Athen (dpa/SN/K). Krótko po tym zo su Grjekojo žadanjam mjezynarodnych pjenjezydawarjow „ně“ prajili, je financny minister Gianis Varoufakis swój wotstup připowědźił. Někotři čłonojo euroskupiny su jemu wědźeć dali, zo jeho přitomnosć na dalšich jednanjach njeje witana. Ministerski prezident Alexis Tsipras ma jeho demisiju za „potencielnje pomocnu“. Varoufakis bě hač do kónca pozicije pjenjezydawarjow kritizował a jich postupowanje „terorizm“ mjenował.
We wčerawšim ludowym woprašowanju je so njenadźicy nahladna wjetšina grjekskich wolerjow přećiwo žadanjam wěrićelow nastupajo reformy a lutowanje wuprajiła. 61,31 procentow wothłosowacych sćěhowaše namołwu premiera Tsiprasa, hłosować „ně“, skrućejo jemu tak rjap. 38,69 procentow rjekny „haj“. Njeposrědnje po swojim „wuspěchu“ Tsipras w telewiziji zwurazni: „Nětko połoži so brěmjo grjekskeho dołha na blido.“ Trěbne su inwesticije a spušćenje dołha. Prioritu ma znowawotewrjenje bankow.
Essen (dpa/SN/K). Po poražce liberalno-konserwatiwneho křidła na zwjazkowym stronskim zjězdźe AfD w Essenje chcetaj załožer strony Bernd Lucke a jeho přiwisk woprašowanje sobustawstwa wotměć. Čłonojo towarstwa „Weckruf 2015“ budu w přichodnych dnjach prašeni, „hač zhromadnje ze strony AfD njewustupić“, kaž zdźělichu. Dalša alternatiwa by była, załožić swójsku nowu stronu.
Při wólbach prěnjeho zwjazkoweho předsydy AfD bě razna kontrahentka Luckeho, předsydka sakskeje AfD Frauke Petry, sobotu z hłosami prawico-nacionalnych njenadźicy jasnje dobyła. Wjacori čłonojo, mjez nimi něhdyši prezident industrije Hans-Olaf Henkel, na to připowědźichu, zo z lěta 2013 załoženeje strony wustupja. Petry je so wčera w swojim dosłowje prócowała, złahodnić wuprajenja někotrych swojich přiwisnikow přećiwo wukrajnikam. Předsydka w meji załoženeho towarstwa „Weckruf 2015“ Trebesius komentowaše to takle: „Štóž so z prawicarjemi do łoža lehnje, njesmě so dźiwać, hdyž z nimi wotući.“
Berlin (dpa/SN). Po rekordnych temperaturach 40,3 stopnjow w bayerskim Kitzingenje su wčera wječor we wjacorych regionach Němskeje njewjedra zachadźeli. Wosebje potrjechene běchu Sewjerorynsko-Westfalska, Delnja Sakska, Schleswigsko-Holsteinska, Braniborska a Mecklenburgsko-Předpomorska. Tam bě nadróžny a železniski wobchad z městnami spowalanych štomow dla haćeny. Porjechena bě tež železniska čara mjez Berlinom a Hannoverom. Na Berlinskim lětanišću Tegel njemóžachu mašiny wěsty čas startować. W Berlinje dyrbjachu koncert Heleny Fischer pod hołym njebjom njewjedra dla dočasnje skónčić.
Přewšo horcy kónc tydźenja je sej wjacore smjertne wopory při jězorach a rěkach žadał. W Němskej zatepi so cyłkownje 17 ludźi, w susodnej Pólskej samo 37, mjez nimi 13lětna holca, kaž powěsćernja dpa rozprawja. Po informacijach pólskeje policije je ličba zatepjenych při kupanskich njezbožach w sezonje hižo na 124 rozrostła. Policija namołwja so alkohola wzdać a na dźěći kedźbować.
Ekstremna horcota kónca tydźenja je so tež na kulturne zarjadowanja wuskutkowała. Tak su sobotu wječor w Nürnbergu inscenaciju opery na dworje radnicy krótkodobnje do žurle přepołožili, dokelž dyrbjachu barokne instrumenty při 35 stopnjach celsija a 40procentowskej włóžnoće stajnje zaso znowa hłosować.
Dołhe kije za sebjefotografowanje z mobilnymi telefonami – tak mjenowane selfie-sticks – su wotnětka w najwjetšim wólnočasnym parku Němskeje w Rusće pola Freiburga zakazane. Kije wohrožeja wěstotu ludźi, rěčnik předewzaća zdźěli. Tak móhli so wone při jězbach na seklojtej čarje abo při druhich atrakcijach z ruki sunyć a druhich ludźi zranić.
Rozjimuja wokrjesnu reformu
Podstupim/Choćebuz (dpa/SN/ch). Wótrje diskutowana wokrjesna reforma steji srjedu dopołdnja w srjedźišću debatow w Braniborskim krajnym sejmje. Krajne knježerstwo chce woteběraceho wobydlerstwa předewšěm na wsach dla ličbu 14 wokrjesow a štyrjoch bjezwo- krjesnych městow na maksimalnje dźesać redukować. Opozicija, wobstejaca z CDU, BVB/Swobodni wolerjo a AfD, je přećiwo tomu. CDU žada sej woprašowanje ludu k reformje, Swobodni wolerjo chcedźa ludowy rozsud. Tež bjezwokrjesne města Choćebuz, Frankfurt nad Wódru a Brandenburg nad Habolu wadźa so wo swoju samostatnosć. CDU widźi strach, zo njemóhli wobydlerjow wulkich zjednoćenych gmejnow dla dosahajcy zastarać. Kaž zamołwići Choćebuza připowědźichu, chcedźa so woni ze wšěmi srědkami wokrjesnej reformje wobarać, zo móhli bjezwokrjesnosć zachować.
Žadyn rekord horcoty
Athen (dpa/SN). Europscy politikarjo su do debaty wo grjekske ludowe wothłosowanje k lutowanskej politice zasahnyli. Při tym za to wabja, zo Grjekojo žadanjam mjezynarodnych pjenjezydawarjow nastupajo lutowanje přihłosuja. Grjekske knježerstwo sej porno tomu přeje, zo wobydlerjo z jasnym „ně“ hłosuja. Hač so dwělomny referendum kaž planowane zajutřišim, njedźelu, scyła wotměje, chcyše zarjadniske sudnistwo kraja w běhu dnja rozsudźić. Wobydlerjej běštaj přećiwo referendumej skoržiłoj.
Komisar Europskeje unije za měnowe naležnosće Pierre Moscovici je Grjekow namołwił z „haj“ hłosować. „Bychu-li ludźo „ně“ prajili, bychu wšitke jednanja wo dalšu pjenježnu pomoc na dobro Grjekskeje wo wjele komplikowaniše byli“, Moscovici wčera w Brüsselu potwjerdźi, „pozicija grjekskeho knježerstwa njeby z ,ně‘-hłosom wolerjow zesylnjena była, „skerje nawopak.“