Tajny přihot slěborneho kwasa je sobotu w mecklenburgsko-předpomorskim Runowje zasadźenje policije zawinił: Žona bě wokoło 23 hodź. dwě „podhladnej postawje“ na susodnej ležownosći wobkedźbowała. Tukajo na paduchow zawoła wona policiju. Při přepruwowanju so wukopa: „Paduchaj“ běštaj syn susoda a toho towarš. Wonaj chcyštaj składnostnje slěborneho kwasa dom ze slěbornej foliju wupyšić.
Wopica je prošerjam w jednym z indiskich templow njewočakowany pjenježny dar wobradźiła. Do toho bě wona móšeń žony spakosćiła. Na muri sedźo mjetaše wopica na to pjenjezy w hódnoće wjace hač 2 000 eurow mjez ludźi, kotřiž bankowki dźakownje zezběrachu. Wobsedźerka zamó jedno snadny dźěl swojich pjenjez zaso zhromadźić, kaž indiske nowiny rozprawjeja.
Njewjedro howriło
Choćebuz (dpa/SN/ch). W běhu jenož dweju hodźin dyrbjachu wohnjowi wobornicy sobotu popołdnju na juhu Braniborskeje na něhdźe 25 zasadźenjach spowróćane štomy a zwottorhane hałzy rumować, informuje rěčnik regionalneho běrowa Łužica w Choćebuzu. Nóc pak wosta měrna. Nichtó njebu zranjeny. Němska wjedrowa słužba bě za wokrjesaj Łobjo-Halštrow a Sprjewja-Nysa před njewjedrami warnowała. Na železniskej čarje Choćebuz–Lipsk dyrbješe blisko Schöneberga wosobowy ćah zastać, dokelž bě štom horni milinowód potorhnył.
Přirodoškitarjo zwrěšćili
Berlin (dpa/SN). Rostliny w historiskich parkach Berlina a Braniborskeje přiběraceje ćopłoty a suchoty dla ćerpja. Zo móhli zahrodowe kompleksy na změnu klimy lěpje reagować, zahajichu dźensa nowy slědźenski projekt. Wědomostnicy chcedźa přichodne tři lěta změny analyzować a wšelake pospyty z rostlinami přewjesć, zo hodźeli so parki zachować, kaž krajny architekt Berlinskeje techniskeje uniwersity prof. Norbert Kühn powěsćerni dpa rjekny.
Do projekta zapřijate su objekty Załožby pruskich hrodow a zahrodow: hród Sanssouci w Podstupimje, Berlinski hród Charlottenburg kaž tež zahrody w Podstupimje-Babelsbergu a Rheinsbergu. Tam maja wot nalěća 2016 płoniny nastać, na kotrychž móža wopytowarjo dźěła přewodźeć. Wuchadźišćo běchu přiběrace ćeže w Podstupimje, park zachować. Wosebje na štomach su škody wočiwidne. Častodosć so hižo njeradźi, nowe štomy sadźeć. Potrjechene su předewšěm stare domjace družiny kaž buki, duby a lipy, zamołwići zdźěleja.
Swojimaj wočomaj wěrić nochcyše wodźer nakładneho awta na awtodróze pola Berlina, jako přesćahny swoje priwatne awto, prawdźepodobnje z paduchom za wodźidłom. Šofer alarmowaše policiju, kotraž móžeše awto krótko za namjeznym přechodom w Frankfurće nad Wódru zadźeržeć. 26lětny paduch dyrbi nětko ze skóržbu ličić.
Za zymsku słužbu zwučuje Essenski měšćanski zawod tele dny na wulkim zwučowanišću ze sněhowymi płuhami. Při tym maja so sobudźěłaćerjo na přewšo kompleksnych mašinach wukubłać: Šofer sedźi naprawo a wodźi płuh z małym joystickom. Nimo toho ma awtomatisku připrawu za selenje dohladować. Prěni dźeń wuknjechu na slalomowej čarje jězdźić. W Essenje chcedźa tak 150 šoferow za hotowostnu zymsku słužbu kubłać.