NATO wo hroženjach rěčała
Brüssel (dpa/SN). Zakitowanscy ministrojo čłonskich krajow NATO su dźensa w Brüsselu wo tym wuradźowali, kak měli z hroženjom ruskeho prezidenta Wladimira Putina wobchadźeć, zo chcył we wójnje přećiwo Ukrainje tež atomowe brónje zasadźić. Při zetkanju tak mjenowaneje nuklearneje planowanskeje skupiny wuradźowachu wo atomowej brónjowej strategiji NATO a wo modernizowanju aktualneje infrastruktury.
Wo wolóženjach wuradźowali
Berlin (dpa/SN). Energijoweje krizy jako sćěha ruskeho nadpada na Ukrainu dla je zwjazkowy sejm dźensa wo móžnych wolóženjach na dobro mało zasłužacych a rentnarjow wuradźował. Na dnjowym porjedźe stejachu wuradźowanja wo planowanym wobydlerskim pjenjezu, reformje bydlenskeho pjenjeza a energijowej pawšali za rentnarjow. Z wobydlerskim pjenjezom chcedźa popłatk Hartz IV w dźensnišej formje wotstronić a narunać.
Zwjazk lěkarjow za nahubnik
Při wohenju w busu w Pakistanje je dźensa rano 17 ludźi žiwjenje ...
Přirada Załožbu za serbski lud namołwjała
Budyšin (SN). Parlamentariska přirada Załožby za serbski lud je so na swojim posedźenju minjeny pjatk w Serbskim ludowym ansamblu w Budyšinje mjez druhim z konceptom k zawěsćenju přichoda Serbskich Nowin a Noweho Casnika zaběrała. „Znajmjeńša pjeć lět je Załožbje za serbski lud njespokojace a starosće zbudźace połoženje nastupajo personelne wobsadźenje a tarifowu situaciju serbskeho dźenika znate“, předsyda rady, zapósłanc CDU w Sakskim krajnym sejmje Marko Šiman zdźěli. Lěta 2021 bě přirada zarjadnistwo załožby prosyła, so wo to postarać, zo so dźěłowe wuměnjenja a zapłaćenje sobudźěłaćerjow polěpša. Mjeztym je so połoženje dale přiwótřiło. Čłonojo parlamentariskeje přirady su tuž załožbu na swojim posedźenju z wobzamknjenjom namołwjeli, wjacore nadawki spjelnić.
Wjetšina UNO přećiwo aneksiji
New York (dpa/SN). Hłowna zhromadźizna UNO je ludowe prawo ranjacu aneksiju ukrainskich kónčin přez Rusku z historiskej wjetšinu zasudźiła. 143 z cyłkownje 193 čłonskich statow hłosowaše wčera w najwjetšim gremiju Zjednoćenych narodow za wotpowědnu rezoluciju, pjeć krajow hłosowaše přećiwo tomu, 35 krajow je so hłosa wzdało. Zhromadnje z Ruskej hłosowachu jeničce Běłoruska, Sewjerna Koreja, Nikaragua a Syriska přećiwo rezoluciji. Wobzamknjenje njeje ludoprawnisce zawjazowace, pokazuje pak cyle jasnje mjezynarodnu izolaciju Ruskeje.
Wčera schwalena rezolucija přiswojenje ukrainskich teritorijow přez Rusku zasudźuje a deklaruje je za njepłaćiwe. Zdobom Moskwu namołwjeja, zdźěla wobsadźene kónčiny wokoło Luhanska, Donjecka, Zaporižžje a Chersona Ukrainje wróćić.
Přemóžacy wuslědk wothłosowanja je samo prognozy zapadnych diplomatow přetrjechił. Mnozy z tym ličachu, zo afriske staty po boku Moskwy wostanu.
Twar bydlenjow pospěšić
Zwjazkarstwo dwěluje na zaměrach zwjazkoweho knježerstwa
Berlin (dpa/SN). Hospodarstwo, dźěłarnistwa a politika su so we wot knježerstwa iniciěrowanym zwjazkarstwje na zhromadny cil jasnje wjace zapłaćomnych bydlenjow w Němskej dorozumili. Z podpismom dojednachu so wobdźělnicy „Zwjazka zapłaćomneho bydlenskeho ruma“ wutoru wječor na dźesatki jednotliwych naprawow, kaž Němska powěsćernja z knježerstwowych kruhow zhoni. Zwjazkowy kancler Olaf Scholz a twarska ministerka Klara Geywitz (wobaj SPD) staj plany wčera rozłožiłoj.
W swojim koaliciskim zrěčenju běchu SPD, Zeleni a FDP w decembru „Zwjazk zapłaćomny bydlenski rum“ ze wšěmi wažnymi akterami připowědźili. Ampla chce mjez druhim twar 400 000 nowych bydlenjow wob lěto docpěć, z toho 100 000 zjawnje spěchowanych.
To a tamne (13.10.22)
Za wopačnym awtom so schował je paduch pralinow w Kölnje. 27lětny bě do toho w žiwidłowym wobchodźe 25 tyzow worješkowych pralinow do wulkeje plastikoweho měška tyknył a so bjez zapłaćenja zminył. Po tym schowa so mjez parkowacymi awtami. Jedne z awtow pak bě ciwilne jězdźidło policije z dwěmaj zastojnikomaj. Tymaj bě zadźerženje muža podhladne. Nimo toho njeměješe wón kasowy bon za wulke mnóstwo pralinow.
Dokelž njeje ničo přećiwo wulkej ličbje myšow w swojim domje činiła, dyrbi žona w Jendźelskej pokutu płaćić. Najebać skóržby susodow je 73lětna z myšemi kaž z domjacymi zwěrjatami wobchadźała a je picowała. Sudnistwo města Colchester je žonu tohodla k pokuće 1 700 eurow zasudźiło. Nimo toho dyrbi wona kóšty za ponowjenje swojeho socialneho bydlenja w nošerstwje města zarunać.
ICE bórze hač do Zhorjelca
Berlin (dpa/SN). Sakske statne knježerstwo je na kabinetnym posedźenju wčera w Berlinje wažnej wobchadnej projektaj přesadźić móhło. Po tym ma so železniska čara mjez Berlinom a Zhorjelcom za spěšnik ICE wutwarić. To je sakski ministerski prezident Michael Kretschmer (CDU) po posedźenju zdźělił, na kotrymž wobdźělištaj so tež zwjazkowy minister za wobchad Volker Wissing (FDP) a społnomócnjeny zwjazkoweho knježerstwa za wuchod Carsten Schneider. Wissing chce so tež za elektrifikowanje čary mjez Drježdźanami a Zhorjelcom zasadźić.
Tójšto nowych pacientow
Berlin (dpa/SN). Towaršnosć chorownjow Němskeje warnuje jasnje přiběracych ličbow na koronawirus schorjenych pacientow dla před ćežkimi časami. Přirunujo z minjenym tydźenjom maja 50 procentow wjace pacientow w chorownjach. Z něhdźe 19 000 pacientami je ličba pozitiwnje testowanych runje tak wulka kaž w času najwjetšeho poćeženja w lěću, předsyda towaršnosće Gerald Gaß zdźěli.
Ruska pohladnych zajała
Zwjazkowy prezident Frank-Walter Steinmeier (nalěwo) je wčera w ...
Mjeńšinowa rada kritizuje prezidenta FUEN
Berlin (SN). Po wólbach noweho prezidija Federalistiskeje unije europskich narodnosćow FUEN 1. oktobra 2022 w Berlinje je so mjeńšinowa rada štyrjoch awtochtonych mjeńšin Němskeje k rozrěči wo wozjewjenym stejišću k połoženju w Madźarskej zešła.
Prezident FUEN Loránt Vincze bě hižo do kongresa FUEN a tež po tym z kritiku na Europskim parlamenće napadnył, wot kotrejež so mjeńšinowa rada z nowinskej zdźělenku wuraznje distancuje. „Wotpokazujemy twjerdźenje, zo je rozprawa Europskeho parlamenta, kotraž wobswědča Madźarskej rozpadowanje demokratije, prawostatnosće a zakładnych prawow, dospołnje wopačna“, mjeńšinowa rada pisa. Europski parlament bě w swojej rozprawje nadrobnje rozłožił, zo je Madźarska na najlěpšim puću do awtokratije abo wólbneje awtokratije a zo su demokratiske institucije wosłabjene. Rozprawa wěnuje so dokładnje połoženju narodnych mjeńšin w Madźarskej a wosebje Romam.
Wumjetowanja Loránta Vinczeho, zo su wuprajenja rozprawy „wulka lěwicarska hromada ze starymi wěrnosćemi“ ale bjez faktow, mjeńšinowa rada raznje wotpokazuje.
NATO wuradźuje w Brüsselu
Brüssel (dpa/SN). Zakitowanscy ministrojo čłonskich krajow NATO su so dźensa k dwudnjowskemu zetkanju w Brüsselu zešli. Temy rozmołwow w centrali wojerskeho zwjazka na kromje města su mj. dr. wójna w Ukrainje a zhromadne napinanja k wutwarej brónjenskeje industrije. Nimo toho ma po wočiwidnych sabotažach při płunowodomaj Nord Stream 1 a 2 wo přidatny škit kritiskeje infrastruktury hić. K tomu liča nimo pipelinow płuna a wolija tež milinowe syće a datowe kable.
Do oficialneho zetkanja NATO su USA zetkanje tak mjenowaneje kontaktneje skupiny za Ukrainu organizowali. Přez nju koordinuja dodawanje bróni Ukrainje. NATO wšak oficialnje žane brónje njesćele, dokelž nochce dźěl wójnskeje konfrontacije być. Zasćinjene je zetkanje w Brüsselu wot dołhotrajneho spjećowanja Turkowskeje, přiwzaću Finskeje a Šwedskeje do NATO přihłosować. Po zahajenju wójny Ruskeje přećiwo Ukrainje běštej krajej wo to prosyłoj. Turkowska wumjetuje jimaj podpěru „terorizma“.
