Tež juniorojo jěchanskeho sporta, kotřiž su aktiwni w konjacym towarstwje Při Klóšterskej wodźe, su so na sezonu 2019/2020 połni elana přihotowali. Po tym zo mějachu zymsku přestawku, so konje a sportowcy mjeztym wjacore tydźenje zaso na wubědźowanja přihotuja.

Zo bychu sej konje kondiciju a dosć myškow za dołhu jěchansku dobu přiswojili, přewjedźechu spočatk lěta, takrjec do zazběha zeleneje sezony, někotre treningowe kursy. Wosebje młodźi jěcharjo so na tajkich kónctydźenskich zarjadowanjach wobdźělichu, zo bychu za sebje a za swojeho štyrinohača hišće někotre wažne pokiwy za nadawki na wubědźowanjach dóstali. Tak su so tež mnozy juniorojo z konjaceho sportoweho towarstwa Při Klóšterskej wodźe Pančicy-Kukow wot januara hač do měrca přeco zaso na treningowych zarjadowanjach wobdźěleli.

We Worklecach kaž tež w Pančicach-Kukowje přichodne tydźe­­nje a měsacy wjac při wysokim saku wo dypki wojować njebudu. Wolejbulowa sezona je dočasnje skónčena. To konkretnje rěka: Mišterstwo je sej jenož te mustwo wudobyło, kotrež so po dypkach wjac wot prěnjeho městna storčić njeda. Postupić pak smědźa wšitke te cyłki, kotrež móhli teore­tisce hišće­ słónčne městno tabulki docpěć. Wone pak dyrbja za to wosebitu próstwu zapodać. Wšitke mustwa w pincy tabul­ki, kiž so teore­tisce wjac ze zestupneho městna wuswobodźić njemóža, tež zestupja. Wšitke tamne wostanu w stafli. Što pak to nětko za wolejbulowe mustwa z Worklec a Pančic-Kukowa rěka­, chcyše Jurij Bjeńš wědźeć.

W Budyskim wokrjesu je wobwodna klasa žonow najniša. W njej wojujetej hnydom dwě serbskej mustwje wo dypki: Viktoria Worklecy a rezerwa Hrajneho zjednoćenstwa Pančicy-Worklecy. Wobaj cyłkaj nimatej z hornim dźělom tabulki žadyn kontakt a tak za njej dočasny kónc žanu rólu njehraje. Wšako wobaj tež zestupić njemóžetej.

Wostanu w lize a chcedźa wo mišterstwo hrać

Přeco zaso raz je rěč wo tak­ mjenowanych „žónskich kwotach“. Mjenowane rjadowanje ma zaručić, zo w gre­mijach, zarjadnišćach, stronach a podobnych kruhach tež wěsty podźěl žonow wobkedźbuja. Mjeztym zo so na zjawnych zarjadach a w orga­niza­cijach přewažnje po njej maja, wo „žónskej kwoće“ w priwatnym hospodarstwje přeco hišće kontrowersnje diskutuja, a to ma swoje přičiny.

Rozumne na kóždy pad je, zo na polu sporta lědma štó chutnje na to mysli sej žadać, zo ma so při zestawje mustwow tež na dosć žonow dźiwać. To wězo tež njeńdźe, wšako přewjeduja so we wjetšinje sportowych družin separatne wu­bědźowanja za žony a muži. W běhu minje­nych lět pak je wjele disciplinow k tomu přišło, za kotrež běchu něhdy jenož­ mužojo woprawnjeni so wubědźować, kiž pak su mjeztym hižo něšto lět tež za žony samozrozumliwe. W někotrych padach drje njeby sej to čłowjek před něšto lětdźesatkami scyła před­stajić móhł. Myslu tu jenož na kopańcu, na pjasćowanje abo na sněhakowarske skakanje.

Wirtuelnje sportować

Serbski Sokoł, třěšny zwjazk serbskich sportowčow a sportowcow, zběra dale­ wuslědki prěnjeho tak mjenowa­neho wirtuelneho sportoweho wubědźowanja. Wšitke starobne skupiny smědźa doma kolesować, walkować, kročele ličić, běhać abo z koparskim bulom žonglě­rować a wuslědki serbskim Sokołkam a Sokołam přez digitalny formular zdźělić. Tón dóstanjeće mjez druhim tež přez naprašowanje na mejlowu adresu . Wobdźělenje ničo njepłaći, „startowy pjenjez“ pak smě so na spě­chowanske towarstwo Serbskeje wyšeje šule „Michał Hórnik“ Worklecy za so­cialny projekt přepokazać. Sportowa akcija traje hišće hač do 14. meje.

Šulski sport so dale wotměwa

Šulerki a šulerjo Wyšeje šule Slepo móža­ wot wčerawšeho swoje domjace sportowe wuslědki wučerjam digitalnje zdźělić. Zo by wšitko sprawnje wotbě­žało, dyrbi dorosćena wosoba sportowy wukon wobkrućić. Tak smědźa na přikład šulerjo 8. lětnika pak 8 kilometrow kolesować, skatować abo joggować abo 8 000 kročelow pospochi pućować.

Hłownu a wólbnu wotprajili