Karlsruhe/Freiberg (dpa/SN). Na wčerawšej raciji je zwjazkowe statne rěčnistwo 25 ludźi z tak mjenowaneje mócnarskeje sceny pod podhladom terorizma zajeć dało. Něhdźe 3 000 zastojnikow bě po informacijach zarjada w jědnaće zwjazkowych krajach zasadźenych. Při tym dóńdźe tež k dwěmaj zajećomaj w Rudnohórskim wokrjesu. Po rozprawje dźenisa Sächsische Zeitung je mjez nimaj něhdyši měšćanski radźićel AfD z Olbernhauwa. K podhladnym słuša tež Berlinska sudnica a bywša zapósłanča AfD w zwjazkowym sejmje Birgit Malsack-Winkemann.

Po informacijach statneho rěčnistwa chcychu čłonojo mócnarskeje wobydlerskeje sceny reichsbürgerow statny porjad w Němskej powalić a ze swójskim systemom narunać. Statna forma běše drje hižo zakładnje wudźěłana. Přisłušnikam mjenowaneje sceny bě wědome, zo móže so tute předewzaće jeno z pomocu zasadźenja wojerskich srědkow a tuž namócnje přećiwo statnym reprezentantam zwoprawdźić.

Mnichow (dpa/SN). W Mnichowje zahajichu dźensa proces Wirecard wo pozdatnje najwjetšim wobšudnistwje w Němskej wot lěta 1945. Statne rěčnistwo ­wumjetuje bywšemu šefej předsydstwa Wirecard Markusej Braunej a jeho wobskorženymaj, zo su bilancy koncerna sfalšowali a dawarjow kreditow wo 3,1 miliarda eurow wobšudźili. Štwórta chłostanska komora Mnichowskeho krajneho sudnistwa je za proces hač do lěta 2024 něhdźe sto jednanskich dnjow planowała. Jednanje přewjedu w podzemskim wěstotnym trakće pódla najwjetšeho bayerskeho jastwa Stadelheim.

Brüssel (dpa/SN). Woblubowany do­wolowy kraj Chorwatska móhł dźensa ­doskónčnje zelenu swěcu za přistup k Schengenskemu rumej dóstać. Wo tym rozsudźa nutřkowni ministrojo krajow na zeńdźenju w Brüsselu. Zwjazkej přisłušeja tuchwilu 26 europskich krajow. Mjenje wuhladow maja porno Chorwatskej krajej Bołharska a Rumunska. Přistup tuteju móhł zwrěšćić, dokelž so Nižozemska a Awstriska spjećujetej. Němsku zastu­puje dźensa zwjazkowa nutřkowna mi­nisterka Nancy Faeser (SPD).

Komisija EU bě naposledk na to tłóčiła, Chorwatsku kaž tež Bołharsku a Rumunsku do Schengenskeho ruma přiwzać. Mjenowane tři kraje su hižo zdźěla na Schengenske prawidła wjazani, tola kontrole nutřkokrajnych hranicow su dale přewjedli. Na hranicy z a do Chorwatskeje so kóžde lěćo znowa dołhe rynki jězdźi­dłow wutworja a drohi zatykaja. Nětko móhli kontrole při hranicach kraja hižo spočatk lěta 2023 wotstronić, při lětanišćach klětu w měrcu. Chorwatska zawjedźe klětu tohorunja euro jako srědk za płaćenje.

Dale přewjele dźěći a młodostnych na spěchowanskich šulach

Berlin (dpa/SN). Němski institut za čłowjeske prawa (DIMR) je němske knje­žerstwo namołwjał, UN-rezoluciju za prawa zbrašenych na němskich šulach lěpje zwoprawdźić. Zwjazkowe knježerstwo njemóže so na kubłanski fede­ralizm spušćeć, ale dyrbi so sobu wo to starać, zo zniži so ličba zbrašenych dźěći a młodostnych na spěchowanskich ­šulach.

DIMR so z etata zwjazkoweho sejma financuje. Jeho aktualna 7. lětna rozprawa, kotruž předstajichu zamołwići wčera w Berlinje, dobu wot julija 2021 do junija 2022 wopřija. W tutej rěka: „Po nimale 14 lětach winowatosće, inkluziju do kubłanskeho systema zawjesć, njewidźimy we wjetšinje zwjazkowych krajow signi­fikantne postupy nastupajo rozdźělenje financow a kompetencow.“ Kritika z tu- a wukraja pak je wulka. Bjez wjetšeho angažementa knježerstwa njebudźe postupa. W reprezentatiwnym naprašowanju w nowembrje štwórćina šulskich nawodnicow a nawodow wo ćežach inkluzije a integracije ćěkańcow rozprawješe.