Pomocnicy staraja so na dróhach Liverpoola wo zranjeneho, po tym zo ...
Žane brónje Israelej
Berlin (dpa/SN). Bywši předsyda frakcije SPD Rolf Mützenich je so za to wuprajił, Israelej hižo žane brónje njedodawać. „To móhł nětko zasadnje dobry rozsud być“, wón dźensa w interviewje ze sćelakom Deutschlandfunk zwurazni, předewšěm hladajo na tuchwilne postupowanje israelskeje armeje w Gazaskim pasmje. Zwjazkowe knježerstwo dyrbi z parlamentom wo tym wuradźować a na kóncu zwjazkowa wěstotna rada wo tym rozsudźi. Zwjazkowy kancler Friedrich Merz (CDU) je so wčera raznje přećiwo postupowanju Israela wuprajił. Na Europskim forumje sćelaka WDR w Berlinje wón wčera zwurazni, zo njerozumi, što israelske wójsko w Gazaskim pasmje čini. „Ja zaměr njezapřimnu. Ciwilna towaršnosć dale a bóle ćerpi, předewšěm minjene dny. To njehodźi so hižo z bojom přećiwo terorizmej wopodstatnić.“
Dźěłarnistwo žadanje spušćiło
Berlin (dpa/SN). Dźěłarnistwo IG Metall je hladajo na napjate hospodarske połoženje swoje dotalne žadanje za štyri dny trajacym dźěłowym tydźenjom spušćiło. „Štyri dny trajacy tydźeń z połnej mzdu njesteji aktualnje hižo na lisćinje žadanjow dźěłarnistwa“, rjekny předsydka dźěłarnistwa Christiane Benner nowinarjam. Přiwšěm wostanje tajke rjadowanje dźěłoweho časa zmysłapołne.
Hladajo na napjate hospodarske połoženje w mnohich wobłukach Benner na to pokaza, zo dźěłodawarjo sami dźěłowy čas přistajenych přikrótša – na kóšty přistajenych.
Při cyłoněmskim zawjedźenju štyri dny trajaceho tydźenja z połnej mzdu boja so předewzaća negatiwnych sćěhow za němske hospodarstwo. Při woprašowanju rjekny 94 procentow wšěch 823 woprašanych předewzaćow, zo bychu hospodarski potencial přisadźili. Nimale 70 procentow firmow rjekny, zo njebychu swoje nadawki spjelnić móhli a zo bychu mjezynarodnje zwisk k načolnym předewzaćam zhubili.
Nowy kurs Merza kritizuja
W rjadach SPD wobaraja so zběhnjenju wobmjezowanja němskich brónjow
Berlin (dpa/SN). Wot zwjazkoweho kanclera Friedricha Merza (CDU) připowědźene zběhnjenje wšěch wobmjezowanjow při zasadźenju němskich brónjow přećiwo Ruskej zbudźa kritiku SPD. Socialdemokratiski politikar za wonkowne naležnosće Ralf Stegner nima kročel Merza „za pomocliwu“. Nowinarjam wón rjekny: „Wšitko, štož wójnu rozšěrja, je wopačne. Lěpje by było, diplomatiske prócowanja zesylnjeć.“
Zastupowaca předsydka Zelenych Agnieszka Brugger porno tomu připowědź zwjazkoweho kanclera wita. „Wladimir Putin runje z nowej surowosću wšitke prócowanja wo měr a rozmołwy z bombami niči. By wulki zmylk był, tomu přihladować“, wona rjekny.
Merz bě wčera na Europskim forumje sćelaka WDR w Berlinje rjekł, zo za wot Němskeje dodawane brónje w Ukrainje hižo žane wobmjezowanja njepłaća, štož dalokosć zasahnjenja na ruskim teritoriju nastupa. To rěka, „zo móže so Ukraina nětko tež zakitować, z tym zo na přikład wojerske zepěranišća w Ruskej nadběhuje. To wona dotal w tutej formje njemóžeše“, Merz rjekny.
Rozsudne su wuslědki
Porjedźenka
Za prawa kolesowarjow po puću byli
To a tamne (27.05.25)
Do Bodamskeho jězora skočił je napity kolesowar w Lindauwje, zo by so policajskej kontroli wuwinył. Policisća chcychu 24lětneho kontrolować, kiž bě z kolesom po seklojtej liniji po puću. Kolesowar dojědźe na to na pobrjóh jězora a zalěze do wody. Zastojnicy wołachu wohnjowu woboru wo pomoc, dokelž so bojachu, zo móhła situacija za kolesowarja strašna być. Po třoch hodźinach přemjerznjeneho skónčnje namakachu. Wón steješe pod wliwom alkohola a drogow.
Dwě tonje methamfetamina w hódnoće 270 milionow eurow su indonescy cłownicy sćazali. Je to najwjetše hdy namakane mnóstwo tejele drogi w kupowym staće, medije pisaja. Ilegalnu posyłku su po měsacy trajacym slědźenju tajneje słužby na łódźi před wuchodnym pobrjohom kupy Sumatra namakali. Drogi běchu w 67 kistach schowane a za transport do Europy přihotowane.
Přećiwo antisemitizmej
Drježdźany (B/SN). Na wopomnjenskim dnju Yom HaShoa 2025 je zamołwity sakskeho knježerstwa za židowske žiwjenje dr. Thomas Feist w pisomnym stejišću ludnosć pozbudźował: „Ze zašłosće čerpamy móc za spěchowanje židowskeho žiwjenja w Sakskej a Němskej a za zaměrne wustupowanje přećiwo antisemitizmej. W Sakskej mjezynabožinski dialog wosebje spěchujemy, přetož spominanje njerěka jenož wobchowanje, ale jednanje w přitomnosći.“
Nowa koptiska cyrkej
Drježdźany (B/SN). Z njewužiwaneje wopomnjenskeje žurle na ewangelskim pohrjebnišću St. Pauli w Drježdźanach je nowa cyrkej nastała. 26. apryla přepodachu ju koptiskej wosadźe. Farar Björn Fischer dari wosadźe kalinku (Schneeball), kotraž stajnje k jutram kćěje. Wona ma na poswjećenje cyrkwje a na zhromadnu wěru dopominać.
Socialna politika prašana
Gazaske pasmo wobsadźić
Gaza (dpa/SN). Israelske wójsko chce po informacijach medijow w běhu někotrych tydźenjow tři štwórćiny Gazaskeho pasma wobsadźić. Dotal wójsko 40 procentow dospołnje zawrjeneho pobrjóžneho teritorija kontroluje, Times of Israel rozprawja. Wobydlerjow Gazaskeho pasma chcedźa na štwórćinu dotalneho teritorija hromadu stłóčić, zo bychu Gazaske pasmo wot Hamas wuswobodźili, mjeztym tež Wall Street Journal piše.
Žane němske brónje do Israela
Berlin (dpa/SN). Wjacori zapósłancy SPD w zwjazkowym sejmje žadaja sej postupowanja Israela w Gazaskim pasmje dla, eksport němskich brónjow do Israela hnydom skónčić. „Němske brónje njesměli so za rozšěrjenje humanitarnych katastrofow a za łamanje prawa ludow znjewužiwać“, rjekny wonkopolitiski rěčnik frakcije SPD Adis Ahmetovic nowinarjam. Tež Ralf Stegner žada sej kónc dodawanja němskich brónjow, zo njeby so humanitarna katastrofa w Gazy podlěšiła.
Dröge za spěšne staćanstwo
