Wuprózdnjena kasa planowaneho maturitneho swjedźenja šulerjow gymnazija w Gelsenkirchenje znjeměrnja. Na wšě 10 000 eurow, kotrež běchu šulerjo hižo za zhromadny swjedźeń znosyli, dyrbja nětko narunać. Za zběrku zamołwita šulerka je zdźěliła, zo pjenjezy wjace nima. Nětko policija přećiwo šulerce přepytuje. Maturitny swjedźeń móža drje při wšěm přewjesć, dokelž mjeztym nowe pjenježne dary dochadźeja. Gymnazij prosy, ze šulerku fairnje wobchadźeć.

Z patronu we wačoku je policija 65lět­neho Američana na Kölnskim lětanišću lepiła. Při wosobinskej kontroli bě podhladny předmjet w toši muža napadnył. Přiwołani policisća zwěsćichu, zo jedna so wo municiju pistole. Turist rjekny, zo je sportowy třělc a zo njemóže sej patronu we wačoku rozkłasć. Muž dyrbješe 500 eurow zapłaćić a smědźeše dale lećeć.

Brjazyna (SN/mb). Rada za naležnosće Serbow w Braniborskej so drje prawi­dłownje w rumnosćach braniborskeho krajneho sejma w Podstupimje schadźuje, druhdy pak tež pućuje. Tak su so čłonojo gremija a hosćo wčera na 6. wuradźowanje běžneje wólbneje periody do Brjazyny podali. Tam steješe nimo rozprawow krajneho zamołwiteho za serbske naležnosće a rady wo swojej dźěławosći mjez druhim aktualna situacija Dešnjanskeho domizniskeho muzeja na dnjowym porjedźe. Do toho pak zaběrachu so konkretnje z prašenjom kubłanja. Tohodla bě tež kubłanska referentka Domowiny Katrin Suchec-Dźisławkowa přichwatała.

W Žylowje, měšćanskim dźělu Choćebuza, hdźež je pěstowarnja z najdlěšej tradiciju kubłanja po Witaj-modelu, maja w zakładnej šuli „Lutki“ hižo wjele lět wulke problemy z rumnosćemi. Wo tym nawodnica šule Madline Gjarźic rozprawješe. Twar šule a přidatny kontejner njewotpowědujetej narokam šule za přewjedźenje skupinskeje wučby abo podobneho. Do profila šule, kotraž dobry styki z Witaj-pěstowarnju pěstuje, słuša bilingualna wučba w serbšćinje.

Berlin (dpa/SN). Druhi raz w běhu wosom dnjow je zwjazkowy kancler Friedrich Merz (CDU) dźensa w generalnej debaće zwjazkoweho sejma rěčał a financne planowanje knježerstwa zakitował. Tónraz rěčachu wo etaće za lěto 2026. Hladajo na słabe hospodarske wuwiće w kraju rěčeše Merz wo „nuznje trěbnych změnach“. Wšako dyrbi so industrija zaso zhrabać. „Za to dyrbimy chětro wjele činić“, wón rjekny.

Wüst chce popłatki pruwować

Berlin (dpa/SN). Ministerski prezident Sewjerorynsko-Westfalskeje Hendrik Wüst (CDU) je so za změnu wobydlerskeho pjenjeza wuprajił. Hač je sprawne, zo přijimarjam wobydlerskeho pjenjeza kóšty za bydlenje dospołnje wotewzamy, je dwělomne, rjekny Wüst w sćelaku ARD. „Ludźo ze snadnymi dochodami dyrbja podruž sami zapłaćić, tuž dyrbimy sej tole jara dokładnje wobhladać“, wón doda. Tež doba płaćenja a wysokosć popłatka maja w tym zwisku pruwować.

Dalši Afghanojo do Němskeje