Sejm so prašeć
To a tamne (03.11.16)
Přećiwo domjacym nadawkam stawkować chcedźa swójby w Španiskej. Přičina je hoberske mnóstwo nadawkow, kotrež tam dźěćom nabrěmjenjeja. Spočatnje chcedźa jenož kónc tydźenja domjace nadawki ignorować. Zaměr kampanje wšak je tele nadawki dospołnje wotstronić. Po přepytowanjach EU dyrbja šulerjo w Španiskej tydźensce 6,5 hodźin za domjace nadawki nałožić, w Němskej porno tomu jeno 4,7 hodźin. Jeli stawk ničo njewunjese, chcedźa jón klětu na wšitke dny tydźenja rozšěrić.
Pjany pěšk na awtodróze A 4 je wobchadne njezbožo zawinił, při čimž pak so na zbožo jeno snadnje zrani. 45lětny běžeše wosrjedź jězdnje. Při kontroli naměrichu zastojnicy pola njeho 1,8 promilow alkohola w kreji. Njezbožo sta so wčera wječor při Porchowskej wotbóčce do směra na Drježdźany.
Katolsku chorownju chwalił
Berlin (B/SN). Chorownja swj. Jadwigi, wobstejaca 170 lět, je najstarša Berlinska chorownja w nošerstwje katolskeje cyrkwje. Na swjedźenskim zarjadowanju wobdźěli so tež Prěni měšćanosta Michael Müller (SPD). W narěči wón chwaleše, zo steji chorownja za „žiwu mjezyčłowjeskosć“. Wot załoženja pomha wona pacientam, njehladajo na jich nabožinu a pochad. Tež dźensa wukonja wažny přinošk k tomu, zo wostanje rosćaca stolica „čłowjeska a solidarna“.
Zwjazani we wšelakorosći
Genf (B/SN). Lutherski swětowy zwjazk (LWB) a katolska cyrkej stej do swjatočnosćow k 500. róčnicy reformacije swoje zhromadnosće wuzběhnyłoj. Po lětstotkach trajacych napjatosćach a konfliktach su katolscy a ewangelscy wěriwi 31. oktobra prěni raz na globalnej runinje zhromadnje w šwedskim Lundźe na reformaciju spominali. Zhromadnu Božu słužbu swjećeštaj tam bamž Franciskus a prezident LWB, biskop Munib Younan.
Modlić so za přesćěhanych
Knježerstwo kritizowane
Berlin (dpa/K/SN). Něhdyši šefredaktor turkowskeje opozicionelneje nowiny Cumhuriyet Can Dündar je zwjazkowe knježerstwo za to kritizował, zo njeje na zajeća w Turkowskej přisłušnje reagowało. Reakcija němskeho knježerstwa bě zawěrno słaba, tež w přirunanju z druhimi zapadnymi partnerami Turkowskeje, tak na přikład USA“, Dündar rjekny. „Berlin zajeća ani zasudźił njeje. Nam turkowskim žurnalistam ničo njepomha so starosćić.“ Wot europskich knježerstwow wočakuje wón jasny signal za demokratiju w Turkowskej.
Přiměr bróni za Aleppo
Moskwa (dpa/SN). Ruske wójsko je za zajutřišim, pjatk, za syriske město Aleppo dalši přiměr bróni připowědźiło. Šef generalneho staba Walerij Gerasimow je wojowarjow opozicije namołwjał, wobstupjeny wuchodny dźěl města wopušćić. Za to budźetej dwě wosebitej čarje zarjadowanej, bjez wojakow a bróni knježerstwa, wón přilubi. Ciwilistam a zranjenym su šěsć čarow přihotowali. Přiměr ma wot 9 hač do 18 hodź. trać.
Němcy bychu Clinton wolili
Gabriel pomina fairne wuměnjenja
Wopomnišćo jako kubłanišćo
W awgusće 1956 bě ministerstwo za statnu bjezstrašnosć NDR prěnich politiskich jatych z chłostarnje Brandenburg-Görden do wosebiteho jastwa Budyšin II přepołožiło. Spěchowanske towarstwo Budyske wopomnišćo z.t. a zapósłanča zwjazkoweho sejma Marja Michałkowa (CDU) stej minjeny štwórtk tejle róčnicy zarjadowanje wěnowałoj.
W Berlinje wo „Smolensk“ njerodźa
Z nowym filmom wo lětadłowym njezbožu w ruskim Smolensku chce Pólska tragiski podawk znowa tematizować. W Berlinje pak wo dwělomny pask dotal njerodźa.
To a tamne (02.11.16)
Nuzowe borzdźidło sćahnyłoj staj mužej na Bremenskim dwórnišću, dokelž běštaj wulězć zapasłoj. Intercity bě mjeztym hižo wotjěł. Mužej w starobje 32 a 53 lět ćah zadźeržeštaj a dźěštaj po kolijach wróćo na nastupnišćo. Wobchad ćahow bě nachwilnje přetorhnjeny. Tak je so 15 ćahow wo dohromady 185 mjeńšin zapozdźiło. Policija wšak wobeju zaja a nětko přećiwo nimaj přepytuje. Železnica drje jimaj tohorunja zličbowanku staji.
Na přistajensku rozmołwu wosebiteho razu je 25lětna ke Göppinskej policiji přijěła. W nocy na wutoru wokoło 3.30 hodź. wona na straži wo to prošeše, ju jako policistku přistajić. Zastojnicy město toho alkohol natutkaneje přepruwowachu a naměrichu dwaj promilej. Jězbnu dowolnosć dyrbješe žona hnydom wotedać. Hač ma přeco hišće zajim za dźěłowe městno, wšak znate njeje.
Čěska sobu přećiwo migrantam
Praha (dpa/SN). Čěska pomha Serbiskej prěni króć při zawěsćenju mjezow. Cyłkownje 55 zastojnikow je so dźensa z Prahi na puć do směra na Serbisku a Makedonsku podało. Tam maja pomhać, migrantam puć po tak mjenowanej balkanskej čarje do Europy zaraćić. „Ilegalneje migracije dla je so wěstotne połoženje w Europje pohubjeńšiło“, rjekny čěski policajski prezident Tomáš Tuhý powěsćerni ČTK při rozžohnowanju zastojnikow. Čěska so zhromadnje z Madźarskej, Pólskej a Słowakskej za to zasadźa, balkansku čaru dołhodobnje zawrěć.
Armeja město nadběhuje
Mossul (dpa/SN). Irakske elitowe jednotki su dźensa započeli nakromne dźěle města Mossula nadběhować, hdźež knježi teroristiska milica Islamski stat. Po informacijach kurdiskeho sćelaka Rudaw su mjeztym razne boje wudyrili. Wot USA nawjedowana mjezynarodna koalicija iraksku armeju z lětadłami podpěruje. Mossul je poslednje wulke město w rukach Islamskeho stata w Iraku.
Koaliciske jednanja
