Na čaporowych wikach kupjena stara škla je so jako chinska drohoćinka wukopała a wobsedźerjej wjele pjenjez wunjesła. Muž bě šklu z módro-běłym kwětkowym mustrom loni spontanje za 35 dolarow na wikach w staće USA Connecticut kupił. Pozdźišo da ju wot fachowcow awkciskeho domu posudźować. Při tym zwěsćichu, zo jedna so wo šklu z chinskeje dynastije Ming a zo eksistuje jenož hišće šěsć eksemplarow, zwjetša w muzejach. Na wčerawšim přesadźowanju wunjese škla 720 000 dolarow.

Paducha kwětkow lepiła je policija w Jenje. Muž bě w nocy na měšćanskej łuce połsta krokusow wurył a chcyše so zminyć, jako wot ludźi přiwołanych zastojnikow wuhlada. Woni jemu kazachu, swoju rubiznu nablaku zaso do zemje stykać. Nimo toho je wón nětko padustwa dla wobskorženy.

Den Haag (dpa/SN). Nižozemjenjo su nowy parlament wolili. Wólbne lokale běchu wot 7.30 hodź. wotewrjene. 13 milionow wobydlerjow bě namołwjenych, 150 zapósłancow druheje komory parlamenta wolić. Koronapandemije dla su wólby lětsa na tři dny podlěšili. Póndźelu a wčera je jědnaće procentow ludźi swój hłós wotedało. Po dotalnych prognozach je ministerski prezident Mark Rutte jasny faworit. 37 stron je k wólbam nastupiło. Wuslědk wočakuja w 21 hodź.

Policija raciju přewjedła

Berlin (dpa/SN). Z raciju je němska po­licija dźensa rano přećiwo pašowarjam ludźi a prostituciji postupowała. Přepytowali su wosom objektow w Berlinje, Hamburgu a w Schleswigsko-Holsteinskej, policija zdźěla. Podhladni su pječa ilegalnje do Němskeje přišłe Vietnam­janki k prostituciji nuzowali. W Berlinje zajachu 43lětnu podhladnu. 160 zastojnikow bě zasadźenych. Přepytowanja měrja so přećiwo přemysłowemu pašowanju a nanuzowanej prostituciji.

Eisenmann politiku wopušći

Berlin (dpa/SN). Ministerski prezident Sewjerorynsko-Westfalskeje Armin Laschet sej žada, šćěpjenje ludźi pře koronawirus pospěšić. W tym zwisku dyrbjeli šćěpjensku běrokratiju wottwarić a tež kónc tydźenja šćěpić, rjekny předsyda CDU wčera wječor w telewiziji ARD. Laschet přizna, zo je přetorhnjenje šćěpjenja ze srědkom Astrazeneca planowanja přemjetało. Zdobom wón potwjerdźi, zo měła politika warnowanja wědomostnikow chutnje brać. „Čakamy na štwórtkowny rozsud Europskeje agentury za lěki. Pjatk budźe šćěpjenski wjeršk, hdźež chcemy ze 16 zwjazkowymi krajemi wuradźować“, rjekny Laschet. Móžnych strowotniskich strachow dla su šćěpjenje ze serumom firmy Astrazeneca póndźelu přetorhnyli. W jednotliwych padach běchu so pola šćěpjenych trombozy jewili. Zwjazkowy financny minister Olaf Scholz (SPD) nadźija so pozitiwneho rozsuda z Brüssela. Wón je sej wěsty, zo změje Němska bórze dosć šćěpiwa za wšitkich.

Z wulkej napjatosću njewočakuja jeno zamołwići w strowotniskich zarjadach kóžde rano aktualne ličby sydomdnjowskeje incidency z Roberta Kochoweho instituta. Je-li hódnota we wokrjesu tři dny za sobu wyša hač 100, maja krajnoradne zarjady aktualnje płaćiwe wolóženja kaž click & meet we wikowanju abo prezencnu wučbu w šulach zaso cofnyć. W Zhorjelskim wokrjesu hižo wčera, w Budyskim dźensa je wotpowědna hódnota RKI po dwěmaj dnjomaj zaso pod marku 100 spadnyła. Skromnych wolóženjow so wospjet wzdać dyrbjeć, to nam tuž hnydom njehrozy. Wěsći čuć so přiwšěm njemóžemy. Wšitkim, kotřiž su za čas koronapandemije wot incidency pod 100 wot­wisni, runa so wozjewjenje aktualnych ličbow RKI we wěstej měrje loteriji. Snadź ma to swoju lěpšinu, zo je zakonjedawar je ­jako zakład přiwótřenja abo wolóženja ­postajił. Statistika Budyskeho wokrjesa mjenujcy wujewi wčera pjaty dźeń za sobu incidencu nad 100, w Zhorjelskim njeje wjele lěpje. Axel Arlt