
Prěni kružk wěnowaše so prašenju, hač a w kotrej měrje je wobdźělenje na towaršnostnym žiwjenju w Budyšinje zaručene. Kaž debata wujewi, drje je poskitk wulki, zajim na nim pak skerje snadny. Měło so přepytować, hač zaleži to na wopačnym wusměrjenju poskitkow abo na njedosahacym wašnju komunikacije. Za druhim blidom pytachu pod hesłom „kooperacija“ bjez konkretneho wuslědka za móžnosćemi, towarstwa a předewzaćelow lěpje ze sobu zwjazać. Třeće, njekontrowersne ćežišćo bě wažnosć čestnohamtskeho skutkowanja za towaršnostnu zhromadnosć.
Poražka za Trumpa
New York (dpa/SN). Mustwo prezidenta USA Donalda Trumpa je ćežku poražku poćerpjeło. Něhdyšeho wólbnobojoweho managera Paula Manforda je sudnistwo dawkoweho jebanstwa a wobšudnistwa dla wobwinowało. Nimo toho je wjelelětny prawiznik Trumpa Michael Cohen přiznał, zo je zakoń wo financowanju wólbneho boja ranił. Woběmaj hrozy wjelelětne jastwo. Politiska škoda za Trumpa njeje hišće wotwidźomna.
Zwjazk: Mizerabelne žně žita
Berlin (dpa/SN). Suchoty dla su ratarjo w mnohich kónčinach Němskeje lětsa wjele mjenje nažnjeli. Pola žita je to z 35,6 milionami tonow 22 procentow mjenje hač loni, kaž Zwjazk ratarjow dźensa na swojej žnjowej bilancy w Berlinje zdźěli. K tomu přińdu wulke škody předewšěm při plahowanju picy za skót. W někotrych regionach dyrbjachu straty mjez 50 procentami a totalnym wupadom registrować. Prezident zwjazka Joachim Rukwied žada sej tuž nuznje trěbny pomocny program Zwjazka a krajow na dobro ratarjow.
Digitalna rada zasadźena
