Protesty přećiwo reformje justicy
Waršawa (dpa/SN). Dźesaćitysacy ludźi je minjene dny we wjacorych pólskich městach přećiwo dwělomnej justicnej reformje narodnokonserwatiwneho knježerstwa protestowało. „Swobodne sudnistwa“ žadachu sej demonstranća mjez druhim před Waršawskim prezidentskim palastom. Při tym dźeržachu pólske a europske chorhoje w rukomaj. Z hesłom „Europa, njepodaj so!“ žadachu sej přećiwnicy knježerstwoweje strony w Krakowje zasahnjenje komisije Europskeje unije. Podobne zarjadowanja ze sta ludźimi wotměchu so mjez druhim we Wrocławju, Poznanju a Szczecinje. Ludźo maja njewotwisnosć pólskeje justicy reformow dla za wohroženu. Po přewzaću mocy lěta 2015 bě knježerstwo kontrolu nad wustawowym sudnistwom a tež powšitkownymi sudnistwami přewzało. Najnowšu eskalaciju bě nanuzowane pensionowanje mnohich sudnikow najwyšeho sudnistwa zbudźiło.
Knježerstwo argumentuje, zo njeje justica wot časa komunizma hižo reformy dožiwiła a zo je tójšto sudnikow koruptnych. Komisija EU přećiwo Pólskej ranjenja europskich zasadow dla přepytuje.
To a tamne (30.07.18)
Listowu wobalku a w njej 1 425 eurow je muž w delnjofrankskim Marktheidenfeldźe před swojej ležownosću namakał. Sprawny namakar list pola policije woteda. Tak njeje jenož wobsedźerja pjenjez, ale tež kwasny porik wozbožił: Pjenjezy we wobalce běchu mjenujcy za kwasnu jězbu myslene, kaž z gratulaciskeje karty wuchadźeše.
Pozdatne klepanje z rowa na kěrchowje w posaarskim Losheimje je zasadźenje policije a wohnjoweje wobory zawiniło. 56lětny bě tam spodźiwne klepanje słyšał a so wulce starosćeše, zo bu snano něchtó žiwy pohrjebany. Kěrchow su tuž dokładnje přepytali. Tež chorobne awto bu zawołane, zo bychu pomocnicy pozdatny wopor spěšnje zastarali. W rowje, z kotrehož bě muž haru słyšał, pak leži hižo dlěje zemrěta žona. Zasadźenje wukopa so skónčnje jako wopačny alarm.
Iniciatiwa MSPI připóznata
Wočakuja 40 procentow plus X
Berlin (dpa/SN). Młoda unija w Bayerskej tak prawje do toho njewěri, zo móhła CSU při wólbach krajneho sejma w oktobru zaso absolutnu wjetšinu docpěć. „Chcemy dale postajowaca móc w Bayerskej wostać“, rjekny předsyda dorostoweje organizacije CSU Hans Reichhart dźensa w ARD. Hladajo na tuchwilne wobstejnosće pak budźe to „jara, jara ćežko“. Wón wočakuje wólbny wuslědk „40 procentow plus X“. Młoda unija zeńdźe so jutře ke krajnej zhromadźiznje.
Powostanki padłych přepodali
Seoul (dpa/SN). Spjelnjejo dojednanje wjerškoweho zetkanja z USA w juniju je Sewjerna Korea smjertne powostanki pozdatnych wojakow USA přepodała, kotřiž běchu w Korejskej wójnje (1950-1953) padnyli. Wojerske lětadło je dźensa sewjerokorejski Wonsan z powostankami wopušćiło a pozdźišo na ameriskim zepěranišću Osan w Južnej Koreji přizemiło, powěsćernja Yonhap zdźěli. Dotal njeje znate, wo kelko ćěłow so jedna. Prezident USA Donald Trump a sewjerokorejski mócnar Kim Jong Un běštaj so 12. junija w Singapurje na akciju dojednałoj.
Lěsne wohenje w Kaliforniskej
W Grjekskej tukaja na zapalerstwo
Pola Podstupima so lěs palił
Šwikaja stejišćo
To a tamne (27.07.18)
Sam ze swojej Cessnu, małej jednopropelerowej mašinu, je so Praski pilot-akrobat Roman Kramařík na woblět zemjekule podał. Hač do 6. septembra chce wón jako prěni čěski lětar globalny kołolět zdokonjeć. Při tym je 26 mjezypřizemjenjow w najwšelakorišich krajach předwidźanych. Prěnje je w Běłohrodźe było. Přelećo europski kontinent zaměri so Kramařík na Bliski wuchod, zwotkelž póńdźe do Indiskeje a Japanskeje, a přeprěčo Pacifik załoži wón do USA.
Njetopyrje w spanskej stwě su w Stuttgarće zasadźenje policije zawinowali. Žona zastojnikow informowaše, zo je so hač do dźesać zwěrjatow do jeje bydlenja w štwórtym poschodźe zabłudźiło. Jako policisća dojědźechu, běchu hišće tři njetopyrje w bydlenju. Z gardinu móžachu kruće škitane zwěrjata popadnyć a w bliskim parku do swobody pušćić.
Etnije njeličić!
Budyšin (SN/at). Krajne dźěłowe zjednoćenstwo Serbska Lěwica wobara so wšitkim pospytam w Sakskej, Němskej a Europje, přisłušnikow etniskich mjeńšin na najwšelakoriše wašnje ličić dać.
„Štóž etnisce wobkrućenemu ludličenju přihłosuje, poda so wědomje na runinu, podatu přez nacionalsocialistisku politiku ludomordarstwa“, rjekny serbski zapósłanc Hajko Kozel (Lěwica). Kozel kaž Serbska Lěwica matej namjet frakcije AfD w debaće wo połoženju serbskeho ludu w krajnym sejmje za strašny, Serbow ličić dać. Nimo toho prašeše so zapósłanc AfD Carsten Hütter statne knježerstwo, kelko Sintow a Romow w Sakskej žiwych je. Postupowanje AfD zrani zakaz po art. 3, wotr. 3 wustawy Zwjazkoweje republiki Němskeje a art. 18, wotr. 3 Sakskeje wustawy etniske daty zběrać. Nimo toho wuzamkuje paragraf 1 sakskeho Serbskeho zakonja wuznaće k serbstwu přepruwować.
Bomba w Pekingu rozbuchnyła
Peking (dpa/SN). Před wulkopósłanstwom USA w chinskej stolicy Pekingu je dźensa bomba rozbuchnyła. Po informacijach swědkow pak njeje wona wjetše škody načiniła. Po dotal njewobkrućenych powěsćach so jedna wosoba zrani. Kaž powěsćernja dpa zhoni, bě něchtó wačok přez płót na teren wulkopósłanstwa ćisnył. Sobudźěłaćer pak jón zaso wróćo na puć ćisny, hdźež wón rozbuchny. Bě to drje samopaslena bomba.
Wjele wotpadkow produkowali
Berlin (dpa/SN). Wobydlerjo Němskeje dale wjele wotpadkow za zapakowanje produkuja. Lěta 2016 bě to cyłkownje 18,16 milionow tonow, wobswětowe ministerstwo zdźěli. To je 0,05 procentow wjace hač lěto do toho a 220,5 kilogramow na wosobu. Přetrjeba zapakowanskeho materiala leži w Němskej dale jasnje nad europskim přerězkom, kotryž wučinja 167 kilogramow. Nimale połojcu (47 proc.) zawinowachu priwatni přetrjebarjo. Sobu wina na hoberskim mnóstwje zapakowanskeho materiala su mjez druhim internetne wikowanje, małe porcije a jědźe a napoje k sobuwzaću.
Rakety na Israel třělili
