Kulturna awtonomija – Demokratiske samopostajowanje
Drježdźany (SN/bn). „Jedyn lud, jedyn hłós!? Politiska participacija Serbow w Sakskej“ bě hesło třećeho wirtuelneho zarjadowanja rjadu „Serbja we Łužicy – Drěmacy pokład w Sakskej“, z kotrymž chce Politiski kubłanski forum Konrada Adenaueroweje załožby wědu wo słowjanskej mjeńšinje předewšěm zwonka Łužicy šěrić. Hosćićelej a moderatoraj Johanna Hohaus a Benedikt Bierbaum witaštaj wčera dohromady něhdźe 80 zajimcow. Wjace hač połojca z nich běchu znowa Serbja.
Z impulsowymaj přednoškomaj rysowaštaj bywša zapósłanča zwjazkoweho sejma a wjelelětna předsydka Rady za serbske naležnosće Sakskeje Marja Michałkowa kaž tež Slepjanski wjesnjanosta a čłon Zhorjelskeho wokrjesneho sejmika Jörg Funda (wobaj CDU) wuwiće a tuchwilnu praksu wutworjenja parlamentariskich rozsudow na zwjazkowej a krajnej resp. wokrjesnej a komunalnej runinje a rozłožištaj, kak su Serbja do demokratiskeho procesa zapřijeći.
Južnotirolski angažement za mjeńšiny
Bozen (SN/bn). Južnotirolski Centrum za nazhonjenje awtonomije (AutExp), kooperaciski partner slědźerskeho instituta Eurac research w Bozenje a zdobom sydło Europskeho zjednoćenstwa nowin w mjeńšinowych a regionalnych rěčach MIDAS, je po swójskim podaću kubłanišćo kaž tež organizator a posrědnik wědy a kultury. Jeho najwažniše nadawki su, wo „politiskich, prawniskich a historiskich aspektach južnotirolskeje awtonomije a wo žiwjenju wobydlerjow regiona informować“. Z pomocu widejow, pod-castow, webinarow a přichodnje tež zaso ze zarjadowanjemi na městnje chcedźa „zajimcam zmóžnić do tematiki so zanurić“. Při tym złožuja so na „bohaty pokład nazhonjenjow w kónčinje, w kotrejž dźensa žiwu trojorěčnosć a -kulturnosć dožiwjamy, čemuž přeco tak njebě“.
Wo zadołženju wuradźowali
Berlin (dpa/SN). Zwjazkowy sejm je dźensa wo tym wuradźował, hač smě financny minister Olaf Scholz (SPD) koronapandemije dla lětsa hišće wjace kredita brać, hač je dotal planowane. Scholz bě dodatny etat předpołožił, z kotrymž planuje wjace podpěry na dobro předewzaćow a strowotnistwa. Tohodla chce dalše 60,4 miliardy eurow kredita brać. Potom by Němska z rekordnymi 240 miliardami eurow zadołžena była.
Spahn kraje namołwja jednać
Berlin (dpa/SN). Zwjazkowy minister za strowotnistwo Jens Spahn (CDU) je zwjazkowe kraje hladajo na dale přiběrace ličby infekcijow z koronawirusom namołwjał, swójske naprawy přesadźić a nječakać na planowane „nuzowe borzdźidło Zwjazka“. Warnowanja intensiwnych medicinarjow měli chutnje brać. Trěbne su konsekwentne naprawy a dalše wobmjezowanja, zo móhli třeću žołmu pandemije přewinyć, rjekny Jens Spahn dźensa w Berlinje.
Policistka wobskoržena
W badensko-württembergskim Tübingenje so starosća, zo móhł ...
Domowina je runohódny partner
Drježdźany (SN). Předsyda Domowiny Dawid Statnik schadźowaše so wčera w Sakskim krajnym sejmje w Drježdźanach ze statnym ministrom za regionalne wuwiće Thomasom Schmidtom a ministerku za kulturu a turizm Barbaru Klepsch (wobaj CDU). W srjedźišću rozmołwy steješe prašenje, kak hodźeli so serbske zajimy w zwisku ze strukturnej změnu zwoprawdźić. Při tym dźěše hłownje wo naprawy, zakótwjene w zakonju wo sylnjenju strukturow, kotryž bě Němski zwjazkowy sejm loni w lěću wobzamknył. Tam je w paragrafje 17 wuraznje postajene, zo maja zajimy Serbow wobkedźbowane być.
Na rozmołwje wobdźělichu so mjez druhim serbskaj zapósłancaj CDU w krajnym sejmje Marko Šiman a Alojs Mikławšk a dr. Madlena Malinkowa, referentka za serbske naležnosće w sakskim ministerstwje za wědomosć, kulturu a turizm. Wuchadźišćo bě list Domowiny sakskemu krajnemu knježerstwu. W nim běchu něhdźe 40 naprawow k spěchowanju serbskeje rěče, k zachowanju serbskeho žiwjenja a k wutworjenju nowych dźěłowych městnow namjetowali.
Wojacy NATO wopušća Afghanistan
Berlin (dpa/SN). Zwjazkowa wobora móhła so po planach němskeho knježerstwa hač dosrjedź awgusta z Afghanistana wróćić. To je zakitowanska ministerka Annegret Kramp-Karrenbauer (CDU) w telefoniskej konferency fachowych politikarjow wšitkich frakcijow zwjazkoweho sejma připowědźiła, kaž powěsćernja dpa rozprawja.
USA běchu sej 11. september, 20. róčnicu terorowych nadpadow w New Yorku a Washingtonje, jako termin cofnjenja předewzali. Na to su wčera wonkowni a zakitowanscy ministrojo čłonskich statow NATO wobzamknyli, wšitkich wojakow aliancy z Afghanistana cofnyć. Započeć chcedźa z tym spočatk meje, rjekny generalny sekretar NATO Jens Stoltenberg.
Talibanojo běchu sej žadali, zo maja wukrajni wojacy hač do 1. meje kraj wopušćeny měć. Wonkowny minister Heiko Maas (SPD) w sćelaku ARD na to pokaza, zo je cofnjenje wojakow zhromadny rozsud wšitkich 30 čłonow NATO. Budźe to „rjadowana akcija, při kotrejž wěstota wojakow w srjedźišću steji“.
Jedyn hłós?
To a tamne (15.04.21)
Hišće wyšu postawu Chrystusa hač w Rio de Janeiru twarja tuchwilu w lědma znatym južnobrazilskim městačku Encantado. Postawa ma 43 metrow wysoka być a tak pjeć metrow wjetša hač swětoznaty symbol w metropoli kraja. Kónc lěta chcedźa ju poswjećić, hdyž swjeća w Rio de Janeiru 90. róčnicu poswjećenja tamnišeho monumenta. Twarske kóšty 300 000 eurow chcedźa z pomocu pjenježnych darow financować.
Na schodźe spěšnika sobu jěć chcyše 30lětny z Kölnskeho hłowneho dwórnišća. Sobudźěłaćerka železnicy to widźeše a ćah z nuzowym borzdźidłom zadźerža. Policistam muž rozłoži, zo bě z ćaha wulězł, zo by cigaretu kurił. Při tym bě dalejězbu zapasł a na schodźenk skočił, jako njedachu so durje wjace wočinić. Nětko dyrbi so strašneho zasahnjenja do železniskeho wobchada dla zamołwić.
Na šulachwjac wědy wo Serbach trěbne
Berlin/Budyšin (SN). Spjelnić nadawki, kotrež wurostuja z Europskeje charty wo regionalnych a mjeńšinowych rěčach steješe póndźelu a wčera w srjedźišću internetneje „implementěrowanskeje konferency“ zwjazkoweho ministerstwa za nutřkowne naležnosće (BMI). Tam poda ministerstwo 7. rozprawu wo spjelnjenju nadawkow. Domowina jako zastupnica Serbow je w „mjenje serbskeho ludu pisomne stejišćo zapodała a w nim wosebje na potrjeby na polu kubłanja skedźbniła“, informuje nowinski rěčnik Domowiny Marcel Brauman.
