Klimowe zaměry wotstorčić
Berlin/Drježdźany (dpa/SN). Sakski ministerski prezident Michael Kretschmer (CDU) sej hladajo na tuchwilne połoženje žada, zaměry nastupajo klimu znowa wusměrić. „Dosaha, hdyž Němska 2050 za klimu neutralnje hospodarja“, rjekny Kretschmer nowinarjam. „Hdyž chcemy hospodarstwo zaso wožiwić, su zastaranje z energiju a energijowe płaćizny centralne“, wón rjekny. Němska chce hač do 2045 za klimu neutralna być. Za to dyrbjała wona wustorkowanje wuhlikoweho dioksida jasnje redukować.
Plany zwjazkoweho knježerstwa nastupajo zniženje dawkow za milinu Kretschmer kritizuje. Tole by statej móžnosće inwesticijow rubiło. „Njetrjebamy při klimowych zaměrach stajnje prěni być“.
Ofensiwa w Gazy rozšěrjena
Němsko-pólske styki pohłubšić
Berlin (dpa/SN). Fachowc CDU za wonkownu politiku Paul Ziemiak namołwja Němsku hladajo na wuslědk prezidentskich wólbow w Pólskej, so nětko hišće naležnišo wo dobry poměr k susodnemu krajej prócować. Rozhłosowemu sćelakej rbb24 wón rjekny, zo dźe wo zasadne prašenja. Poćahi do Waršawy njesměli wo toho wotwisować, štó tam runje knježi. Dźěło budźe nětko naročniše a nowy koordinator zwjazkoweho knježerstwa změje wjace dźěła. Tež němsko-pólske knježerstwowe konsultacije měli so intensiwować. Wobaj krajej stej za zhromadne dźěło w Europskej uniji „fundamentalnje wažnej“. Za to měłoj tež parlamentaj wobeju krajow sylnišo kooperować, Ziemiak rjekny. „Bychmy-li němsko-pólsku parlamentarisku zhromadźiznu měli, kaž wona mjez Němskej a Francoskej hižo eksistuje, by to wulki wuspěch był, dokelž gremij njewotwisnje wot knježerstwa a prezidenta dźěła.
Ziemiak ma za móžne, zo politika noweho prezidenta Nawrockeho na kóncu k nowowólbam parlamenta powjedźe.
Wabjenje bjez klišejow
Wjace wopytowarstwa w Kamjenicy
Kamjenica (dpa/SN). Jako kulturna stolica Europy 2025 je Kamjenica wot spočatka lěta ze swojim wobšěrnym programom wjele ludźi přiwabiła – tež z wukraja. Muzeje kaž tež turistiski zwjazk wozjewjeja pospochi stupace ličby wopytowarjow.
„Zahajenske zarjadowanje z dohromady 80 000 hosćimi běše wulkotny zazběh do swjedźenskeho lěta“, podšmórnje jednaćelka kulturneje stolicy Andrea Pier. Tež generalna direktorka Kamjeničanskich Wuměłstwowych zběrkow Florence Thurmes informuje wo jasnje wjace hosćoch. Wot wotewrjenja wustajeńcy „European Realities“ w Muzeju Gunzenhauser je so ličba wopytowarjow w běhu jednoho měsaca na wjace hač 9 000 potrojiła, ličba wopytowarjow w Domje při Dźiwadłowym naměsće je so wot spočatka lěta podwojiła.
Syły ludźi na dnju muži w Błótach
impresum
Serbske Nowiny wudawaja so w Domowina-Verlag GmbH Ludowym nakładnistwje Domowina
Jednaćel: Syman Pětr Cyž
Ludowe nakładnistwo Domowina tzwr spěchuje Załožba za serbski lud, kotraž dóstawa lětne přiražki z dawkowych srědkow na zakładźe hospodarskich planow, wobzamknjenych wot Němskeho zwjazkoweho sejma, Krajneho sejma Braniborskeje a Sakskeho krajneho sejma.
Šefredaktor a zamołwity redaktor w zmysle
nowinarskeho zakonja: Marcel Brauman 577 232/233 Wyša redaktorka: Bianka Šeferowa 577 230
tel.: 03591 577 232 faks: 03591 577 202 e-mail: www.serbske-nowiny.de
Adresa redakcije a nakładnistwa: Sukelnska 27, 02625 Budyšin
Adresse der Redaktion und des Verlages: Tuchmacherstraße 27, 02625 Bautzen
Serwis za abonentow: 577 263
Předań nawěškow: Jadwiga Šołćic 577 266 e-mail:
Ćišć: DVH Weiss-Druck GmbH & Co. KG, Lejnjanska 14, 02979 Halštrowska Hola, wjesny dźěl Hory
Vertriebskennzeichen: 2 B 2560 B
To a tamne (02.06.25)
Njewšědnje ćopły wětr je płujadłoweho płachtakowarja w Chinje 8 000 metrow wysoko pozběhnył. Muž chcyše w prowincy Gansu poprawom jenož trjebany parašut wuspytać. 55lětny muž njemóžeše so wulkemu ćišćej powětra hižo dowobarać a docpě spěšnje wysokosć 8 589 metrow. Přez spěšny lět do njezwučeneje wysokosće zhubi wón nachwilnje samo wědomje, dokelž kislik pobrachowaše. Njewšědny podawk zamó wón dopokazać, dokelž bě kamera wšitko natočiła.
Hołbikaj w lětadle stej w USA chaos a zapozdźenje zawinowałoj. Jako pasažěrojo na lětanišću w Minneapolisu do mašiny zastupichu, wuhladachu ptačka, kiž pod sedłami běhaše. Při jězbje lětadła na start naraz dalši hołb w mašinje zalětowaše. Wjacori pasažěrojo reagowachu panisce. Někotři spytachu hołbikaj popadnyć. Na to so pilot zawróći.
Zhladuje na kreatiwne a zamołwite dźěło w nakładnistwje
Róža Domašcyna
Při błudźenku
za Marku Maćijowu
čas njewotběži wot naju
wuběži wob dźeń
wažimoj sej ćečenje
wobkružujemoj kamjenisko
njezamóžemoj je pohibnyć
čas je w nim zawrjeny kaž we wodźe
w kóždej sekli kotruž wuhladamoj
hdyž woda nimo kamjenja ćeče
čas je přitomny w zatorhnjenjach wětra
kiž wokoło naju kruži přitomny
w kóždym napisanym pismiku
a w pismiku kiž runje pisamoj
wobkedźbujemoj
što z lětami rozkćěje
a z lětami překćěje
ničo njeje dospołnje samsne
ničo so njewospjetuje
wšo so započina
Łužiska kupjel: Serbšćina faluje
Wojerecy (SN/mb). Na posedźenju serbskeje přirady města Wojerec srjedu w rumnosćach Kulturneje fabriki su so čłonojo gremija kritisce z pobrachowacej dwurěčnosću na informaciskich taflach we wobnowjenej Łužiskej kupjeli zaběrali. Předsydka přirady Evelin Graf a městopředsydka Gabriela Linakowa, županka župy „Handrij Zejler“, stej so zašły tydźeń w kupjeli rozhladowałoj. Při tym zwěsćištej, zo samo na fasadźe jenož „Lausitzbad“ steji, nic pak „Łužiska kupjel“. To je přeńdźenje přećiwo zakonjej.
Poskitk ze stron kupjele, deficit nutřka z připlackom kaž „předrasćernja“ spody taflow wotstronić, stej Graf a Linakowa wotpokazałoj. Pokazujo na načasny standard za nowe dwurěčne wuhotowanje we Łužicy wuzběhnyštej: Pak porjadnje a w samsnej wulkosći kaž němske napisy, pak scyła nic. Za fasadu ma město na kóždy pad rozrisanje namakać. Kaž Linakowa wčera našemu wječornikej wobkrući, chce serbska rada ćišć wukonjeć, zo by město pobrachowacu dwurěčnosć nachwatało. Znajmjeńša su jej přilubili, zo chcedźa teksty na internetnej stronje kupjele do serbšćiny přełožić dać.
