Porjedźenka
To a tamne (21.08.25)
Dokelž lodowc blisko města Hallstatt w Awstriskej spěšnje taje, su nětko, po 50 lětach, prěni raz zaso drjewjane powostanki lifta widźeć. Tutón běchu w 1970tych lětach natwarili, jako ludźo w lěću hišće na lodowcu sněhakowachu. Něšto lět po tym zo běchu lift natwarili, bě so wón zasněžił a w lodowcu hory Dachstein zhubił. Změny klimy dla lodowcy dźeń a spěšnišo taja a tuž su tež historiske powostanki zaso widźeć.
W Berlinje dyrbja ludźo, kiž swoje wotpadki w měsće ležo wostawaja, w přichodźe jasnje wjace pokuty płaćić. Za zbytki cigaretow budźe to nětko 250 město 55 eurow, za ilegalnje na chódnikach abo w lěsu wotstajene spěrawe wotpadki samo 1 500 do 11 000 eurow, wotwisujo wot mnóstwa wotpadkow. Z wysokimi pokutami chce město zanjerodźenju zjawnych městnow zadźěwać.
Scheuera wobskorža
Berlin (dpa/SN). Statne rěčnistwo w Berlinje wobskorža něhdyšeho zwjazkoweho ministra za wobchad Andreasa Scheuera. Jemu wumjetuja, zo je před přepytowanskim wuběrkom zwjazkoweho sejma wo temje mawt njespřisahany wopaki wuprajił. Zhromadnje ze Scheuerom wobskorža tež něhdyšeho statneho sekretara Gerharda Schulza, zdźěli rěčnik statneho rěčnistwa. Wosebiteho wuznama njeskutka dla, su Scheuera před krajnym sudnistwom wobskoržili.
Putin zetkanju přihłosuje
Washington (dpa/SN). Ruski prezident Wladimir Putin je po wuprajenjach Běłeho domu zetkanju z prezidentom Ukrainy Wolodomyrom Zelenskijom wuraznje přihłosował. Na prašenje reportera wotmołwi rěčnica Karoline Leavitt: „To wón je.“ Do toho hišće bě so wona wjacorym podobnym prašenjam stajnje zaso wuwinyła. Z Moskwy sameje hišće ničo znate njeje. Wonkowny minister Sergej Lawrow je prajił, zo so na rozmołwach w kóždymžkuli formaće wobdźěla.
Přemało lěkarskeho dorosta
Stara cyrkej města Kiruna w Šwedskej dyrbi přećahnyć. Přičina ...
Studenća z Chile bórze w Sakskej
Santiago de Chile (dpa/SN). Sakska wabi wo studentki a studentow z Chile. Za to su we hłownym měsće kraja wědomostny zwjazowanski běrow wotewrili. Z jeho pomocu chcedźa młodych ludźi w kraju za studij na wysokich šulach w swobodnym staće zdobyć. Podobne běrowy maja hižo w Taiwanje, Uzbekistanje, Vietnamje, Mongolskej a Indiskej.
Nimo zaměrneje akwizy studentow a z tym potencielnych dźěłowych mocow za Saksku słuša tež akademiska wuměna mjez slědźerskimi zarjadnišćemi a wysokimi šulemi Sakskeje a Chile k nadawkam běrowa. Běrow ma mjeno Saxon Science Liasion Office. „Potencial młodych ludźi w Chile, kotřiž móhli so bjez wulkich komplikacijow wo studij w Sakskej požadać, je wulki. Přičina za to su snadne rěčne barjery, wšako nawuknu mnozy młodźi ludźo tu němčinu“, rozkładuje wědomostny minister Sebastian Gemkow. Běrow ma nimo toho za cyły region wužitny być. Wědomostne ministerstwo dale wo tym informuje, zo je hižo nětko něhdźe 50 kooperacijow mjez wysokimi šulemi w Sakskej a Chile.
Kritika słužbnych awtow dla
Nowa přičina za zwadu
Koalicija hadruje so wo powyšenju dawkow za bohatych
Berlin (dpa/SN). Wosrjedź lěćneje přestawki so čorno-čerwjena koalicija znowa wadźi. Wjacori politikarjo unije su namjet finančneho ministra Larsa Klingbeila (SPD) wotpokazali. Tutón bě namjetował, zo staćanam, kotřiž wjele zasłuža a wjele pjenjez maja, wjace dawkow nabrěmjenja. Politikarjo SPD jemu na druhim boku přihłosowachu a wuprajichu so za to, zo wjace dawkow pola bohatych za financowanje mjenje dawkow pola małych a mjeńšich zasłužbow zasadźuja. Generalny sekretar SPD, Tim Klüssendorf, rjekny, zo je Němska na poslednim městnje w europskim přirunowanju hladajo na dawki za namrěwstwo miliardow a zamóženjow. „W Němskej płaći tón, kiž dźěła 40 hodźinow wob tydźeń jako wučerka abo hladarka chorych, zdźěla wjace dawkow, hač něchtó, kiž je 400 bydlenjow na najlěpšim městnje zdźědźił.“
