Zeleni sylniši hač CDU/CSU
Berlin (dpa/SN). Bychu-li zajutřišim, njedźelu, wólby zwjazkoweho sejma byli, bychu Zeleni jako najsylniša politiska móc wušli. Po zwěsćenju „politbarometra“ telewizije ZDF bychu woni ze 26 procentami před uniju CDU/CSU dobyli, kotraž by 25 procentow hłosow měła, po sćelaku ARD samo jeno 23. FDP by so snadnje na dźesać proc. polěpšiła. Procenty za tamne strony kaž SPD (14), AfD (11) a Lěwica (7) běchu njezměnjene.
Rybarjo blokadu skónčili
London (dpa/SN). Po tym zo su francoscy rybarjo blokadu Kanaloweje kupy Jersey skónčili, je britiske knježerstwo swojej wójnskej łódźi cofnyło. Přiwšěm chcedźa połoženje wobkedźbować, zo móhli w nuzy spěšnje reagować, premierminister Boris Johnson připowědźi. Francoscy rybarjo běchu přistaw kupy zašlahali, dokelž chce Wulka Britaniska mnóstwo ryby, kotrež smědźa před kupu łójić, drastisce wobmjezować.
Žada sej wjace zwjazanosće
Tónle přewšo mystiski napohlad Dubrjenskeho bahna nima runjewon ...
Kóždy dźesaty chce Łužicu wopušćić
Lipsk (dpa/SN). Najebać wusku zwjazanosć ze swojim regionom kóždy dźesaty wobydler Łužicy wo tym rozmysluje, swoju domiznu wopušćić. Wosebje mjez ludźimi w starobje 18 do 29 lět planuje nimale kóždy druhi (45 procentow), w běhu přichodneju dweju lět woteńć, kaž z reprezentatiwneho Łužiskeho monitora 2021 wuchadźa. Lipšćanski slědźenski institut MAS Partners bě so zhromadnje z Kwětanečanskej towaršnosću „Prozesspsychologen“ w februaru tysac ludźi w Sakskej a Braniborskej prašał. „Nas je překwapiło, zo je tema, domiznu wopušćić, dźensniši dźeń přeco hišće prezentna“, rjekny jednaćel MAS Stefan Bischoff, jako studiju předstaji.
Wolóženja za šćěpjenych schwalene
Berlin (dpa/SN). Za dospołnje šćěpjenych a wot korony wustrowjenych su wobmjezowanja koronapandemije dla zdźěla zběhnjene. Dźeń po zwjazkowym sejmje je dźensa tež Zwjazkowa rada wotpowědny wukaz schwaliła. Dyrbjeli-li jón spěšnje w Zwjazkowym zakonskim łopjenu wozjewić, móhli wolóženja hižo kónc tydźenja płaćiwe być.
Po wukazu njetrjebaja so dospołnje šćěpjeni a wustrowjeni wjace na kontaktne wobmjezowanja a zakaz wopušćenja domu dźeržeć. Při zetkanjach wjacorych wosobow woni sobu njeliča. Šćěpjeni njetrjebaja žadyn test we wobchodach abo pola frizera. Najebać to dyrbja tež woni škitny nahubnik wužiwać a wotstawk dźeržeć. Ministerski prezident Sewjerorynsko-Westfalskeje Armin Laschet (CDU) šćěpjenych namołwja „zamołwiće z nowym zbožom wobchadźeć“, zo njebychu hněw a zawisć zbudźili.
To a tamne (07.05.21)
Wulki šmjat na terasy zawostajiła je jałojca w Hamburgskim měšćanskim dźělu Billstedt. Do toho bě wona z dalšim howjadom z kilometer zdaleneje pastwy twochnyła. Te móžeše wobsedźer popadnyć, tamne poda so do sydlišća Mümmelmannsberg. Wustróžana wobydlerka njemóžeše tomu zadźěwać, zo jałojca jeje terasu zapusći a kwětki roztepta. Skónčnje dowjezechu skoćo wróćo na pastwu.
Móšeń z 15 000 eurami je 69lětny na ławce w parku w bayerskim Straubingu namakał. Direktnje po tym wón namakanku na policajskej straži woteda. 60lětny wobsedźer bě pjenjezy na ławce zabył. Po tym zo bě to pytnył, so wón wróći. Móšeń pak bě hižo preč. Jako jemu pjenjezy na policajske straži wróćichu, bě wón chětro wolóženy. Hač je 69lětny někajke namakanske myto dóstał, njeje znate.
Nowe klimowe zaměry
Berlin (dpa/SN). Němski zwjazkowy minister za hospodarstwo Peter Altmaier (CDU) je optimistiski, zo knježerstwo w běhu dnja nowy klimowy zakoń schwali, cyle tak, kaž sej to Zwjazkowe wustawowe sudnistwo žada. Altmaier bě so ze zwjazkowej kanclerku Angelu Merkel (CDU) dojednał, zo Němska produkciju klimje škodźacych maćiznow hač do lěta 2030 wo 65 procentow pomjeńši. Frakciski šef Zelenych Anton Hofreiter sej porno tomu žada, zo Němska mjenowany zaměr na znajmjeńša 70 proc. zwyši.
Spahn: Astrazeneca za wšěch
Berlin (dpa/SN). Zwjazkowy minister za strowotnistwo Jens Spahn (CDU) chcył šćěpjenje přećiwo koronawirusej ze srědkom Astrazeneca za wšěch zmóžnić a šćěpjenski porjad hnydom zběhnyć, kaž wón w telewiziji WDR připowědźi. Potom móhł so kóždy, kiž to chce, w lěkarskej praksy abo šćěpjenskim centrumje šćěpić dać. Na prašenje žurnalistow, hdy ma rjadowanje płaćić, minister rjekny: „Mój namjet rěka hnydom.“
Dialog w rozsudnej fazy
Felix Berger (nalěwo), direktor kliniki za přinarodźene defekty ...
Knježerstwo: Naprawy skutkuja
Berlin (dpa/SN). Po wšej Němskej płaćiwe rjadowanja nastupajo razniše naprawy při wosebje wulkich ličbach infekcijow z wida zwjazkoweho knježerstwa skutkuja. „Wot toho časa, zo smy nuzowe borzdźidło wukazali, widźimy nětko jasny přewrót“, rjekny šef kanclerskeho zarjada Helge Braun na wčerawšim woprašowanju čłonow knježerstwa w zwjazkowym sejmje. Tak pokazuje so po jeho słowach „wokomiknje woprawdźe ekstremne wotputanje w ličbach infekcijow, štož zbudźa nadźiju, zo tež přećeženje strowotnistwa woteběra“.
Wot zwjazkoweho sejma a Zwjazkoweje rady wobzamknjene nuzowe borzdźidło płaći wot 24. apryla, a to je-li na třoch dnjach za sobu sydomdnjowska incidenca hódnotu sto překročiła. Cyłoněmska incidenca je wčera na 132,8 spadnyła, dźeń do toho wučinješe wona hišće 141,4.
Wuradźuja wo wolóženjach
Sudnistwo próstwy wotpokazało
Karlsruhe (dpa/SN). Zwjazkowe wustawowe sudnistwo je wjacore chwatne próstwy přećiwo nócnemu zakazej, dom wopušćić, wotpokazało. „Z tym njeje rozsudźene, hač nócny zakaz Zakładny zakoń rani abo nic“, sudnistwo w Karlsruhe wčera zdźěli. Wo tym ma so we hłownym sudniskim jednanju rozsudźić. Wjacori skóržbnicy běchu sej žadali, zo sudnistwo z hnydomnym wukazom nócne wobmjezowanje swobodneho pohibowanja najprjedy raz zběhnje.
Knježerstwo ma wukaz za srědk, zo by dotal we wječornych hodźinach wotměwace so priwatne zetkanja wobmjezowało. „Zakaz słuži tak zasadnje legitimnemu zaměrej“, we wobzamknjenju rěka. Zdobom sudnicy zwěsćeja, zo fachowcy na tym dwěluja, hač je nócny zakaz kmany tutón zaměr docpěć. Na tamnym boku njemóža sudnicy spóznać, zo je naprawa „wočiwidnje přehnata“.
Po wšej Němskej zawjazowace rjadowanje płaći wot 24. apryla. We wokrjesach z incidencu nad sto njesmědźa ludźo mjez 22 a 5 hodź. dom wopušćić.
