Pater Joachim wostanje w Kulowje
Kulow/Zhorjelc (SN/mb). Ordinariat biskopstwa Zhorjelc je Serbskim Nowinam na naprašowanje wobkrućił, zo wostanje pater Joachim Wernersbach dušepastyr w Kulowskej wosadźe. Kaž Andreas Metzger, referent za zjawnostne dźěło, wotmołwi, „je jara wjele stejišćow wěriwych w ordinariaće dóšło, kotřiž sej patra Joachima jako dušepastyrja jara waža a podpěruja.“ Tež dotal njebě pohórškow dla jeho dźěławosće. Tohodla: „Dušepastyrstwo w Kulowje póńdźe dale.“ Zdobom pišě rěčnik biskopstwa hladajo na rozprawy masowych medijow: „Wuwažene a wěcowne rozprawnistwo parujemy.“
Ideje za zymu trěbne
Što so w lěće 2023 wšitko změni(4)
W swojim prěnim lěće je amplowa koalicija někotrym reformam puć runała, kotrež wotnětka płaća. Što budźe dróše, što so potuńši a so dospołnje změni?
Berlin (dpa/SN). Z Hartza IV budźe wobydlerski pjenjez, rentu zwyša a woblubowana jězdźenka so (podróšena) wróći. Wobydlerki a wobydlerjo maja so w nowym lěće na wšelake změny nastajić. Pokročujemy a zakónčimy přehlad:
Wustup z jadroweje energije: Srjedź apryla wotpinu poslednje němske atomowe milinarnje. Milinarnje Isar 2, Neckarwestheim 2 a Emsland mějachu we wobłuku atomarneho wustupa hižo na proze k nowemu lětu wotšaltowane być, jich wobhospodarjenski čas pak bu energijoweje krizy dla podlěšeny.
Lěpšina za awtowy płun: Štóž tankuje za swoje wozydło awtowy płun, znaty tež jako LPG, dyrbi wot lětušeho hłubšo do móšnje přimnyć. Dawkowa lěpšina wuběži. Nětko nałožuja regularnu dawkowu sadźbu 409 eurow na tonu płuna. Kaž ADAC zwěsći, su dawki pak přihódniše hač za bencin abo diesel.
To a tamne (06.01.23)
Pjećlětny je so w Bayerskej sam na wulku jězbu podał – a z tym zasadźenje policije zawinił. Kaž policija wčera zdźěli, přizjewi so zawčerawšim zadwělowana mać z Nördlingena. Jeje syn je so při hrajkanju ze štyrilětnym přećelom zhubił. Policija na to za hólcom z helikopterami, trutami a psyčej staflu pytaše. Něhdźe dwě hodźinje pozdźišo namakachu zastojnicy zwjazkoweje policije hólca při dwórnišću w něhdźe 35 kilometrow zdalenym Aalen. Hólčec je sej z ćahom tam dojěł.
W Japanskej móža dźiwje ptački w zymje w swójskim hosćencu chłóšćić. Před tafličku z japanskim napisom „hosćenc dźiwich ptačkow w zymje“ w přirodoškitnym centrumje prefektury Fukui je „hosćom“ bifej ze słónčnymi róžemi přihotowany, zdźěli dźensa rěčnik centruma. Hłódne ptački přileća z wokolnych horow, kotrež su tuchwilu zasněžene.
Dźesaćitysacy so rozžohnowali
Emeritowany bamž Benedikt XVI. dźensa w Romje pochowany
Rom (dpa/SN/BŠe). Njeboh bamž Benedikt XVI. bu dźensa pod Pětrowej cyrkwju njezjawnje pochowany. Dopołdnja swjećeše amtěrowacy pontifeks Franciskus na Pětrowym naměsće rekwiem za rodźeneho Bayera Josepha Ratzingera. Jemu poboku bě kardinal Giovanni Battista Re. Dźesaćitysacy wěriwych běchu na žarowanskej Božej mši přitomni, mjez nimi tež serbski kapłan Florian Mróz.
W cyrkwinskim formalnym akće do chowanja je Vatikan zasadźenje emeritowaneho bamža Benedikta XVI. w boju přećiwo znjewužiwanju dźěći hódnoćił. Zemrětemu pontifeksej bu pismo do kašća połožene, na kotrymž je jeho žiwjenje zjimane a w kotrymž mjez druhim steji: „Wón wojowaše raznje přećiwo złóstnistwam, kotrež su zastupjerjo klerusa na małolětnych abo škita potrěbnych wosobach skućili, a namołwi cyrkej přeco zaso k nakazanju, modlitwje, pokuće a čisćenju.“ Tole swjaty stoł dźensa rano zdźěli.
Woni kandiduja za radu Załožby za serbski lud
1Sym zhonił, zo so k prěnjemu terminej dosć ludźi přizjewiło njeje. Na to sym rozmyslował, hač bych so za to hodźał. K tomu sym rozmołwy wjedł z radźićelemi minjenych lět a hruby dohlad do dźěławosće załožboweje rady dóstał. Naposledk měnjach, zo móžu sej tute dźěło za mnje derje předstajić.
2Přichodna załožbowa rada změje tójšto nowych mjezwočow. Prěnje wulke wužadanje budźe zadźěłanje a zeznaće wotběhow rady. Móžu sej předstajić, zo budźe twar při Lawskich hrjebjach dale tema a ja so nadźijam, zo budźe so tež dale a wjac wo digitalizaciskich projektach rěčeć.
3Přez dobry přihot na posedźenja a ze žiwej diskusiju w a zwonka rady, móžu tež ja nadźijomnje k dobrym demokratiskim wobzamknjenjam přinošować.
4To je na kóždy pad zajimawa předstawa, hdyž Serbja sami rozsudźa, kak so ze „serbskimi“ pjenjezami wobchadźa. Kaž pak sym tež hižo zhonił, so tute prašenje hižo dołho diskutuje. Dyrbju so bliže z pozadkom tutoho namjeta zaběrać, zo bych sebi swoje měnjenje tworić móhł.
Kliniki jenož w centrumach?
Podstupim (dpa/SN). Braniborska ministerka za strowotnistwo Ursula Nonnemacher (Zeleni) boji so w běhu planowaneje reformy za chorownje, zo budźe přichodnje mjenje klinikow. „Boju so, zo změjemy jenož hišće chorownje w centrumach“, Nonnemacher zwurazni. Dźensa přewjedźe so nastupajo reformu konferenca zwjazkowych strowotniskich ministrow krajow ze zwjazkowym ministrom Karlom Lauterbachom (SPD). Za Braniborsku je trěbne, zo měli ambulantne zastaranske posłužby we wjesnych kónčinach zarjadować, ministerka měni.
Njemóža dźěłać započeć
Washington (dpa/SN). Po wjacehodźinskej přestawce je Dom reprezentantow USA wothłosowanje wo předsydstwje parlamentariskeje komory přestorčił. Republikanski kandidat za předsydstwo komory Kevin McCarthy bě do toho historisku poražku poćerpił a w šěsć wólbnych přechodach zwrěšćił. Doniž předsydstwo wujasnjene njeje, njemóže Dom reprezentantow dźěłać započeć. Tež nowych zapósłancow njemóža tam spřisahać.
Skót na statokach zarězać
Prawniske srědki tež nałožować
Berlin (dpa/SN). Po nadpadach na policiju a wuchowanske mocy w silwesterskej nocy žada sej Němski zwjazk městow a gmejnow konsekwentniše přesćěhowanje skućićelow. „Wohańbjacy je fakt, zo je 145 zajatych mjeztym zaso pušćenych“, zwurazni prezident zwjazka Uwe Brandl wčera w Berlinje. „Prawniski stat dyrbi srědki, kotrež jemu k dispoziciji steja, konsekwentnje nałožować.“
Krućiše chłostanja a nowe zakonje trěbne njejsu, wuzběhny hłowny jednaćel Gerd Landsberg. „Zakonjedawar wšak je chłostanski ramik jasnje přiwótřił. Po mojim měnjenju je problem hinaši.“ Tak měło so přepytować, wobskoržić a zasudźić. A tajke postupowanje je po wšěm zdaću ćežko přesadźomne. Zdobom dyrbjeli kraje a komuny wjace za prewenciju činić. Socialne dźěło dyrbjało so hišće bóle zesylnić. W silwesterskej nocy buchu wosebje w Berlinje mnozy policisća a zasadźenske mocy z pyrotechniku nadpadnjene.
