Budyšin (SN/at). 30. september běše termin, ke kotremuž mějachu požadarjo swoje projektowe próstwy za 2023 kaž tež dalše próstwy wo serbske strukturne srědki Sakskeje Załožbje za serbski lud zapodać.

Klětuše regularne projektowe spěchowanje nastupajo rozprawja załožba w nowinskej zdźělence nětko wo cyłkownje dóšłych 104 próstwach z wobjimom ně­hdźe 2,8 milionow eurow. Wone měrja so na spěchowanje wuměłskeho nawoda a probowych lěhwow chórow, rejwanskich skupin, ansamblow a dźiwadłowych skupin. Ale tež próstwy na polu nowych hudźbnych projektow a digitalizacije, wuměłstwa a dalšich kulturnych a rěčnych wobłukow předleža.

„Nětko w zarjedźe próstwy na to pruwujemy, hač spěchowanskej směrnicy załožby wotpowěduja. Po tym podłožki kaž tež doporučenja za fachowu přiradu nadźěłamy, kotraž wo spěchowanju rozsudźi“, Nicole Zimmermannec ze spěchowanskeho teama informuje. Posedźenje fachoweje přirady za projektowe spěchowanje budźe srjedź nowembra.

Europska unija reaguje na eskalaciju wójny w Ukrainje

Brüssel (dpa/SN). Staty Europskeje unije su mjeztym wosmy paket sankcijow přećiwo Ruskej wobzamknyli. Stajni zastupnicy čłonskich statow su wčera mjez druhim prawniske zakłady za wobmjezowanje płaćizny ruskeho zemskeho wolija schwalili. Tole su wjacori diplomaća powěsćerni dpa wobkrućili. Dojednanje dyrbja nětko hišće w pisomnej formje w stolicach čłonskich statow wobkrućić, štož měješe so dźensa w běhu dnja stać.

Prezidentka komisije EU Ursula von der Leyen bě paket minjeny tydźeń jako reakciju na najnowšu eskalaciju Ruskeje we wójnje přećiwo Ukrainje namjetowała. „Njeakceptujemy ani pozdatne ludowe wothłosowanja ani žanu formu aneksije w Ukrainje“, rjekny němska politikarka. Ruski prezident Wladimir Putin bě wčera dekret podpisał, po kotrymž su štyri ukrainske kónčiny wotnětka ruski statny teritorij. Mjezynarodnje tutu kročel njepřipóznawaja. Tež statni a knježerstwowi šefojo EU kročel wotpokazuja.

Drježdźany (dpa/SN). Tójšto wučerjow na sakskich šulach po najnowšim přepytowanju swój dźěłowy čas jasnje překroči. W přerězku lěta wučinja to wjace hač tři hodźiny wob tydźeń, rjekny nawoda studije Frank Mußmann z Göttingenskeje uniwersity. Wjetšina wučerjow dźěła prawidłownje dlěje. Daty dotalne studije z druhich zwjazkowych krajow wobkrućeja. Sakska leži pak při tym nad cyłoněmskim přerězkom. Třećina połnje přistajenych pedagogow dźěła w šulskim času wjace hač 48 hodźin tydźensce.

Přepytowanje běchu w nadawku dźěłarnistwa za kubłanje a wědomosć přewjedli. Po słowach předsydki dźěłarnistwa Uschi Kruse su minjene lěta přez ­temy kaž inkluziju, digitalizowanje, migraciju a koronu šulam stajnje nowe ­nadawki nabrěmjenili. „Problem je, zo su nowe nadawki přidatne dźěło a zo dyrbi pobrachowacych wučerjow dla dale a mjenje wučerjow dźeń a wjace nadawkow zmištrować.“ Kruse wupraji so w tym zwisku za wěcownu debatu. Rozestajenja wo poćežowanju sakskich wučerjow běchu w minjenym času ze stron politisce zamołwitych „mało wěcowne“.

Genf (dpa/SN). Najebać wjacore střasenja swětowe wikowanje lětsa sylnišo rosće hač w nalěću wočakowane. Swětowa wikowanska organizacija (WTO) wočakuje za lěto 2022 rozrost swětoweho wikowanskeho wobjima 3,5 procentow, wčera w Genfje zdźělichu. Při swojej prognozy w aprylu bě wona hišće z rozrosta 3,0 procentow wuchadźała. Drastiske sćěhi ruskeho wojerskeho nadpada na Ukrainu, pandemije a klimoweje změny dla wočakuja hospodarscy fachowcy hakle klětu. Za lěto 2023 su z teje přičiny prognozy drastisce wot 3,4 procentow na runje hišće jedyn procent znižili. Pola ­swětoweho wikowanskeho rozrosta wočakuje WTO za 2022 přeco hišće 2,8 procentow rozrosta.

Wěsćenja za přichodne lěto su wobćežne, dokelž njejsu dalše wuwiće we wójnje Ruskeje přećiwo Ukrainje abo nowe zwyšenja danje wotwidźeć, WTO rozłoži. Je-li wuwiće špatne, móhło swětowe wikowanje tworow po modelach fachowcow na 2,8 procentow woteběrać. W najlěpšim padźe wočakuja 4,6 procentow. Organizacija kraje namołwja, so nowych wikowanskich zadźěwkow wzdać.