Proces so nachila
Choćebuzu (dpa/SN/ch). Po pašowanju nimale sydom milionow njezacłowjenych cigaretow z Pólskeje do Braniborskeje so Choćebuski proces přećiwo 36lětnemu mužej dawkoweho potajerstwa dla nachila. Dźensa připołdnju přednjesechu pledoajejej, kaž krajne sudnistwo zdźěla. Statne rěčnistwo wobskorženemu wumjetuje, zo je cyłkownu dawkowu škodu něhdźe 1,5 milionow eurow zawinił. Wot lěta 2011 do 2012 je z Pólskeje pochadźacy jako hłowa pašowanskeje cwólby transporty sobu organizował. Wobskorženy wšak wumjetowanja prěje.
Hrajnišćo za krimi
Brüssel/Athen (dpa/SN/K). Dojednanje je docpěte – we wobłuku euroskupiny – pod kotrymi wuměnjenjemi dać Grjekskej třeći pomocny paket we wysokosći 82 do 86 miliardow eurow. Po wšěm zdaću pak nochcedźa w kraju samym tak bjeze wšeho za to sobu ćahnyć. Ministerskemu prezidentej Alexisej Tsiprasej duje jěry wětřik mjezwoči, tež ze swójskeho knježerstwoweho lěhwa. Dźěłarnistwo statnje přistajenych namołwi k cyłostatnemu stawkej.
Južna Amerika (B/SN). W Ekuadorje, na prěnjej staciji swojeho pućowanja, je so bamž Franciskus z tamnišim prezidentom Raphaelom Correa zetkał. Tón prošeše swjateho wótca wo podpěru w boju přećiwo chudobje a swojeje hospodarskeje politiki. Opozicija a škitarjo wobswěta wočakowachu wot njeho jasne stejišćo k swobodźe měnjenja a ke škitej dešćoweho lěsa.
W Boliwiskej metropoli Santa Cruz de la Sierra swjećeše bamž z třomi milionami wěriwych Božu mšu pod hołym njebjom. Wěnował je so tež wuwołanym jastwam Palmasola, hdźež žiwori 5 300 jatych. W Paraguayskim Asunciónje zetka so z najchudšimi wobydlerjemi měšćanskeho dźěla, kotryž steješe njedawno hišće pod wodu.
Na wulkej Božej mši w parku Nu-Guazu běchu mjez třomi milionami putnikow 300 000 z Argentinskeje. Před wołtarjom běše wosebity sektor za zastupjerjow narodnych mjeńšin a indianskich ludowych skupin rezerwowany. Jich prošeše wo wodaće za njeskutki zašłosće, kotrež bě jim katolska cyrkej načiniła.
Zrěčenje wotzamknyli
Kuriozna namakanka w žołdku mortweho krokodila: Wědomostnicy su při patologiskim přepytowanju zemrěteho krokodila Maxa 20 pjenježkow z časa NDR našli. Nimale 60lětny krokodil bě 6. julija w Drježdźanskej coologiskej zahrodźe zahinył. Wopytowarjo běchu stajnje zaso pjenjezy do wodoweho bazenka mjetali. Zemrěł pak je Max ćežkeho zahorjenja płucow a zhibadłow dla.
Skóncowaneho busa dla, w kotrymž sedźa „płachty woblečeni ludźo“ su w Delnjej Sakskej policiju k parkowanišću při awtodróze A 1 wołali. Kaž so wukopa, jednaše so wo skupinu mnichow rjadu Hare-Krishna z Wulkeje Britaniskeje, kotřiž běchu na dompuću ze Skandinawiskeje. Po puću běchu z historiskim busom, kotryž měješe tójšto techniskich njedostatkow, kaž policija zwěsći. Zastojnicy přewodźachu bus hač k porjedźerni.
Změna jenož z brunicu
Podstupim/Wjelcej (dpa/SN/ch). Strukturna změna we Łužicy so po słowach braniborskeho hospodarskeho ministra Albrechta Gerbera (SPD) jenož zhromadnje z brunicowym hospodarstwom poradźi. Jenož z brunicu jako mostowej technologiju je změna energije móžna, praji minister wčera na nowinarskej jězbje po rewěrje. Wuhlowe jamy a milinarnje poskićuja tysacam ludźom we Łužicy dobre dźěło. Je tuž wjesoły, zo je koaliciski wuběrk Zwjazka spočatk julija rozrisanje k redukowanju emisijow wuhlikoweho dioksida w energijowym hospodarstwje namakał. Kompromis předwidźi, dźěło w milinarskich blokach hač do 2020 zastajić.
Ryby mrěja