Miliony ludźi ze snadnej rentu
Wiesbaden (dpa/SN). Wjace hač štwórćina wšěch rentnarkow a rentnarjow w Němskej ma měsačne dochody mjenje hač tysac eurow. Loni bě 4,9 milionow wuměnkarjow wot toho potrjechenych, Zwjazkowy statistiski zarjad we Wiesbadenje zdźěla. To wotpowěduje podźělej 27,8 procentow wšěch přijimarjow. Pola žonow je podźěl jasnje wyši: 38 procentow z nich ma rentu pod tysac eurami, pola muži je jich 14,7 proc.
Po informacijach zarjada dósta loni w Němskej 17,6 milionow ludźi starobnu rentu. Dźesać lět do toho bě to 16,6 milionow. Nimale 13 procentow seniorkow a seniorow chodźi na dźěło. Mnozy dźěłaja, dokelž renta njedosaha.
Dźěl staršich ludźi je na statnu pomoc pokazany. 589 000 ludźi přijimowaše w decembru 2021 tak mjenowane zakładne zawěsćenje. Jich podźěl hladajo na cyłkownu ličbu wuměnkarjow njeje so minjene lěta wulce změnił, kaž zarjad zdźěli. Loni wučinješe tón 3,4 procenty.
W Němskej bydli dale a wjace staršich ludźi. Ličba nad 65lětnych je minjene dźesać lět wo jědnaće procentow na 18,4 miliony 2021 rozrostła.
To a tamne (30.09.22)
Kruwjace stadło w Delnjosakskej je dźiwje prosatko „přiwzało“. Před třomi tydźenjemi bě ratar njewšědneho hosća mjez kruwami wuhladał. Proso „Frida“, kiž ma mjeno wot wjesnych dźěći, je mjeztym dospołnje integrowane. Jedna z kruwow so kaž mać wo nje stara. Hajnik je informowany, zo njesmě swinjo třěleć. Tuchwilu pase so stadło na łukach při rěce Weser. Frida bě drje zwisk k swojim zhubiła, jako črjóda rěku přeprěči.
Při lutowanju energije chce francoske knježerstwo z přikładom być – z pulowrami a tołstymi jakami. Tak pokazuje so ministerska prezidentka Élisabeth Borne, kotraž hižo tydźenje dołho k lutowanju namołwja, wot najnowšeho w stepowanej jace. Financny minister Bruno Le Maire, hewak stajnje we wobleku, přińdźe w tołstym pulowru na posedźenje. „Hinak mje wjace njewidźiće“, wón rjekny.
Čěska kontroluje mjezu
Praha (dpa/SN). Přiběraceje migracije podłu Balkanoweje čary dla je Čěska dźensa kontrole při mjezy k Słowakskej zahajiła. Policisća a zastojnicy nastupichu so na 27 bywšich namjeznych přechodach. Tež tak mjenowanu zelenu mjezu nětko wobstražuja. Zaměr je, pašowarjam ludźi pokazać, zo maja tule zadźěwk, rjekny čěski nutřkowny minister Vit Rakušan. Cyłkownje su 500 policistow a 60 cłownikow zasadźili. Słowakska je z njezrozumjenjom na akciju reagowała.
Nětko koalicija na rjedźe
Berlin (dpa/SN). Po wuradźowanjach wo energijowej krizy žadaja sej zwjazkowe kraje nětko jednanje zwjazkoweho knježerstwa. „Amplowa koalicija dyrbi so skónčnje hibać a z nami zhromadnje za rozrisanjemi pytać“ rjekny durinski ministerski prezident Bodo Ramelow nowinarjam. Ludźo čakaja na „rozsudźene a zhromadne“ postupowanje, politikar Lěwicy potwjerdźi. Ministerscy prezidenća běchu wčera wuradźowali.
Prěnich swědkow so prašeli
W dołhich rynkach steja awta před pomjeznym přechodom Verkhny Lars ...
Komisarka EU: Atentatje warnowanje
Berlin/Moskwa (dpa/SN). Komisarka EU za nutřkowne naležnosće Ylva Johansson je móžnu sabotažu na płunowodomaj Nord Stream 1 a 2 „warnowanje“ mjenowała. „Myslu sej, zo je to warnowanje, zo dyrbimy wjace činić, zo bychmy so přećiwo tajkim nadpadam škitali“, rjekny Šwedowka wčera wječor w sćelaku ZDF. Atentat je „eskalacija a wohroženje“. Tuchwilu je pak hišće přezahe, wo móžnych zawinowarjach dźěrow rěčeć. „Dalokož móžu to posudźować, jedna so wo jara inteligentny nadpad, kotryž njeje skupina normalnych ludźi sama přewjesć móhła“, wona rjekny.
Zelenskyj prosy wo dalše brónje
Kijew (dpa/SN). Ukrainski prezident Wolodymyr Zelenskyj je Němsku wo dalše brónje a Europsku uniju wo přiwótřenje sankcijow přećiwo Ruskej prosył. „Nastupajo zakitowanje sym naše wočakowanja na rakety wotwobaracy system z Němskeje podšmórnył – wutrobny dźak za pomoc při zakitowanju powětroweho ruma“, rjekny Zelenskyj wčera w swojim widejowym poselstwje po telefonaće ze zwjazkowym kanclerom Olafom Scholzom (SPD). Zdobom dźakowaše so ukrainski prezident USA, kotrež běchu wčera dalšu wojersku pomoc we wobjimje 1,1 miliardy dolarow přilubili.
Zelenskyj potwjerdźi, zo njebudźe so Ukraina z pozdatnymi ludowymi wothłosowanjemi we wobsadźenych kónčinach wo přistupje k Ruskej federaciji wotnamakać a zo chce swoje teritorije wróćo zdobyć. Ruskich wojakow wón namołwješe, ćeknyć abo so podać.
Mjeztym su ruske wojerske jednotki dale w defensiwje. Ruscy wójnscy reporterojo rozprawjeja wo wuspěšnych ukrainskich nadběhach pola Lymana.
To a tamne (29.09.22)
Bjez cholowow su chětro napiteho wopytowarja Mnichowskeho Oktoberskeho swjedźenja na tamnišej policajskej straži „wotedali“. Přistajeny bě mužej z přikrywu wupomhał a jeho na stražu přewodźał. Kaž so wukopa, bě muž wustupić dyrbjał a so cholowy hnydom cyle slekł. Njemóžeše pak so dopominać, hdźe bě cholowy zhubił. Zastojnicy je skónčnje namakachu a mužej přepodachu.
Sama lutka je kóčka z Regensburga z ćahom do Mnichowa a zaso wróćo jěła. Železnicar je zwěrjo wuhladał a tole policiji zdźělił. „Rosie“ bě wutoru w rańšich hodźinach skradźu na Regensburgskim dwórnišću do ćaha k Mnichowskemu lětanišću zalězła a wottam zaso domoj jěła. W Regensburgu přepodachu zwěrjo wobsedźerce. Kóčka je časćišo sama po puću, žona rjekny. Hač do Mnichowa pak hišće ženje twochnyła njebě.
Třo zranjeni při rozbuchnjenju
Halle (dpa/SN). W centrumje města Halle je wčera wječor k ćežkemu rozbuchnjenju z třomi zranjenjemi dóšło. Wokoło 18 hodź bě na zjawnej toaleće na Hłownym torhošću něšto rozbuchnyło. Při tym so dwě holcy w starobje dwanaće a 13 lět ćežko zraništej, 51lětna žona so tohorunja zrani. Wšitkich třoch dowjezechu do chorownje. Fachowcy policije za přičinami pytaja. Torhošćo bě nachwilnje zawrjene. Wobydlerjow wokolnych domow su ewakuowali.
Kritizuja Merza za wuprajenja
Stuttgart (dpa/SN). Socialne křidło CDU je předsydu Friedricha Merza wužiwanja wuraza „socialny turizm“ ukrainskim ćěkancam napřećo raznje kritizowało. „Merz je často wužiwanu metodu prawicarskich populistow nałožował. Najprjedy mjezy překročić a potom so zamołwić“, rjekny městopředsyda křidła dźěłopřijimarjow Christian Bäumler. „Z tym steji sej Merz na puću do kanclerskeho zarjada sam w puću a škodźi uniji.“ Merz bě ćěkancam „socialny turizm“ wumjetował.
Błysk třoch muži morił
