Składnostnje wčerawšeho Mjezynarodneho Dnja žonow su žony po ...
Dodawaja tanki hišće w měrcu
Rakety na Lwiw
Lwiw (dpa/SN). Při najnowšich raketowych nadpadach Ruskeje na zapadźe Ukrainy su wjacorych ludźi morili. W regionje Lwiw je we wsy Soločiw raketa do bydlenskeje štwórće zrazyła, na čož je woheń wudyrił, zdźěli guwerner Maksym Kosyckij. Znajmjeńša pjeć wobydlerjow je žiwjenje přisadźiło, třo mužojo a dwě žonje. W Lwiwje wotmě so wjele lět Mjezynarodny sorabistiski kongres, na kotrymž je so stajnje tež delegacija Budyskeho Serbskeho instituta wobdźěliła.
W stolicy Kijewje rěčeše měšćanosta Witalij Kličko wo wjacorych zranjenych. Nimo toho dyrbi 40 procentow wobydlerjow ruskich nadpadow dla tuchwilu bjez tepjenja wutrać. Ruska měri so zaměrnje na kritisku infrastrukturu Ukrainy.
Wulke wočakowanja na biskopow
Frankfurt n. M. (dpa/SN). Prezidentka Centralneho komiteja katolikow Němskeje (ZdK), Irme Stetter-Karp, je na biskopow Němskeje apelowała, zo njebychu reformu cyrkwje blokowali. „Wězo wočakuju, zo biskopja swoju zamołwitosć w tutym wažnym procesu spóznaja a swojemu nadawkej nawjedowanja w tuchwilnym krizowym stawje katolskeje cyrkwje wotpowěduja“, rjekny Stetter-Karp powěsćerni dpa.
W Frankfurće nad Mohanom su dźensa pjatu a poslednju synodalnu zhromadźiznu katolikow Němskeje zahajili. Z njej chcedźa lěta 2019 zahajeny reformowy projekt Synodalny puć najprjedy raz wotzamknyć. Vatikan je wospjet wujasnił, zo tajke ponowjenje wotpokazuje. Tole bě mjez mnohimi biskopami dwěle zbudźiło, hač dyrbjeli reformam woprawdźe přihłosować. Wobzamknjenja synodalneje reformy trjebaja wjetšinu dweju třećinow hłosow. Wuslědk wuradźowanjow je tuž dospołnje njejasny.
Dalše twarske dźěła na A 4
Zwjazk inwestuje 155 milionow eurow do sakskich awtodróhow
Kamjenica (dpa/SN). Wot nalěća maja šoferojo na někotrych wotrězkach zwjazkowych awtodróhow w Sakskej wjace časa zaplanować. Přičina toho su twarske dźěła. Zwjazk chce mjenujcy lětsa 155 milionow eurow do syće sakskich awtodróhow nałožić. Tuchwilu wšak bědźa so šoferojo hišće ze sněhom a hładkimi dróhami. Tola w pozadku fachowcy hižo pilnje twarske dźěła přihotuja. „Wobchad ma na awtodróhach dale běžeć“, wuswětli nawoda Drježdźanskeho stejnišća za awtodróhi Christian Milster wčera w Kamjenicy, hdźež je naprawy předstajił.
K najwobšěrnišim projektam słuša twar zwiska mjeze zwjazkowymaj awtodróhomaj A 72 a A 38 pola Lipska. Tam ma so wosom kilometrow dołhi wotrězk dozhotowić, za čož su 36,5 milionow eurow trěbnych. Wot pózdnjeho lěća dyrbi tam wobchad znajmjeńša na jednej čarje móžny być. Tola tež po tym maja twarscy dźěłaćerjo ruce połnej dźěła. Hač do lěta 2026 ma so wulki dźěl nowotwara wotzamknyć. Potom móža šoferojo wot Vogtlanda hač do Lipska po dwěmaj čaromaj jěć.
Styki dale pěstować
Ličba podwojena
To a tamne (09.03.23)
W Čěskej slědźi policija intensiwnje za pokradnjenym konjom, kotryž słuša čečenskemu knježićelej Ramsanej Kadyrowej. Njeznaći skućićeljo su konja najskerje w nocy wot minjeneho pjatka na sobotu z hródźe w Krabčicach pokradnyli. 16 lět stary kóń za galopowy sport ma na čole njeprawidłowny běły blak w formje hwězdy. Hódnota zwěrjeća wučinja znajmjeńša 17 000 eurow. Rěčnica financneho ministerstwa w Praze zjawnoprawniskemu rozhłosej wčera wobkrući, zo słuša kóń woprawdźe Kadyrowej. Tola mjeztym njemóže wón wo zwěrjeću rozsu- dźić, dokelž słuša k zamóženskim hódnotam, kotrež je EU sankcijow přećiwo njemu dla zamjerznyła. Kadyrow a jeho přiwisnicy wojuja za Rusku w Ukrainje.
Znaty hudźbnik Wincent Weiss je ze 30 lětami swoju emocionalnu stronu wotkrył. „Mjeztym započnu při serijach abo w kinje płakać. To je rjane znamjo za to, so emocionalnje do něčeho dać“, wón rjekny. Do toho njeje emocije rady dopušćił. „Nětko rady płakam a čuju so při tym zbožowny. Płakać, je tola rjenje.“
Wjele wěriwych zhubili
Berlin (dpa/SN). Ewangelska cyrkej Berlin-Braniborska-šleska Hornja Łužica (EKBO) je w běhu jednoho lěta nimale 30 000 sobustawow zhubiła. Kónc lěta 2022 přisłušachu jej 833 254 wěriwych, lěto do toho bě tomu 862 582, EKBO wčera zdźěli. To je dokładnje 3,4 procentow mjenje. Přiwšěm registrowaše cyrkej 43,9 procentow wjace křćeńcow. Tež ličba konfirmacijow je wo 2,2 procentaj přiběrała. Přičina toho je mjez druhim, zo su ludźo poćah k nabožinje zhubili.
Liča dale ze sněhom
Drježdźany (dpa/SN). Šoferojo w Sakskej bědźa so dźensa z hładkimi dróhami a sněhom. Tuž dyrbja so wuměnjenjam wjedra přiměrić a dale kedźbliwje jěć, Němska wjedrowa słužba dźensa warnowaše. Cyły dźeń ma so w Sakskej z blakami dale sněžić. Temperatury leža mjez dwěmaj a štyrjomi stopjenjemi celsiusa. Jutře ma so potom dešćować. Jeničce w horinach maja ludźo z dalšim sněhom ličić, meteorologojo připowědźa.
Klingbeil zmylk přiznał
