Moskwa (dpa/SN). Ruski powětrowy škit je minjenu nóc po oficialnych informa­cijach tójšto trutow wottřělił, kotrež ­měrjachu so na stolicu Moskwu. Nad Moskwu a we wokolinje stolicy su dwanaće objektow zničili, zdźělištaj měšćanosta Sergej Sobjanin a guwerner Moskowskeho wobwoda Andrej Worobjow.

W městačku Ramenskoje njedaloko stolicy je 46lětna žona žiwjenje přisadźiła, jako w jeje domje po nadpadźe trutow woheń wudyri. Dźesatki ludźi dyrbjachu ewakuować. Na třoch Moskowskich lětanišćach dóńdźe k zapozdźenjam a wupadam. Tež w druhich kónčinach Ruskeje rozprawjachu wo nadpadach trutow. W Brjansku su 59 trutow wottřělili, guwerner Alexander Bogomas zdźěli.

Berlin (dpa/SN). Wot zwjazkoweje nutřkowneje ministerki Nancy Faeser (SPD) připowědźene pomjezne kontrole po měnjenju Berlinskich Zelenych swój zaměr njedocpěwaja. „Pomjezne kontrole wěstotu Němskeje njezwyša, ale policiju přidatnje wobćežuja“, rjekny krajny předsyda Philmon Ghirmai. Kontrole poće­žuja dojězdźowarjow kaž tež transport tworow a změja drastiske wuskutki za hospodarstwo, je sej wón wěsty.

Po njedawnych bolostnych přiwótřenjach prawa na azyl nětko tež mjezy za­wrěć, „je jenož w zajimje prawicarsko-ekstremistiskich stron“, Ghirmai rjekny. Wón sej žada, nawróćić so k wěcownej politice. Naprawy ranja nimo toho europske prawo a Schengenske zrěčenje.

Faeser bě nachwilne kontrole při wšitkich mjezach Němskeje wukazała. Přidatne kontrole maja so 16. septembra zahajić a najprjedy raz šěsć měsacow trać. Jako přičiny mjenowaše wona nimo njeregularneje migracije tež škit nutřkowneje wěstoty a wohroženje přez islamski terorizm a kriminalitu.

Jednanja wo nowym knježerstwje w swobodnym staće zahajene

Drježdźany (dpa/SN). Sakski ministerski prezident Michael Kretschmer (CDU) je so z předsydku BSW Sahru Wagenknecht zetkał. Rozmołwa je so wčera popołdnju w Berlinje wotměła, CDU zdźěla. Zaměr zetkanja bě „pruwować móžnosće konstruktiwneho zhromadneho politiskeho dźěła“. Přichodne dny chcedźa nětko rozmołwy mjez CDU a BSW w Sakskej za­hajić, w Drježdźanach rěkaše.

Kretschmer a Wagenknecht staj so po informacijach CDU wo politiskim połoženju w swobodnym staće, wo nowych móžnosćach direktneje demokratije a wo předźěłanju koronapandemije rozmołwjałoj. Tež temy krajneje politiki kaž kubłanje, wěstota a socialna politika hrajachu rólu. Nimo toho staj sej swoje pozicije wo wonkopolitiskich temach wuměniłoj.

Za čas wólbneho boja bě Kretschmer kritisce na pospyty Wagenknecht reagował, sakskej a durinskej CDU wumě­njenja zhromadneho dźěła nadiktować. ­„Časy politběrowa su nimo, jako móžeše něchtó w Berlinje postajić, što so tule na městnje stawa“, rjekny wón hišće před třomi tydźenjemi.

„Trachten Sie danach, sich an terroristischen Aktivitäten, Spionage, Sabotage oder Genozid zu beteiligen, oder haben Sie sich jemals an derartigen Aktivitäten beteiligt?“ je prašenje, kotrež kóždy „legalny“ wopytowar USA znaje. Zawěsće je tajkale „pomjezna kontrola“ někotrehožkuli islamista wottrašiła, swój „bohuspodobny“ atentat zwoprawdźić. A kóždy, kiž je zadwělowany dosć, so pašowarjam dowěrić, kotřiž „njeregularnu migraciju“ přez morjo a/abo w zapječatowanym nakładnym awće organizuja, so najskerje hižo za Němsku njerozsudźi, dokelž móhła patrulja přistupej zadźěwać. W najlěpšim padźe słuži nawrót do časa před Schengenom k tomu, powšitkownemu spomalenju polěkować, štož ewentuelnje tomu abo tamnej zmóžnja, swój rozum do horšće brać a wo tym rozmyslować, hač je snano tola hinašich „maćerjow problemow“, kotrymž měli so wěnować – z naposledk lěpšimi wuhladami na wuspěch a za perspektiwisce wo wjele mjenje pjenjez. Bosćan Nawka