Spěchowanje zaručene
Kulow/Spale (SN/BŠe). Wjetši dźěl pjenjez za ponowjenje bywšeje kapałki w Spalach je zaručeny. Dźensa je sakski ministerski prezident Stanisław Tilich (CDU) zamołwitym spěchowansku zdźělenku we wysokosći 269 000 eurow přepodał. „To je wuraz, zo na wjesne dźěle njezabywaja“, zwurazni Kulowski měšćanosta Markus Posch (CDU). Přichodnje chcedźa Spalsku kapałku jako žarowansku halu a sociokulturne zetkawanišćo wužiwać. Tež ewangelske Bože słužby chcedźa tam wotměwać. Tak zwjazuja wjacore funkcije w jednym domje. Tuchwilu pak je dom hišće w špatnym twarskim stawje. Cyłkownje 400 000 eurow je za ponowjenje pod škitom pomnikow stejaceje kapałki trěbnych.
Dalšu spěchowansku zdźělenku stej zapósłanča zwjazkoweho sejma Marja Michałkowa (CDU) a Stanisław Tilich Kulowskemu městu přepodałoj, zo móhli tamnišu wjacezaměrowu halu pod energetiskimi saněrowanskimi zaměrami ponowić. Tak dóstanu z programa „Mosty do přichoda“ 121 313 eurow.
Přećiwo podpěraćelam IS
Düsseldorf (dpa/K/SN). Z wulkoraciju w dźesać zwjazkowych krajach přećiwo pozdatnym podpěraćelam teroristiskeje milicy Islamski stat (IS) su policisća wjace hač 30 bydlenjow a wobchodow přepytali. Jedne z ćežišćow zasahnjenja běše Pulheim (wokrjes Rhein-Erft), hdźež tukachu na centralny skład radikalno-islamistiskeho zjednoćenstwa Wěrna nabožina. Zwjazkowy nutřkowny minister Thomas de Maizière (CDU) bě zjednoćenstwo Wěrna nabožina a wot njeho organizowane rozdźělowanje korana zakazał.
Obama hišće raz do Němskeje
Washington (dpa/K/SN). Krótko do swojeho wusłuženja 30. januara přileći prezident USA Barack Obama hišće raz do Europy. Dźensa wopyta wón Grjeksku. Jutře wječor wočakuja jeho w Berlinje. Do wotlěta bě wón europskim partneram wědźeć dał, zo je nadźije na kontinuitu w NATO. Jeho designowany naslědnik Donald Trump bě jemu w rozmołwje wulki zajim na zdźerženju strategiskich jadrowych poćahow wopokazał.
Konferency wo změnje klimy
Putin a Trump sej přezjednaj
Minister zajaty
To a tamne (15.11.16)
Orchester rudnohórskich jandźelow steji wot dźensnišeho w japanskim kejžorskim palasće. Při zetkanju z kejžorom Akihitom a kejžorku Michiko je zwjazkowy prezident Joachim Gauck orchester jandźelow dźensa přepodał, zdźěli manufaktura Wendt & Kühn z rudnohórskeho Grünhainichena. K tomu běchu 14 figurow hudźbnikow wuzwolili. Rudnohórske jandźele su mjeztym tež na Dalokim wuchodźe znate a woblubowane.
Něhdźe 40 000 eurow škody načinił je wóslik we wuchodohessenskim Schlitzu, jako do 300 000 eurow droheho sportoweho awta kusaše, parkowaceho bjezposrědnje při pastwišću. Dotal hišće njewědźa, hač bě so wóslik wot oranžoweje barby sportoweho woza přiwabić dał abo hač awta prosće hidźi. Ratarski zawod, kotremuž wóslik słuša, njetrjeba škodu zarunać: To přewozmje zawěsćernja.
Přećel Ruskeje dobył
Sofija (dpa/K/SN). Wurisanske koło wólbow prezidenta je kandidat socialistiskeje opozicije a přećel Ruskeje Rumen Radew jasnje dobył. Za njeho je po wuličenju nimale wšěch wotedatych hłosow 59,35 procentow wolerjow hłosowało. Kandidatka byrgarskeho knježerstwa Cecka Carčewa dósta jeničce 36,34 procentow přihłosowanja. Ministerski prezident Bojko Borisow je po poražce kandidatki knježerstwa po wočakowanju swój wotstup připowědźił.
Jeja z Němskeje zničene
Kopenhagen (dpa/SN). W Danskej su započeli statysacy jejow zničić, kotrež bě wot ptačeje gripy potrjecheny zawod w sewjernej Němskej dodawał. W plahowarni pjerizny w Grumby w Šleswigsko-Holsteinskej běchu strašny wirus H5N8 namakali. Na to 30 000 kokošow morichu. Zawod bě něhdźe 300 000 jejow kormjerni w danskim Baekke njedaloko Koldinga dodawał. Mnóstwo wotpowěduje 10 000 paletam po 30 jejach.
Ekshuměrowanje zahajene
We Wochožanskej brunicowej jamje womłodźeja tuchwilu Łužiski bagr ...
Nowy prezident drje namakany
Stabšefa Trump hižo ma
Přihotuja konferencu
Njebjelčicy (SN). Časowy plan klawzury iniciatiwy za Serbski Sejm minjenu sobotu w Njebjelčicach bě derje pjelnjeny. Dopołdnja předstaji dr. Handrij Kluga, předsyda Drježdźanskeho towarstwa „Stup dale“, pozicisku papjeru ke kritiskej situaciji serbskorěčneho kubłanja. Hłowny zaměr je dołhodobne zesylnjenje a rozšěrjenje serbskeje rěče přez wšelake naprawy. Dale rozmyslowachu wo tym, stejišćo jako zakład zjawneje diskusije k wažnym prašenjam serbskeje kubłanskeje politiki wužiwać. Bórze wozjewjeny dokument wobroći so jako namjet na wšitke serbske kubłanske institucije a angažowane zajimcy z ludnosće. Spočatk noweho lěta chcedźa kubłanskopolitisku konferencu ze wšěmi wažnymi akterami organizować. Na njej ma so zhromadne stejišćo z konkretnymi zaměrami a žadanjemi formulować, kaž z nowinskeje zdźělenki iniciatiwy wuchadźa.
