Žadaja sej cofnjenje Israela
New York (dpa/SN). Z jasnej wjetšinu 124 hłosow je sej hłowna zhromadźizna UNO cofnjenje Israela z wobsadźenych palestinskich kónčin w běhu lěta žadała. 43 statow – mjez nimi Němska – je so hłosa wzdało. W najwjetšim gremiju UNO je 193 krajow zastupjenych. Israel hłosowaše zhromadnje z USA a dwanaće dalšimi krajemi přećiwo rezoluciji UNO, kotraž njeje zawjazowaca. Rezolucija zmóžnja prawniski posudk najwyšeho sudnistwa UNO wo wójnje na Bliskim wuchodźe.
Zelenskyj chce lěpši škit
Kijew (dpa/SN). Ukrainski prezident Wolodymyr Zelenskyj je zapadnych partnerow namołwjał, tempo při dodawanju lětadła wotwobaracych systemow zwyšić. Runje nazymu je skutkowny škit přećiwo lětadłam wažny, dokelž měri so ruske wójsko znowa na zastaranje Ukrainy z energiju a ćopłotu. Ruski prezident Wladimir Putin je wčera wukazał, ličbu přistajenych ruskeho wójska zwyšić.
Biden bórze w Němskej?
Z mobilnymi škitnymi sćěnami hotuja so w Braniborskej, kaž tule w ...
Guterres warnuje před eskalaciju
Madźarska chce azyl změnić
Budapest (dpa/SN). Madźarska chce kaž Nižozemska prawidła azyloweho prawa zběhnyć. Tole je madźarski minister za europske naležnosće János Bóka připowědźił. „Přećiwo ilegalnej migraciji je razne postupowanje trěbne“, piše wón internetnje. Tohodla chce Budapest wo to prosyć, tute prawidła wopušćić směć, jeli zrěčenja EU tole dowoleja.
Do toho bě Nižozemska pola komisije próstwu zapodała, prawidła azyla zběhnyć směć. Prawicarski populist Geert Wilders, kiž sedźi ze swojej radikalno-prawicarskej Stronu za swobodu (PVV) prěni króć w knježerstwowej koaliciji, rěčeše wo wažnym signalu, „zo wěje nowy wětřik w Nižozemskej“. Zběhnjenju prawidłow bychu wšitke kraje EU přihłosować dyrbjeli, štož njeje wotwidźomne.
Michałkowa: Wostańće sćerpni!
Scholz ničo dobyć njemóže
Wólby krajneho sejma w Braniborskej móhli SPD w Berlinje přetřasć
Berlin (dpa/SN). Zwjazkowy kancler Olaf Scholz je daloko preč, hdyž přichodnu njedźelu we 18 hodź. w telewiziji prěnje prognozy wo wólbach krajneho sejma w Braniborskej wozjewja. To je pola njeho runje w 12 hodź: Politikar SPD wobdźěli so mjenujcy na wjeršku UNO wo prašenjach přichoda w New Yorku.
Snano pak je kanclerej samo jara lube, zo móže sej wólbne wuslědki najprjedy raz z wěsteje zdalenosće wobhladać. Dobyć wšak Scholz při tutych wólbach tak a tak ničo njemóže. Jeli ministerski prezident Dietmar Woidke swój zaměr docpěje a SPD tola hišće k wólbnemu dobyću před tuchwilu nawjedowacej AfD wjedźe, budu prajić: „Wón je dobył, dokelž njeje sej kanclera na wólbne zarjadowanja přeprosył.“ Jeli Woidke jenož druhe městno wobsadźi a tamnej wosobje wutworjenje noweho knježerstwa přewostaji, potom drje budźe so šěrić, zo je Scholz ze swojim zwadźenym knježerstwom na tym wina.
Zmužitosć trěbna
By wšak woprawdźe zadźiwało, by-li Marja Michałkowa wědźała, z kim móhli w Sakskej po wólbach krajneho sejma nowe knježerstwo zestajeć. Snano ma předsyda CDU Friedrich Merz w Berlinje někajki namjet. Sakski ministerski prezident Michael Kretschmer by dźakowny był. Tute swoje połoženje wšak je CDU sama zawinowała, dokelž je so z lutymi wohnjoškitnymi murjemi na prawym kaž tež lěwym boku politiskeho swěta zamurjowała. Zo budźe situacija po wólbach w Braniborskej přewidniša, njewěrju. Tež nowowólby, z kotrymiž je sakski ministerski prezident w padźe zwrěšćenja prócowanjow wo nowe knježerstwo hižo hrozył, njebychu politiske połoženje zasadnje změnili. Tuž měli drje wo tym rozmyslować, hač palne murje woprawdźe dale pomhaja.
Štóž do slepeje hasy wotboči, njetrjeba so dźiwać, zo dale njeńdźe. Štóž so zamurjuje, dyrbi z tym ličić, zo sedźi w ćmě. To njepomha sćerpnosć ale jenož zmužitosć, so wuswobodźić. Marko Wjeńka
To a tamne (19.09.24)
Agresiwnej wjewjerčce stej w ćahu w Jendźelskej sobujěducych nadběhowałoj a dospołny chaos načiniłoj. Pasažěrojo dyrbjachu do druhich wagonow ćeknyć. Železnicar durje wagona zamkny, zo njebyštej zwěrjeći hišće wjace njeměra zbudźiłoj. Skónčnje jězbu na lětanišćo Gatwick pola Londona skónčichu a ćah do Readinga wróćo pósłachu. Njeje wuzamknjene, zo su někotři ludźo wjewjerčkow dla swoje lětadło skomdźili.
Tójšto municije z časa Druheje swětoweje wójny namakali su při twarskich dźěłach w bywšej kasernje w Lipsku. Pod zemju chowaše so wjace hač 80 tankowych pjasćow (Panzerfaust) a 1 800 patronow. Fachowcy za znješkódnjenje municije zwěsćichu, zo njemějachu tankowe pjasće zapalak. Dokelž aparaty dalšu municiju w zemi signalizowachu, tam dale pytaja. Ewakuowanje susodow njeje trěbne.
Ukrainske plany za F-16 hotowe
Kijew (dpa/SN). Ukrainske wojerske lětarstwo je plany k zasadźenju wot zapada přewostajenych bojowych lětadłow typa F-16 zdźěłało. Wšitke nadawki su postajene, rjekny ukrainski prezident Wolodymyr Zelenskyj w swojim wječornym widejowym poselstwje. Europscy partnerojo su Ukrainje 60 lětadłow F-16 přilubili, dotal pak jenož někotre eksemplary přepodali. USA chcedźa jenož brónje a techniski material přinošować.
Nahladnosć Merza snadna
Berlin (dpa/SN). Jenož pjećina wšěch ludźi (19 procentow) ma předsydu CDU Friedricha Merza po najnowšim woprašowanju za kmaneho kanclerskeho kandidata. Najwjace woprašanych, 30 procentow, ma zakitowanskeho ministra Borisa Pistoriusa (SPD) za lěpšeho kandidata za zwjazkoweho kanclera. Tole je slědźenski institut Forsa při woprašowanju w nadawku sćelaka RTL zwěsćił. Wólby zwjazkoweho sejma su za lěto.
AfD žada sej přepytowanje
