Nowe dwórnišćo za nakładne ćahi
Mało dźěći pola zubneho lěkarja
Berlin (dpa/SN). Tójšto dźěći w Berlinje a Braniborskej kóždolětne profylaktiske přepytowanje zubow pola zubneho lěkarja misnje. Lěta 2024 je mjenje hač połojca wšěch dźěći hač do šěsć lět pola zubneho lěkarja było. To pokazuja ličby chorobneje kasy AOK. W Berlinje je loni jenož 44 procentow dźěći na profylaktiskim přepytowanju było, w Braniborskej bě jich 42 proc. Za přepytowanje su daty dźěći wuhódnoćili, kotrež su pola chorobneje kasy zawěsćene.
Mjez šěsćlětnymi, kotřiž su 2024 zubneho lěkarja wopytali, dyrbjachu kóžde třeće dźěćo kariesy dla zastarać. W Braniborskej bě to 20 procentow. Přiwšěm je so połoženje w zašłych pjeć lětach snadnje polěpšiło: 2019 dósta w Berlinje hišće 34 procentow dźěći plombu, w Braniborskej 27 procentow.
Hač do šesteho žiwjenskeho lěta móža dźěći šěsć darmotnych lěkarskich terminow wužiwać, zo bychu móžne škody zubow pola nich tak zahe kaž móžno spóznali. To zalutuje dźěćom pozdźišo njetrjebawše lěkowanja. Dźěćacy lěkarjo, kotřiž widźa, zo njebě dźěćo hišće ženje pola zubneho lěkarja, měli staršich narěčeć.
To a tamne (04.09.25)
Dokelž njeje bayersce rěčał je so telefoniski wobšudnik w delnjobayerskim Bruckbergu we wokrjesu Landshut sam přeradźił. Njeznaty bě na 84lětneho zazwonił, so jako jeho wnučk wudawał a wo wulkim njezbožu rozprawjał. 84lětny na to telefonat skónči. Žadyn z jeho wnučkow njerěči wysokoněmsce, starc policiji rjekny. Pjenjezy sej cuzy při telefonje ani wjace žadać njemóžeše, 84lětny bě słuchatko hižo zaso połožił.
30 lět je žona w Berlinje w loteriji stajnje samsne ličby woliła, doniž so jeje sćerpnosć skónčnje njezadani. Wona je 4,4 miliony eurow dobyła. Kaž Berlinske nowiny rozprawjeja, hraje žona w starobje mjez 50 a 60 lětami wot lěta 1996 kóždy tydźeń sobotnu loteriju. Při tym zasadźuje wona stajnje samsne ličby: 5, 11, 13, 39, 42 a 48, wona přeradźi. Dotal je jeje dobyće lětsa najwyše w Berlinje.
Jenčec prěnje lěto w sejmje zjimała
Što je direktnje wolena zapósłanča „serbskeho“ wólbneho wokrjesa w Sakskim krajnym sejmje Elaine Jenčec (CDU) dotal zdokonjała? Wo tym je młoda politikarka wčera bilancu wozjewiła.
Kamjenc (SN/mb). W swojim prěnim wokolniku, kotryž je w rubrice „aktualne“ na internetnej stronje 31lětneje zapósłanče přistupny, posrědkuje wona dohlad do swojeje dźěławosće w krajnym parlamenće a we łužiskim regionje. Elaine Jenčec přisłuša wuběrkam za etat a financy, za šulu a kubłanje a za peticije wobydlerjow. Nimo toho bu jako zastupowaca čłonka parlamentariskeje přirady Załožby za serbski lud wolena. To wobhladuje wona jako wosobinski wjeršk: „Wjeselu so na to, serbsku kulturu a rěč w tutym gremiju podpěrować.“
Koaliciski wuběrk so zešoł
Berlin (dpa/SN). Wodźacy zastupnicy CDU/CSU a SPD su so dźensa na swój mjeztym třeći koaliciski wuběrk zešli. Po poměrnje turbulentnej lěćnej přestawce wuradźowachu wo dźěłowym programje druheho połlěta. Při wšěm je tójšto problemow njerozrisanych: zwada wo sudniku wustawoweho sudnistwa, reforma socialneho systema wobydlerskeho pjenjeza a miliardy eurow wulki deficit zwjazkoweho etata koaliciju dale poćežuja.
Drogowych kurěrow morili
Washington (dpa/SN). Po informacijach prezidenta Donalda Trumpa je wójsko USA při nadpadźe na łódź, kotraž je pozdatnje drogi z Venezuele do zjednoćenych statow pašowała, jědnaće ludźi moriło. Republikan rěčeše na swojej internetnej platformje Truth Socail wo „teroristach“. Wobrónjena akcija měrješe so přećiwo drogowej cwólbje Tren de Aragua z Venezuele, kotruž je knježerstwo USA na lisćinu teroristow zapisało. Trump pokazuje film z palacym so čołmom.
Dokumenty Epsteina předleža
Z najwjetšej wojerskej paradu w stawiznach kraja je China 80. ...
Demografiska změna w Israelu
Merz wobara so von der Leyen
Berlin (dpa/SN). Zwjazkowy kancler Friedrich Merz (CDU) je potwjerdźił, zo njeje komisija Europskeje unije za wojersku podpěru Ukrainy zamołwita. To je naležnosć tak mjenowaneje koalicije zwólniwych. „Europska unija njeje za to přisłušna“, rjekny předsyda CDU sćelakej Sat 1. Z tym reagowaše Merz na wuprajenja prezidentki komisije EU Ursule von der Leyen, kotraž bě po informacijach nowin „wo dokładnych planach nastupajo zasadźenje wojakow w Ukrainje po měrowym zrěčenju“ rěčała. Za to bě ju hižo zakitowanski minister Boris Pistorius (SPD) raznje kritizował.
W Parisu zetka so jutře koalicija zwólniwych, kotrejž přisłuša wjace hač 30 krajow.
BSW namołwja muži so spjećować
Podstupim (dpa/SN). Zwjazk Sahry Wagenknecht w Braniborskim krajnym sejmje młodostnych namołwja, zo so njech daledawanju datow za dobrowólnu wojersku słužbu w zwjazkowej woborje spjećuja. Na swojej internetnej stronje prezentuje strona za to wotpowědny mustrowy tekst. „Zwjazkowa wobora dóstanje wot wobydlerskich zarjadow awtomatisce daty młodostnych, kotřiž su přichodny čas połnolětni“, tam pisaja. Na te wašnje ma zwjazkowa wobora składnosć mjez młodostnymi wabić. Zakoń wo přizjewjenju pak młodostnym dowola, zo smědźa so daledawanju swojich datow wobarać.
Zwjazkowe knježerstwo bě minjeny tydźeń zakoń wobzamknyło, z kotrymž planuja natwar noweje woborneje słužby w Němskej. Dale chcedźa tak tež daty młodych muži zběrać, zo móhli jich jako móžnych wojakow registrować, za wobornu słužbu zahorić abo na mustrowanje skazać. Njedyrbjała-li dobrowólna słužba ličbu wojakow zwjazkoweje wobory jasnje zwyšić, móhła zawjazowaca woborna winowatosć trěbna być.
