Pistorius naslědnik Lambrecht
Berlin/Ulm (dpa/SN). Zakitowanska ministerka Christina Lambrecht je wčera kanclera Olafa Scholza (wobaj SPD) wo jeje pušćenje ze zastojnstwa prosyła. Z tym reaguje wona na hižo měsacy dołho pospochi zwuraznjenu kritiku na jeje wosobje, wosebje ze stron opozicije. Jeje naslědnik budźe Boris Pistorius (SPD), nižosakski nutřkowny minister – tak powěsćernja dpa zdźěli, złožujo so na informacije z kruhow knježerstwa. Zwjazkowy kancler Olaf Scholz chce naslědnistwo dźensa oficialnje wozjewić.
Wuznawataj swoju lubosć
Berlin (dpa/SN). Zapósłancaj unije Wolfgang Stefinger (CSU) a Sepp Müller (CDU) staj prěni homoseksualny por w zwjazkowym sejmje. Wobaj staj swoju mjezsobnu lubosć wčera wječor runočasnje pod #loveislove na Twitteru publikowałoj a pisaštaj: „11 procentow wšěch porikow so na dźěłowym městnje zeznaje a zalubuje. Druhdy so kolegojo spřećela. Z naju přećelstwa je naju lubosć wurostła. Smój zbožownaj.“
Ličba wobydlerstwa woteběra
Regionalny ćah bliži so železniskemu přechodej mjez ...
Saksojo su w trendźe
Šwikawa/Berlin (dpa/SN). 33 předewzaćow z ratarskeho, zežiwjenskeho kaž tež turistiskeho sektora zastupuje Saksku na lětušim Mjezynarodnym zelenym tydźenju (IGW) w Berlinje. To je pjeć wobdźělnikow mjenje hač na poslednich wikach do pandemije w lěće 2020. Přičiny za to su hospodarske ćeže wysokich energijowych płaćiznow dla, skedźbliwosć po koronowej přestawce a dołha přizjewjenska doba.
Sakski ratarski minister Wolfram Günther (Zeleni) rjekny na nowinarskej konferency wčera w Šwikawje, zo je runje w času krizow wažne, ratarstwo a zežiwjenske hospodarstwo hromadźe z turistiskimi iniciatiwami šěrokemu publikumej předstajić. „Z regionalnymi produktami smy dospołnje w trendźe,“ wón wudospołni. Jědnaće sakskich předewzaćow ma bio-certifikaciju, to rěka produkuje cyle abo podźělnje w bio-kwaliće. Nimo dołholětnych wobdźělnikow pojědźe lětsa jědnaće wustajerjow prěni raz na Zeleny tydźeń do Berlina, na přikład Drježdźanska whisky-manufaktura, Budyske rěznistwo Meister‘s kaž tež Łužiske agrarne drustwo Jězor z Niskeje, kotrež předstaja wudźěłki z lěwanćika.
Čas dialoga a rozsuda
Zelenskyj podpěru chwali
Lützerath: Symbol škita klimy
Po měsacy trajacych demonstracijach a diskusijach je wjes „zrumowana“
Erkelenz (dpa/SN). Měsacy dołho su klimowi aktiwisća Lützerath wobsadźili. Woni zasadźeja so za kónc wudobywanja brunicy jako přinošk k dodźerženju hranicy 1,5-stopnjoweho sćoplenja zemje. Energijowe předewzaće RWE chce pak w Lützeraće brunicu wudobywać. Koncern wozjewi spočatk oktobra 2022, zo je z wobswětowymaj ministerstwomaj Zwjazka a krajom Porynsko-Westfalskej dojednał, zmilinjenje brunicy hižo 2030 město 2038 skónčić. Zwjazkowy hospodarski minister Robert Habeck (Zeleni) rěčeše wo dobrym dnju za škit klimy. Za wobswětoškitnu organizaciju Greenpeace pak ma planowany kónc wudobywanja wuhla hórki přisłód, dokelž ma so wudobywanje wuhla při jamje Garzweiler přechodnje samo rozšěrić, tak rěka. Tež organizacija za škit klimy Fridays for Future plany kritizuje. „Zelene hospodarske ministerstwo je za zawrjenymi durjemi z fosilnym koncernom RWE mazany deal dojednało – mjeztym, zo klimowa kriza po cyłym swěće hižo lěta dołho čłowječe žiwjenja wohrožuje a zniča“, tak Linda Kastrup.
Syć dale wutwarja
Drježdźany (dpa/SN). Wysoke płaćizny miliny njebudu po posudku sakskeho hospodarskeho ministerstwa wutwar syće stołpow za nabiwanje elektrojězdźidłow w Sakskej wobwliwować, je powěsćernja dpa zhoniła. Po stawje 1. nowembra 2022 su w Sakskej 2 354 zjawnje přistupnych normalnych stacijow nabiwanja a 540 stacijow za spěšne nabiwanje.
To a tamne (17.01.23)
48lětny Londonski policist je so před tamnišim sudnistwom winy w dohromady 48 padach wumocowanja kaž tež druhich njeskutkow wuznał. Po zdźělence britiskeje powěsćernje PA je wón hižo před 20 lětami žonu zawlekł a wjacekróć wumocował. Hakle nazymu lěta 2021, po tym zo bu wobskorženy, jeho Londonska policija ze słužby pušći.
Hubjenych wjedrowych prognozow a mało sněha dla dyrbjachu organizatorojo za kónc januara planowane alpinske wubědźowanja w Garmisch-Partenkirchenje wotprajić. Předań zastupnych lisćikow běše derje zaběžała. „Wupad je za nas sportowy a hospodarski dezaster,“ praji Martina Betz, nawodnica organizaciskeho teama, powěsćowej agenturje dpa.
Wopismo připołožili
Vatikan (B/SN). Rogitum je oficialne wopismo zastojnskeje doby bamža, kotrež je so jemu do kašća połožiło. Tam hódnoći so bamž jako připóznata awtorita, kotraž je drohotne spisy a slědźenja zakładnych wěrnosćow wěry zawostajiła, a tež jeho zasadźenje přećiwo seksualnemu znjewužiwanju so wobjednawa.
Wuskušowanje Ratzingera
Berlin (B/SN). Wosom inoficialnych sobudźěłaćerjow statneje bjezstrašnosće NDR je kardinala Ratzingera wot 1970tych lět sem wuskušowało. W zwisku z Dnjom katolikow w Drježdźanach w lěće 1987 su 138 IMojo wo „najwótrišim přećiwniku komunizma“ rozprawjeli. W aktach steji, zo so wón „bjezwuwzaćnje z teologiskimi temami zaběra“.
Row přistupny
Vatikan (B/SN). Swój posledni zemski wotpočink ma Benedikt XVI. pod Pětrowej cyrkwju w Romje w krypće blisko rowa swjateho Pětra. Do marmoroweho kamjenja je zadypane „Benedictus PP XVI.“ Něhdźe 160 bamžow je tam pochowanych. Za wopytowarjow je krypta přistupna.
Wonječesćenje kěrchowow
Wobsteji na wotškódnjenju
Waršawa (dpa/SN). Pólska po podaćach ministerskeho prezidenta Mateusza Morawieckeho najebać wotprajenje z Berlina na swojim žadanju za reparacijemi Druheje swětoweje wójny dla wobstawa. Knježerstwo so wobstajnje prócuje, zo by swoje stejišćo w prašenju wotškódnjenja na mjezynarodnej runinje wujasniło, rjekny Morawiecki powěsćerni PAP dźensa do wotjězda do Němskeje na Waršawskim wojerskim lětanišću. „To je zasadnje wažna tema za wšěch Polakow.“
Zhromadny manewer
Minsk/Moskwa (dpa/SN). Wosrjedź strachow w Ukrainje před nowymi ruskimi nadpadami tež z Běłoruskeje stej Ruska a Běłoruska dźensa manewer swojich powětrowych wobrónjenych mocow zahajiłoj. Hłowny zaměr zhromadneho taktiskeho zwučowanja lětowych jednotkow wšelakich dźělow wójskow je polěpšenje zhromadneho skutkowanja, zo bychu nadawki wojowarskeho wukubłanja spjelnili, je běłoruske zakitowanske ministerstwo dźensa w Minsku wozjewił.
Mjenje organow darowali
