Wopyt bamža njewěsty
Schöntal (B/SN). Njewěsty je wopyt bamža Franciskusa do Němskeje. Kaž předsyda biskopskeje konferency, kardinal Reinhard Marx, žurnalistam w badensko-württembergskim Schöntalu rjekny, njeje wopyt bamža hižo žana tema. Franciskus planuje k róčnicy reformacije 2017 pućowanje do Šwedskeje. Kaž pak Marx wuzběhny, to njerěka, zo je projekt wopyt bamža zasadnje z blida.
223 namócnych konfliktow
Heidelberg (B/SN) „Konfliktowy barometer 2015“ registruje 223 namócnych konfliktow na swěće. Institut w Heidelbergu za mjezynarodne slědźenje konfliktow zapisa tu 19 rozestajenjow jako wójny, najwyši schodźenk to eskalacije. Najčasćiše přičiny konfliktow su ideologiske a nabožinske přećiwki, bój wo resursy a wo móc kaž tež etniske přećiwki.
Cyrkwi zasudźatej hidu
Prěni swědkojo wuprajili
Drježdźany (dpa/K/SN). W terorowym procesu přećiwo prawicarsko-ekstremistiskej skupinje „Freital“ je wyše krajne sudnistwo dźensa prěnich swědkow přesłyšowało. Třo policisća mějachu rozprawjeć wo swojich přepytowanjach přećiwo wosom wobskorženym w starobje 19 do 39 lět. Jutře su dalši štyrjo policisća na rjedźe. Pjatk maja prěni ciwilni swědkojo wuprajić. Wobskorženi k wumjetowanjam mjelča, jeničce najmłódši z nich, 19lětny Justin S., je so přiznał.
Přepytuja přećiwo 14 wojakam
Bad Reichenhall (dpa/SN). Pozdatneho pada seksualnych wobćežowanjow wojaka přez předstajenych dla Traunsteinske statne rěčnistwo nětko přepytuje. Wčera bě zwjazkowe zakitowanske ministerstwo zwjazkowy sejm wo pozdatnym njeskutku w Bad-Reichenhallskej kasernje informowało. Statne rěčnistwo přepytuje přećiwo 14 wojakam. Hižo loni w oktobru bě so potrjecheny na społnomócnjeneho wobory wobroćił.
Podpisma za lětanišćo
Před domom na Choćebuskej Nowoměšćanskej dróze čisło 2 je ...
Thomas de Maizière sakski chorhojnik
Turkowskaso wot EU wotsala
Za Europu regionow
Njebjelčicy (SN). Ze zjawnym listom wobroća so iniciatiwa Serbski sejm na prezidenta komisije EU Jeana-Claudea Junckera, zo by sej žadała diskusiju wo „Europje regionow“. Wčera je medijam wotpowědny list sposrědkowała.
Přičina lista je tuchwilna kriza Europskeje unije, kotraž wuwabja generelnu diskusiju wo přichodźe zhromadźenstwa. Serbski sejm je nastork pjeć móžnych opcijow zestajał a je na přikład w interneće wozjewił. Najzaměrniša opcija je Europa regionow, kotraž zmóžnja eficientne regionalne zarjadnistwo z wjac wěcownej kompetencu, při čimž je wobydlerjej bliska.
Ruska, Turkowska, China ...
Najwšelakoriše kraje Balkan wobwliwuja – Štó so přesadźi?
Hižo lětdźesatki Balkan w Europskej uniji wulku rólu hraje. Hrožachu-li někajke rozkory, su tam USA prawidłownje pomhali. Tola tónle poćah hrozy so sypnyć. Što planuja konkurenća, kotřiž so dale a bóle w krajach juhowuchodneje Europy rozpřestrěwaja?
Běłohród (dpa/SN). Zapósłanča EU za wonkowne naležnosće Federica Mogherini dyrbješe na njedawnej jězbje po Balkanje nazhonić, kak mało respekta tam před Europskim parlamentom maja. W Makedonskej ju statny prezident z jeje předstawami wo wuńdźenju krizy na Balkanje scyła słyšeć nochcyše. Jeje narěč w serbiskim parlamenće skónči so w fiasku. W Kosowje so konflikty, bjezposrědnje po tym zo bě Mogherini region wopušćiła, dale přiwótřichu. „Balkan hižo na Brüssel njesłucha“, komentowaše před dnjemi statna powěsćernja Sputnik. Runje tak jewi so w nadpismach nowin prašenje: Přiwobroći so wuchodna Europa Ruskej?
Karikatura (21.03.17)
Postajenje njesmě płaćiwosće nabyć
Podstupim (SN/JaW). Nowe braniborske šulske postajenje za wučbu serbšćiny ma skutkownje k wožiwjenju delnjoserbšćiny přinošować. To žada sej kubłanskopolitiska rěčnica frakcije Lěwicy Braniborskeho krajneho sejma Kathrin Dannenberg. „Tohodla słuša prašenje wyšeje kwality wučby serbšćiny na agendu krajneje politiki“ sej wona dale žada. Zo by so rěč we wšědnym žiwjenju zaso zakótwiła, je wjace derje wukubłanych wučerjow za rěčne a dwurěčne předmjety trěbnych, je wona přeswědčena. Zdobom ma Kathrin Dannenberg projekt Witaj za wuspěšny, štož podkładuja ličby braniborskeho ministerstwa za kubłanje, młodźinu a sport (MBJS). Po nich je „w šulskim lěće 2016/2017 na delnjołužiskich šulach 1 678 dźěći delnjoserbšćinu wuknyło. To je 315 a tak nimale 20 procentow wjac hač w šulskim lěće 2000/2001“, politikarka potwjerdźa, „serbšćinu wuknyć je in! Nětkole dźe wo kwalitu.“ Měli tuž projekt z wotpowěnymi ramikowymi wuměnjenjemi dale spěchować, wona měni.
To a tamne (21.03.17)
Štóž dyrbi w chinskej stolicy Pekingu na zjawny nuznik a trjeba papjeru za njón, ma najprjedy raz swoje mjezwočo skenować dać. Přičina toho je přiběrace padustwa nuznikoweje papjery. Tomu maja skenery nětko zadźěwać, kaž nowiny pišu. Trjeba-li něchtó krótko za sobu papjeru, ma na nju někotre mjeńšiny čakać. Štóž sej časćišo tajku žada, tomu připrawa hižo žanu njepřewostaja.
Produkciju awtow marki BMW staj dźěłaćerjej w Mnichowskej tworni přetorhnyłoj. Wonaj běštaj so chětro wopiłoj a nimo toho joint kuriłoj. Krótko do kónca pózdnjeje słužby pak wobaj kolaběrowaštaj, na čož kolegojo nuzoweho lěkarja zawołachu. Dohromady 40 mjeńšin tam hižo ničo njeběžeše. Škodu trochuje zawod na srjedźnu pjećcyfrowu sumu.
