Dowěra do cyrkwje woteběra
Gütersloh/Münster (dpa/SN). Dale a wjac ludźi z katolskeje a ewangelskeje cyrkwje wustupuje. Po naprašowanju tuchwilu samo wjele dalšich wo tym rozmysluje, kaž wuchadźa z dźensa wozjewjeneho nabožneho monitora Bertelsmannoweje załožby. Institut Infas je so za to 4 363 wosobow w starobje wot 16 lět po cyłym Zwjazku naprašował.
Jenož 14 procentow ludnosće jónu wob měsac Božu słužbu wopyta. Hladajo pak na sobustawow cyrkwje je to 17 procentow. Mjez sobustawami je so nimale kóždy štwórty (24 procentow) minjenych 12 měsacach z myslu nosył, z cyrkwje wustupić. Na prašenje, hač prawdźepodobnje cyrkej wopušći, wotmołwi 20 procentow z „haj“.
„Skandale a wustupowanje cyrkwje kołowokoło znjewužiwanja dźěći je zawinowało, zo ludźo katolskej cyrkwi hižo tak njedowěrjeja“, wuswětli fachowča za nabožinu Bertelsmannoweje załožby Yasemin El-Menouar. „Cyrkej nima hižo tajki wuznam. Tola křesćanstwo a křesćanska wěra so zachowatej“, je sej fachowča wěsta.
„Sym wosobinsce zludany“
CDU, Zeleni, SPD a Lěwica w sejmje „haj“ za namjet AfD zasudźeja
Budyšin/Drježdźany (SN). Přihłosowanje wjetšiny frakcije CDU w Budyskim wokrjesnym sejmiku namjetej AfD dale a wjac kritiki na wšěch runinach budźi. Parlamentariski jednaćel CDU w Sakskim krajnym sejmje, Sören Voigt, wobkrući kritiku generalneho sekretara sakskeje unije Alexandera Dierksa a jeho zwěsćenje, zo njesmě zhromadneho dźěła z AfD być. Frakcija AfD bě póndźelu wječor namjet do sejmika zapodała, ćěkancam bjez kruteho prawa na pobyt w Němskej wokrjesne naprawy integracije šmórnyć. Tomu je tež předsyda Domowiny, Dawid Statnik, jako radźićel CDU přihłosował. Wobsah směrnicow je na přikład koordinowanje rěčnych kursow abo integracija do kubłanja resp. dźěłowych wikow. Pola mnohich nětko potrjechenych humanitarne aspekty wotsunjenju zadźěwaja. Sakske Nowiny Statnika citowachu, zo móhł wuslědk předźěłanja směrnicow samo być, zo budźe na kóncu wjac naprawow integracije.
To a tamne (15.12.22)
Cyłkownje 45 žiwych kačkow su njeznaći w nocy na wčerawšu srjedu we Wusterhausenje pokradnyli. Tuchwilu jasne njeje, kak su paduši ptački popadnyli a wotwjezli, policija wčera zdźěli. Kački běchu na wobhrodźenej łuce. Poprawom běchu jako hodowna pječeń předwidźane. Po trochowanju nasta wěcna škoda cyłkownje 2 700 eurow.
W francoskim kwartěrje koparskeho swětoweho mišterstwa w Katarje zabawjeja so hrajerjo z hru Uno. Při tym je turbulentnje a wótře. Šansy na titul „unokrala“ mataj Ousmane Dembélé a Youssouf Fofana. Powšitkowne rozhorjenje za blidom za to wužiwataj, zo njewobkedźbowane kartki susodneho hrajerja pokradnjetaj a pod stólc sunjetaj.
Za spěchowanje demokratije
Berlin (dpa/SN). Zwjazkowy kabinet je dźensa naćisk za tak mjenowany zakoń wo spěchowanju demokratije wobzamknył. Nowy zakoń ma towarstwam a organizacijam, kotrež so za zesylnjenje demokratije a prewenciju ekstremizma zasadźeja, přichodnje lěpše financne zakłady zaručić. Po dotalnym rjadowanju su wot Zwjazka financowane projekty časowje wobmjezowane, čehoždla běchu ramikowe wuměnjenja stajnje chětro njewěste.
Hižo druhi pospyt
Magdeburg (dpa/SN). W Saksko-Anhaltskej ma so pad kołowokoło atentatnika z Halle dale wujasnić. Prawniski wuběrk krajneho sejma je dźensa k tomu wuradźował. Zawčerawšim wječor bě prawicarskoekstremny atentatnik dweju přistajeneju jastwa w saksko-anhaltskim Burgu z namocu a pistolu zadźeržał. Hišće znutřka twarjenja jeho zastojnicy přewinychu. Kaž z rozprawow wuchadźa, je wón njekooperatiwny a komplikowany jaty. Hižo druhi raz bě spytał, z jastwa ćeknyć.
Nowe stare předsydstwo
Dalše wolóženja předwidźane
Berlin (dpa/SN). Zwjazkowe knježerstwo je so wčera dojednało na wolóženja tež za ludźi, kotřiž na přikład z wolijom abo peletami tepja. Tak ma zakładna potrjeba energije za wšitkich zapłaćomna wostać.
Po směrnicowej papjerje amplowych frakcijow SPD, Zelenych a FDP maja so domjacnosće, kiž na přikład z tepjenskim wolijom, peletami abo běžitym płunom tepja, na dobu wot 1. januara hač do 1. decembra 2022 wróćo skutkujo wolóžić. Hornja hranica płaćenjow ma pola 2 000 eurow ležeć. Zwjazk chce za to 1,8 miliardow eurow k dispoziciji stajić. Zakład za wobličenje su zličbowanki přetrjebarjow. Hladajo na domy z bydlenjemi na podruž ma přenajer wozjewjenje wotedać a wolóženja swojim wotnajerjam dale dać.
„Runje w nakrajnych kónčinach wjele ludźi z wolijom, peletami abo druhimi paliwami tepi“, wujasni wicešef frakcije SPD w zwjazkowym sejmje Matthias Miersch. Wupłaćenje dyrbja kraje njekomplikowanje rjadować.
Złoži mandat
To a tamne (14.12.22)
Strach před znjewužiwanjom
Brüssel (dpa/SN). Wjetšina statow EU je so na to dorozumiła, za Madźarsku předwidźane miliardy ze zhromadneho europskeho etata wróćo dźeržeć. Kraje so starosća, zo so pjenjezy EU w Madźarskej znjewužiwaja. Kraj ma nětko wulki ćišć, dokelž dyrbi reformy k polěpšenju prawnostatnosće zwoprawdźić. Knježerstwo ministerskeho prezidenta Viktora Orbána je minjene tydźenje hižo někotre naprawy přesadźiło.
Parlament přepytowali
Brüssel (dpa/SN). W zwisku ze skandalom korupcije wokoło wiceprezidentki parlamenta EU Evu Kaili su zastojnicy wčera tež rumnosće Europskeho parlamenta w Brüsselu přepytowali, zdźěli belgiske statne rěčnistwo. Při tym su daty z ličakow dźesać parlamentariskich sobudźěłaćerjow zawěsćili. Při přepytowanjach na wjacorych městnach namakachu zastojnicy wjacore sta tysac eurow, mjez druhim w kófru a bydlenju zapósłancow. Kaili je jedna ze šěsć podhladnych, kotřiž su belgiscy zarjady w zwisku z korupciskim skandalom zajeć dali.
Blokuja žurlu uniwersity
Žadaja sej spěšniši wutwar
Dessau (dpa/SN). Zwjazkowy wobswětowy zarjad (UBA) je sej spěšniši wutwar wobnowjomnych energijow w Němskej žadał. Po tuchwilnych informacijach wobswětoweho zarjada je so lětsa drje něhdźe dźewjeć procentow wjace miliny z wobnowjomnych žórłow produkowało hač lěto do toho. Tola podźěl leži hišće pod w zakonju wo wobnowjomnych energijach (EEG) postajenym zaměrom. Po UBA wučinja cyłkowna produkcija bruttomiliny z wobnowjomnych energijow lětsa něhdźe 256 terawattowych hodźin (TWh). Zaměr pak je 269 terawattowych hodźin.
Zo by so w lěće 2030 postajene 80 procentow němskeje přetrjeby bruttomiliny z wobnowjomnej milinu docpěło, trjebaja něhdźe 600 terawattowych hodźin. Tuž dyrbi so přichodne lěta jasnje wjace miliny na zakładźe wobnowjomnych energijow produkować. Hłownej stołpaj wobnowjomneje produkcije miliny běštej po UBA lětsa fotowoltaika a wětřikowa energija.
