To a tamne (14.06.22)
Paducha diesela zajała je policija w hessenskim Diethölztalu. 36lětny bě 160 litrow diesela tankował a prosće wotjěł, bjez toho zo by zapłaćił. Na ćěkancy ignorowaše čerwjenu amplu a zrazy do awta 78lětneho. Paduch na to pěši ćěkaše. Zastojnicy pak jeho dosahnychu. Po tym so wukopa, zo steješe 36lětny pod wliwom alkohola a drogow. Jězbnu dowolnosć tež njeměješe. Připrawjene znamješko k tutomu awtu njesłušeše. Policija trochuje wěcnu škodu na 20 000 eurow. Muž dyrbi nětko z wjacorymi chłostanskimi jednanjemi ličić, policija zdźěli.
Stadło wowcow je konja zapřaha w Glauchauwje w Zwickauskim wokrjesu wustróžiło. Kóń smaleše na to dale a běžeše po skłoninje. Zapřah so skónčnje zwróći. 65lětny pohonč so při tym zrani. 33lětna susodka na zapřahu móžeše w poslednim wokomiku wotskočić.
Biskop Tobias Bilz: „Wostawaće při tym, štož je wam wot Boha ...
Bukecy (SN/JaW). Z předstajenjom oratorija Korle Awgusta Kocora „Podlěćo“ su wčera w Bukecach 76. serbski ewangelski cyrkwinski dźeń zakónčili. Prezentacija chóra Budyšin a cyrkwinskeho chóra Lubijsko-Žitawskeje eforjie pod nawodom cyrkwinohudźbneho direktora Christiana Kühne bě zdobom wjeršk serbskeho ewangelskeho kónca tydźenja a jedyn z wjerškow Lěta Zejlerja a Kocora. Dopołdnja swjećachu tam swjedźenske kemše, na kotrychž prědowaše superintendent Christoph Rummel.
Swjatkowna próstwa wo měr
Bonn/Vatikan (B/SN). Bamž Franciskus je sej na swjatkownej njedźeli z jasnymi słowami přiměr w Ukrainje a měrliwe skónčenje wójny žadał. Hižo sobotu wječor je so wón próstwu přez widejoprezentaciju „wo inwaziji Ukrainy“ zwuraznił. Wón tematizowaše „wójnu mjez bratrami a wójnu mjez křesćanami“. Při tym wón zwurazni, zo chce z ukrainskimi zastojnikami wo móžnosći wopyta Ukrainy rěčeć. Tež katolscy biskopja žadachu sej w swjatkownych prědowanjach skónčenje wójny w Ukrainje.
Žiwjenje profetki hódnoćił
Załožbu wobskorža
Njebjelčicy (SN/JaW). Towarstwo Smy wobskorži Załožbu za serbski lud. To wuchadźa z nowinskeje zdźělenki Serbskeho sejma, kiž je sobotu wuradźował. Za přičinu mjenuje rěčnica Serbskeho sejma Jadwiga Pjacec, zo njedóstanje towarstwo za spěchowanje „politiskeho dźěła demokratisce woleneho powšitkowneho serbskeho sejma“ a wudźeržowanje běrowa ze stron załožby žane spěchowanje. Kónc lěta 2020 zapodata próstwa bu „nětkole ze spřećiwjenskej zdźělenku doskónčnje wotpokazana“, rěka w spisu.
„Załožba njespěchuje po wustawkach a objektiwnych kriterijach, ale po dobrozdaću mało wosobow jenož wubrane serbske towarstwa a institucije. W bohatej ličbje su statne studije zwěsćili, zo wobsteja bytostne demokratiske a skutkownostne deficity dotalneje plećizny serbskich institucijow. Wočakujemy, zo dóńdźe před sudnistwom k wujasnjenju, što su přičiny, kiž njejsu so dotal ani we wotmołwje, ani w spřećiwjenskej zdźělence mjenowali. Wo tajkim njeznjesliwym stawje mamy skónčnje zjawnje diskutować!“, zwurazni předsydka Smy Aneta Zahrodnikowa.
Wuchodni premierojo so zešli
Greifswald (dpa/SN). Ministerscy prezidenća wuchodoněmskich zwjazkowych krajow su so dźensa w Mecklenburgsko-Předpomorskej k swojej prawidłownej konferency zešli. Při zetkanju na małej kupje Riems w Baltiskim morju chcychu w prěnim rjedźe wo zaručenju zastaranja ludźi z energiju a wo ekstremnym zwyšenju kóštow za přetrjebarjow rěčeć. Razne zwyšenje płaćiznow ludźi na wuchodźe wosebje starosća, hdźež su dochody často snadniše a puće na dźěło dlěše.
Macron jara snadnje dobył
Paris (dpa/SN). W prěnim kole wólbow parlamenta w Francoskej su so kandidaća lěhwa prezidenta Emmanuela Macrona z přewšo snadnym předskokom přećiwo nowemu lěwicarskemu lěhwu přesadźić móhli. Po dotalnym wuslědku je sej zwjazk Macrona 25,75 procentow hłosow zdobył, wot politikarja Lěwicy Jeana-Luca Mélenchtona nawjedowany zwjazk Lěwicy, Komunistow, Zelenych a Socialistow dósta 25,66 procentow. Wólbne wobdźělenje bě ze 47,51 procentami hišće niše hač před pjeć lětami.
Bórze wjace atomowych bróni
Ukraina wočakuje němske brónje
Berlin (dpa/SN). Ukrainski wulkopósłanc w Němskej Andrij Melnyk wočakuje wot zwjazkoweho kanclera Olafa Scholza (SPD), zo na swojim wopyće w Kijewje přewostajenje němskich tankow Ukrainje přilubi. „Bjez ćežkich němskich bróni so nam bohužel njeporadźi, hobersku wojersku přewahu Ruskeje přewinyć a žiwjenje wojakow a ciwilistow wuchować“, rjekny Melnyk powěsćerni dpa. „Ukraina wočakuje, zo zwjazkowy kancler Olaf Scholz na swojim wopyće w Kijewje nowy pomocny paket bróni za Kijew přilubi, kiž wobsahuje na kóždy pad hnydom k dispoziciji stejace bojowe tanki Leopard 1 a třělcowske tanki Marder.“
Po njewobkrućenych informacijach medijow chce so Scholz hišće tutón měsac zhromadnje z francoskim prezidentom Emmanuelom Macronom a italskim ministerskim prezidentom Marijom Draghijom do Kijewa podać.
Unija za perspektiwu přistupa k EU
Berlin (dpa/SN). Frakcija unije w zwjazkowym sejmje žada sej hnydomnu perspektiwu přistupa Ukrainy, Moldawskeje a Georgiskeje k Europskej uniji. Zwjazkowe knježerstwo měło so za to zasadźić, zo tutym krajam hižo na posedźenju Europskeje rady 23. a 24. junija status přistupnych kandidatow přizwola. „Je w našim zajimje, Ukrainje, Moldawskej a Georgiskej puć do Europskeje unije runać“, rjekny Gunther Krichbaum, europapolitiski rěčnik frakcije powěsćerni dpa.
Unija chce zwjazkowe knježerstwo tež namołwić, we wobłuku přistupneho procesa potrjechenym krajam nowe formy wobdźělenja na programach abo w gremijach wonkowneje, wěstotneje abo zakitowanskeje politiki Europskeje unije wotewrěć. To płaći tež za wobłuki slědźenje, energija, wobchad abo škit klimy. Za to pak měli kandidaća konsekwentnje wšitke kriterije demokratije, čłowjeskich prawow a prawnostatnosće spjelnić a z wotmachom přećiwo korupciji wojować. Nimo toho měli wobzamknjenja EU nastupajo zhromadnu wonkownu a wěstotnu politiku zwoprawdźić.
Habeck za razniše kartelowe prawo
To a tamne (13.06.22)
Płuwanski marathon na 1 200 kilometrow w Rynje je zahajeny. Joseph Heß z Kamjenicy je sobotu rano do jězora njedaloko šwicarskeho Tujetscha zalězł, kiž maja za žórło rěki. 34lětny chce čaru hač do Rotterdama za 25 dnjow zmištrować a wšědnje hač do dźesać hodźin płuwać. Wjacori kanuća jeho přewodźeja a akciju za dokumentarny film nahrawaja.
Italscy a grjekscy cłownicy su štyrjoch Britow w grjekskim přistawnym měsće Thessaloniki z cyłkownje 300 kilogramami kokaina w hódnoće dźesać milionow eurow lepili a zajeli. Wopojny jěd bě w 260 paketach schowany. Po prěnich dopóznaćach přisłušeja zajeći w starobje 38 do 52 lět kriminelnej organizaciji na Balkanje. Při přepytowanju luksusoweho domu namakachu policisća dalše drogi, pistolu, municiju, wjele pjenjez a wjacore mobilne telefony.
Hdyž tón mały wot SSW z wicekanclerom dansce rěči
Serbske Nowiny su zapósłanca mjeńšiny Stefana Seidlera w Berlinje zetkali
Skok z Reichstaga zdaleny, sydła Němskeho zwjazkoweho sejma, ma Stefan Seidler, zapósłanc Južnoschleswigskeho wolerskeho zwjazka SSW swój běrow w Berlinje. Wón je eksot mjez 736 ludowymi zastupjerkami a zastupjerjemi najwyšeho parlamenta našeho kraja. Jemu po boku staj w stolicy nawodnica běrowa a wědomostny sobudźěłaćer. Za rozmołwu z Axelom Arltom je sej muž z Flensburga hodźinu chwile wzał, byrnjež terminowa protyka połna była.
Knježe Seidlero, kak su Was w parlamenće Němskeje jako tak mjenowaneho „zapósłanca mjeńšiny“ přiwzali?
Jara derje. Frakcije demokratiskich stron su mje přewšo wotewrjenje přijimali. Tež zarjadnistwo zwjazkoweho sejma je mi napřećo přišło. Chcu je chwalić. Byrnjež wšitke zapósłanče a wšitkich zapósłancow jenak wobjednali, sym drje pytnył, zo su so tróšku prócowali. To kóždy dźeń nimaja, zo budźe kandidat-jednotliwc do zwjazkoweho sejma wuzwoleny.
Sće zapósłanc bjez frakcije. Su někotrežkuli frakcije spytali Was nawabić?
