Nürnberg/Bamberg (dpa/SN). Při cyberowym nadpadźe na Zwjazkowu agenturu za dźěło je wosom muži spytało, přepokazanki agentury na swójske konta přerjadować. Bayerscy fachowcy za bój přećiwo cyberowej kriminaliće su podhladnych w Porynsko-Pfalcy, Badensko-Württembergskej, Berlinje, Saksko-Anhaltskej a Schleswigsko-Holsteinskej wuslědźili, kaž centralny zarjad Cybercrime Bayerska w Bambergu zdźěli.

Wot kónca januara hač do srjedź měrca běchu podhladni 20 000 króć spytali, so do kontow wužiwarjow zadobyć. W něhdźe tysac padach je so jim tole poradźiło. 150 króć su kontowe zwiski tak změnili, zo je agentura pjenjezy woprawdźe na jich konta přepokazała. Zwjazkowa agentura pak je spěšnje reagowała, tak zo wosta škoda z nimale tysac eurami snadna.

Sobudźěłaćerka dźěłoweho zarjada w Sewjerorynsko-Westfalskej bě zastojnikow informowała, jako jej přepokazanki na konto zemrěteje žony napadnychu. Na to zwěsćichu cyły rjad njewoprawnjenych zasahnjenjow. Policija je mjeztym dźesać bydlenjow přeslědźiła.

Mišterstwo w kulenju słomjanych walčkow su mjeztym 14. króć w Dornumersielu nad Sewjernym morjom přewjedli. Cyłkownje 14 mustwow měrješe swoje mocy we wšelakich kategorijach. Při tym dyrbjachu wobdźělnicy něhdźe 200 kilogramow ćežki walčk słomy kuleć, mjez druhim na slalomowej čarje. „Kralowska“ disciplina je kulenje po 80 metrow dołhej nahłej skłoninje hač na wjeršk nasypa. Mišterstwo je wot lěta 2011 kruty wobstatk turistiskeho marketinga.

Najwjetša hdy natwarjena raketa w stawiznach swětnišćoweho slědźenja je swój jědnaty testowy lět w dalokej měrje po planje zmištrowała. Wot priwatneho swětnišćoweho předewzaća miliardara Elona Muska natwarjena raketa Starship je w Texasu wotlećała a hodźinu pozdźišo w Indiskim oceanje přizemiła. USA chcedźa z raketu na měsačk a na Mars lećeć.

Düsseldorf (B/SN). Hinduizm je w Indiskej najwjetše nabožne zhromadźenstwo nimo islama, křesćanstwa, sikkizma a buddhizma. Něhdźe 90 000 do 165 000 hinduwow bydli w Němskej, a to jako ćěkancy abo fachowi dźěłaćerjo. Woni su w diasporje w zhromadźenstwje žiwi a maja w sewjerorynsko-westfalskim měsće Hamm druhi najwjetši templ Europy Sri Kamadchi Ampal.

Młodźina wěrje přichilena

Wien (B/SN). Pastoralna teologowka Regina Polak zwěsći, zo přiběra wuznam nabožiny a wěry mjez młodymi ludźimi w starobje 14 do 25 lět. Po awstriskej studiji „Was glaubt Österreich?“ pyta młodźina orientaciju, přewod a zepěru w pluralistiskej towaršnosći. Sylniša prezenca muslimow jich pohnuwa, wo swójskej wěrje přemyslować. Tež křćeńcy dorosćenych přiběraja, kaž w Francoskej, Belgiskej a w Skandinawiskej.

Ekumena kaž Wienski walčik

Poza Rica (dpa/SN). Ličba mortwych w kónčinach ze zahubnymi dešćemi w minjenych dnjach w Mexiku je na 47 stupała. Za 38 zhubjenymi hišće pytaja, tak mexiske knježerstwo dźensa zdźěli. Něhdźe 260 sydlišćow je tuchwilu njepřistupnych, dźesaćitysacy domow je wobškodźenych abo zničenych. Mexiska prezidentka Claudia Sheinbaum, kotraž wopyta kónc tydźenja přepławjene město Poza Rica we wuchodnym zwjazkowym staće Veracruz, běše tam z protestami konfrontowana. Demonstranća žadachu sej spěšnišu a skutkownišu pomoc zarjadow.

Přesunu zapodaće etata

Paris (dpa/SN). Francoski premierminister Sébastien Lecornu, kotrehož běše prezident Emmanuel Macrona po swojim cofnjenju zaso do zastojnstwa přinjesł, dyrbi za dźensa planowane zapodaće naćiska etata do parlamenta přestorčić. Dokelž wobdźěli so prezident Emmanuel Macron dźensa na Gaza-wjeršku w Egyptowskej, je trěbne posedźenje noweho kabineta na wutoru přestorčene.

Pytaja dale za Fabianom