Dóstanu miliony přidatnje
Drježdźany (dpa/SN). Pjeć zaměrowych zwjazkow za bliskowobchad w Sakskej dóstanje lětsa a klětu přidatnje cyłkownje 136 milionow eurow. Při tym jedna so wo srědki za regionalizaciju ze stron Zwjazka. Srědki dospołnje zaměrowym zwjazkam přewostaja, zdźěli wčera sakske wobchadne ministerstwo w Drježdźanach. Zaměrowe zwjazki móhli pjenjezy za bliskowobchad wužiwać.
Pjenjezy su nuznje trěbne, dokelž su w bliskowobchadźe nahladne stopnjowanja kóštow, na přikład za energiju. Zwjazk je drje mjenje pjenjez hač wot krajow žadane pjenjezy k dispoziciji stajił. Přiwšěm su přidatne srědki šansa, znajmjeńša wobstejace poskitki zaručić.
Płót dotwarjeny
Drježdźany (dpa/SN). Sakska chce dale a bóle wupřestrěću afriskeje swinjaceje mrětwy zadźěwać. Zo je posledni třeći wotrězk škitneho płota na mjezy do Pólskeje dotwarjeny, zdźěli sakske socialne ministerstwo minjeny pjatk. „Z tym je hranica wot Braniborskeje hač do Čěskeje z dwójnym płotom zawěsćena.“
„Zawrěće škitneho koridora podłu pólskeje hranicy tomu zadźěwa, zo so inficěrowane dźiwje swinje přez Nysu do Sakskeje dóstanu. Runje tak zaruča płót wěstu škitnu conu“, rozłoži statny sekretar Sebastian Vogel. Z dotwarjenymi koridorami hodźi so lokalnje wupřestrěću mrětwy zadźěwać. „Wěmy, zo je to ćežko. Ale smy optimistiske, wšako mějachmy loni pady přewažnje jenož w inficěrowanych wobłukach“, statny sekretar měni.
Afriska swinjaca mrětwa je wirusowa infekcija, na kotrejž zwěrjata zemrěja. Jenož domjace a dźiwje swinje móžeja schorjeć. Dotal njedawa hišće žane šćěpiwo přećiwo chorosći.
To a tamne (06.02.23)
Při renowěrowanskich dźěłach je starša Berlinjanka najwšelakoriše brónje, kaž na přikład pancerowu pjasć, zady swojeje lěharnje namakała. Zasadźenske mocy zawěsćichu w bydlenju brónje, třělby, mašinsku pistolu a wjacore ručne brónje, zdźěli policija tele dny na Facebooku. Žona bě so hižo před tydźenjomaj přizjewiła. Nahladnu zběrku je wona našła, jako chcyše ponowjenske dźěła wukonjeć. Před třomi lětami je jeje mandźelski wumrěł, kiž je brónje po wšěm zdaću tajnje składował.
Koparski profi a hrajer narodneho mustwa Joshua Kimmich ma za pjeć tydźenjow w Mnichowskim Tatort hóstny wustup. W njedźelnym krimiju ARD „Hackl“, kotryž je za 12. měrca připowědźeny, wustupuje Kimmich jako fitnesowy trenar. Jedyn dźeń su sceny z koparjom natočili, Bayerski sćelak (BR) nětko rozprawja.
Do wopyta znowa rozestajenja
Juba (dpa/SN). Krótko do dźensnišeho wopyta bamža Franciskusa je so namóc w Južnym Sudanje přiwótřiła. W zwisku z rozestajenjemi su znajmjeńša 20 ludźi zemrěli, zdźěli dźensa tamniši minister za rozšěrjenje informacijow. Bamž Franciskus chcyše dźensa popołdnju w měsće Juba z lětadłom přizemić. Najebać to, zo su politikarjo w Južnym Sudanje rozjasnili, zo hódnoća wopyt bamža za měr a změnu, je połoženje w kraju jara napjate.
Vonovia njeje jednotliwc
Podstupim (dpa/SN). Zwjazk twarskeje industrije na wuchodźe Němskeje so starosća, zo njebudu předewzaća přichodnje wjele nadawkow dóstać. Přičina wuprajenja je, zo nochce imobilijowy koncern Vonovia lětsa žane nowe bydlenja twarić, dokelž su płaćizny w twarstwje razantnje stupali. „Vonovia njeje jednotliwc. Připowědź koncerna budźe so na wiki wuskutkować“, zwjazk nětko zdźěli. W někotrych padach budu firmy krótkodźěło za swojich sobudźěłaćerjow postajić dyrbjeć.
Wučerjow z Ukrainy zasadźić
Žadaja sej diplomatiske rozrisanje
Drježdźany (dpa/SN). Sakski krajny sejm je wo wójnje w Ukrainje a z tym zwisowacym dodawanju brónjow diskutował. Debatu aktualneje hodźiny je AfD nastorčiła. Strona njeby Ukrainje brónje přewostajiła a dodawanje tajkich Ukrainje wotpokazuje. Dale žada sej město toho ryzy diplomatiske rozrisanje.
Němska financuje wójnu w Ukrainje k nahladnemu dźělej, mjez druhim z dawkowymi pjenjezami. Z argumentom, z dodawanjom brónjow europske hódnoty zakitować, njemóže předsyda frakcije AfD Jörg Urban wjele započeć. „Ukraina je najkoruptniši stat Europy“, wón potwjerdźi. Nimo toho su pozdatnje w Ukrainje opoziciske strony zakazane. Dale dwěluje Urban na swobodźe měnjenja w Ukrainje. Zapósłanc CDU Ronny Wähner Urbanowu poziciju wuraznje wotpokazuje. Ukraina ma prawo, swój teritorij zakitować. Prawnisce płaćiwe hranicy njeměli z wojerskimi srědkami přestorčić.
A 4 je wuwzaće
Drježdźany (dpa/SN). Na 580 kilometrach awtodróhi w Sakskej su loni wjace hač 13 000 wobchadnych haćenjow registrowali. To bě po informacijach awtomobilneho kluba ADAC w Drježdźanach nimale 8 000 mjenje hač lěto do toho. Tak je so połoženje trochu polěpšiło. Z cyłkownje 5 146 přizjewjenjemi wo kopjenju wobchada na 11 817 kilometrach, ličene na cyłe lěto, pak je zwjazkowa awtodróha A 4 mjez Zhorjelcom a Eisenachom wuwzaće. Předewšěm we wobłuku wokoło třiróžka Drježdźany-zapad je k mnohim haćenjam dóšło, štož wězo šoferow jězdźidłow chětro mjerza.
Cyłkownje je so na sydom awtodróhowych wotrězkach w swobodnym staće po informacijach ADAC porno lětu 2021 mjenje wobchada haćiło. Předewšěm kónc tydźenja wokoło Božeho spěća kaž tež 18. a 19. junija a kónc lěćnych prózdnin bě wjele ludźi po puću. Najměrnišo bě na zwjazkowymaj awtodróhomaj A 13 mjez Drježdźanami a Berlinom ze 117 přizjewjenymi haćenjemi a 117 kilometrami zatykaneje dróhi. Mało wobchada je tohorunja na zwjazkowej awtodróze A 38 mjez Lipskom-juh z 220 přizjewjenjemi a 353 kilometrami kopjenjow na cyłe lěto.
To a tamne (03.02.23)
Dokelž je dźesaćlětny hólčec z wokrjesa Herford wótře rjejił, staj so paduchaj nablaku z ležownosće staršeju zminyłoj. Wčera je policija pad wozjewiła. Hólc bě dopołdnja sam doma, jako spytaštaj skućićelej do bydlenskeho domu so zadobyć. Tak staj škleńcu terasowych duri rozbiłoj. Hólčec je na to wótře rjejił, tak zo staj paduchaj ćeknyłoj. Po tym je wón swoju mać a policiju informował.
Pjeć tydźenjow stary aziski elefant w Lipšćanskim zwěrjencu rěka „Bào Ngoc“ – drohotny juwel. Mjeno je vietnamski wulkopósłanc Vu Quanga Minha wupytał.
Wobchadny chaos w Bayerskej
Mnichow (dpa/SN). Wjele sněha a wichor stej w Bayerskej tójšto wobchadnych njezbožow zawinowałoj. Dźensa rano rozprawješe policija z Delnjeje Bayerskeje wo nimale sto zasadźenjach. Tak su so štomy powróćili a awta hładkich dróhow dla do hrjebjow sunyli. Mjeztym warnowaše policija ze srjedźneje Frankskeje hładkich dróhow dla a prošeše šoferow wo kedźbliwosć. Němska wjedrowa słužba (DWD) warnowaše druhi dźeń pospochi před wichorom a wjele sněhom na wuchodźe Bayerskeje a w Alpach.
Rozprawu ma za iluzorisku
Drježdźany (dpa/SN). Sakski ministerski prezident Michael Kretschmer (CDU) wotpokazuje znowa, dočasnje wudobywanje brunicy na wuchodźe Němskeje zakónčić. Z tym reagowaše wón na wčerawšu rozprawu zwjazkoweje syćoweje agentury, po kotrejž by zastaranje z milinu w Němskej tež při dočasnym wustupje zaručene było. To je iluzoriske a njeseriozne, Kretschmer na syći Twitter wuzběhny.
Nahubnik hižo trěbny njeje
Znaty Drježdźanski pomnik „Die Trümmerfrau“ je so po dwěmaj ...
Butra budźe jasnje tuńša
Essen (dpa/SN). Płaćizny za butru tele dny chětro spaduja. Tak stej discounteraj Aldi a Norma, kaž tež wikowar Kaufland připowědźili, zo płaći butra přichodnje město 1,99 eurow nětko 1,59 eurow. Tež wikowar Edeka je mjeztym zdźělił, zo budźe płaćiznu znižić. To njejsu jenož wosebite poskitki, ale budźe normalna płaćizna. Za butru dyrbjachu kupcy minjene měsacy znajmjeńša 2,29 eurow zapłaćić.
Přičina toho su jednanja mjez wikowarjemi a mlokowej branšu. Stare zrěčenja su kónc januara kónčili. W nowych zrěčenjach stej so stronje na tuńše płaćizny dojednałoj. Płaćizna za mloko a z tym zwisowace wudźěłki su loni chětro stupali. Tohodla je trochu přewjele poskitka, čehoždla je wěsty ćišć nastał. Nowe zrěčenja płaća nětko najprjedy raz štyri měsacy.
